លោក សេង លន នាយសង្កាត់រដ្ឋបាលព្រៃឈើកន្ទួត-ខ្នារក្រៅ បានឲ្យដឹងថា ចំការពូជឈើគ្រញូងកន្ទួត-ខ្នារក្រៅ មានផ្ទៃដីទំហំ ១.៨៨៨ ហិកតា ស្ថិតនៅក្នុងភូមិសាស្រ្តនៃឃុំកន្ទួត ស្រុកស្វាយលើ ខេត្តសៀមរាប ដែលគ្រប់គ្រងដោយសង្កាត់រដ្ឋបាលព្រៃឈើកន្ទួត-ខ្នារក្រៅ ដែលក្នុងនោះមានស្រះទឹកដ៏ធំមួយជម្រៅ៤ម៉ែត្រកន្លះ មានរាងជារង្វង់មូលដូច ត្រពាំងធម្មជាតិ មានអង្កត់ផ្ចិត ១០០ ម៉ែត្រ ដែលឧបត្ថម្ភកសាងផ្ទាល់ដោយឯកឧត្ដមនាយឧត្តមសេនីយ៍ ខេង សុមេធ មេបញ្ជាការនគរបាលជាតិប្រចាំទិសភូមិភាគ ទី៤ និង ទី៥ កាលក្នុងអំឡុងឆ្នាំ២០១៤ សម្រាប់ស្តុកទឹក ដើម្បីប្រើប្រាស់ជាប្រយោជន៍ក្នុងការពារភ្លើងឆេះព្រៃក្នុងរដូវប្រាំង ដែលជាពិសេសនោះ គឺសម្រាប់ជាទីប្រមូលផ្តុំនៃសត្វព្រៃនៅទីនោះផងដែរ ។
លោក សេង លន បានឲ្យដឹងទៀតថា ដោយឡែក មជ្ឈមណ្ឌល សំ វាសនា សម្រាប់ការអភិរក្សជីវចម្រុះ (SVC) បានតាមដានឃើញដែរថា នៅក្នុងចំការពូជឈើគ្រញូងនោះ មានវត្តមានបណ្តាសត្វម្រឹគជាច្រើនប្រភេទកំពុងរស់នៅក្នុងព្រៃនេះ និងមានសត្វស្លាប១៦៨ប្រភេទ ដែលបានយកព្រៃចំការពូជឈើគ្រញូង ធ្វើជាអាណាចក្រដ៏សុខសាន្តរបស់ពួកគេ ដូច្នេះផ្អែកតាមសក្តានុពលដែលមានស្រាប់នៅក្នុងតំបន់នេះ មជ្ឈមណ្ឌលសហប្រតិបត្តិការមេគង្គ-កូរ៉េខាងត្បូង ជាមួយរដ្ឋបាលព្រៃឈើកម្ពុជា គាំទ្រដោយរដ្ឋាភិបាលនៃប្រទេសទាំង២ មានគម្រោងបង្កើតព្រៃលំហែកំសាន្តធម្មជាតិកម្ពុជា-កូរ៉េ នៅតំបន់នេះ ប៉ុន្តែត្រូវបានពន្យាពេលដោយ សារតែ វិបត្តិកូវីត-១៩ តែឆ្នាំ២០២០នេះ គម្រោងបានផ្តល់ថវិកាសម្រាប់ការជួសជុលកែលម្អផ្លូវចូលស្នាក់ការ ឆ្លងកាត់សួនអនុស្សាវរីយ៍ដាំកូនឈើ បានជិត៣.០០០ម៉ែត្រ៕
អត្ថបទ និង រូបថត ៖ លោក ងិន គឹមឡេង
កែសម្រួលអត្ថបទ ៖ លោក លីវ សាន្ត
