អំឡុងពេលវិបត្តិជំងឺកូវីដ១៩ ប្រសិនបើទីវត្តអារាមនៅទូទាំងខេត្ត មានបញ្ហាខ្វះខាតចង្ហាន់ សូមរាយការណ៍ទៅព្រះគ្រូអនុគណ ឬ មេគណខេត្តសៀមរាប ប្រសិនបើព្រះគ្រូអនុគណពុំមានលទ្ធភាព ដើម្បីធ្វើការដោះស្រាយឲ្យបានទាន់ពេលវេលា នេះបើតាមថេរដីកា ព្រះធម្មសិរី ជុំ គឹមឡេង ព្រះរាជាគណៈថ្នាក់កិត្តិយស និងជាព្រះសុមង្គលសិលាចារ្យ មេគណខេត្តសៀមរាប កាលពីរសៀលថ្ងៃទី០៧ ខែមិថុនា ឆ្នាំ២០២០ ក្នុងឱកាសជំនួបសួរសុខទុក្ខព្រះចៅអធិការទាំង២០វត្ត ស្ថិតក្នុងស្រុកបន្ទាយស្រី ខេត្តសៀមរាប។
ព្រះអង្គមានថេរដីកា យ៉ាងដូច្នេះ បន្ទាប់ពី មានការអំពាវនាវពី លោក សម្បត្តិ លីយឿត តំណាងមន្ទីរធម្មការ និងសាសនាខេត្តសៀមរាប បង្ហោះការត្អូញត្អែរពីភាពខ្វះខាតចង្ហាន់ ដោយមិនបានរាយការណ៍ជាមុន ដល់ព្រះគ្រូអនុគណ ឬ មេគណខេត្តសៀមរាប ដែលអាចឱ្យជនឆ្លៀតឱកាសមួយចំនួន វាយតម្លៃលើវិស័យព្រះពុទ្ឋសាសនានៅកម្ពុជា និងប៉ះពាល់ដល់ជំនឿដ៏មុតមាំរបស់ពុទ្ឋបរិស័ទ។
ព្រះមេគណខេត្ត បញ្ជាក់ថា ការអំពាវនាវរបស់មន្ទីរធម្មការ និងសាសនាខេត្តនៅពេលនេះ ស្របតាមសេចក្តីជូនដំណឹង និងការណែនាំរបស់គណៈសង្ឃនាយក ដែលបានជូនដំណឹងឱ្យគណៈសង្ឃនៅតាមបណ្ដារាជធានី-ខេត្ត ចុះសួរសុខទុក្ខព្រះសង្ឃនៅតាមមូលដ្ឋាន ខណៈមានការរាតត្បាតនៃជំងឺកូវីដ១៩ជុំវិញសកលលោក។ ជាមួយនោះ ប្រជាពុទ្ឋបរិស័ទជិតឆ្ងាយ ក៏មានការព្រួយបារម្ភពីការឆ្លងនៃជំងឺដ៏កាចសាហាវនេះ ដែលជាការចូលរួមគោរពតាមសេចក្ដីណែនាំរបស់រាជរដ្ឋាភិបាល ក្រសួងសុខាភិបាល និងគណៈសង្ឃនាយក នៃព្រះរាជាណាចក្រកម្ពុជា អំពីវិធានការ ការពារ បង្ការទប់ស្កាត់ការរីករាលដាលជំងឺកូវីដ១៩ទៅក្នុងគ្រួសារនិងសហគមន៍។
ព្រះមេគណខេត្ត បានថ្លែងអំណរគុណដល់សប្បុរសជនទាំងឡាយ ដែលជាការរួមចំណែកយ៉ាងសំខាន់ ជាមួយព្រះសង្ឃក្នុងឱកាសដ៏លំបាកនេះ។
សូមជម្រាបថា នេះជាលើកទី៤ហើយ ដែលក្រុមការងារសាលាគណខេត្តសៀមរាបបាននាំយក ទេយ្យវត្ថុ ស្បៀងអាហារ រួមនិងថវិកា ប្រគេនដល់បណ្ដាវត្តមួយចំនួនក្នុងខេត្តសៀមរាប ក្នុងនោះរួមមាន ស្រុកវ៉ារិន្ទ ស្រុកក្រឡាញ់ ស្រុកស្រីស្នំ និងស្រុកជីក្រែង ដើម្បីជួយសម្រួលភាពខ្វះខាតប្រចាំថ្ងៃរបស់ព្រះសង្ឃ។ សម្រាប់ស្រុកបន្ទាយស្រី មានវត្តចំនួន២០ ក្នុងមួយវត្តៗទទួលបាន អង្ករ៣០គ.ក្រ ត្រីឆ្អើរ៣០ក្រាស់ មី៦កេស ត្រីខ៣យួរ ចានស្រាក់ពីរឈុត គ្រឿងទេស១កញ្ចប់ ទឹកស៊ីអីវ១យួរ ទឹកត្រី១យួរ និង ថវិកាមួយវត្ត ១៨ម៉ឹនរៀល បន្ថែមពីនេះប្រគេនថវិកា៥០ម៉ឹនរៀលដល់សាលាអនុគណស្រុក សម្រាប់ត្រៀមប្រើការចាំបាច់ក្នុងវត្តផងដែរ។
អត្ថបទ និងរូបភាព៖ យូ វង្ស
កែសម្រួល៖ សេង ផល្លី
