តំបន់ឧទ្យានជាតិភ្នំគូលែន ស្ថិតក្នុងស្រុកបន្ទាយស្រី ខេត្តសៀមរាប បានបាត់បង់ព្រៃឈើស្ទើរទាំងស្រុង ដោយសារការ អាស្រ័យផល ការកាប់ទន្ទ្រានយកឈើ និងទន្ទ្រានយកដីធ្វើជាកម្មសិទ្ធ របស់ជនខិលខូចមួយចំនួន នេះបើតាមកិច្ចសម្ភាសន៍ រវាង លោក ឃឹម ហ្វីណង់ អភិបាលស្រុកបន្ទាយស្រី និងវិទ្យុជាតិកម្ពុជា ។
លោកអភិបាលស្រុក បន្តថា ការកំណត់ទីតាំងស្តារ និងដាំដើមឈើឡើង ក្នុងតំបន់ឧទ្យានជាតិភ្នំគូលែននេះ មានការសហការពីក្រសួងបរិស្ថាន មន្រ្តីឧទ្យានុរក្ស និងអង្គការពាក់ពន្ធ័មួយចំនួនទៀត ដើម្បីដាំដើមឈើប្រណីតមានរយៈពេលវែង ផ្ទៃដីសរុបប្រមាណជិត១ពាន់ហិកតា និងមានការគាំទ្រពីអង្គការUNDP និងអង្គការមួយចំនួនទៀត។
លោកអភិបាលស្រុក បញ្ជាក់ថា ក្នុងគម្រោងស្តារ និងដាំដើមឈើឡើងនេះ អាជ្ញាធរស្រុក ក៏បានធ្វើកិច្ចការជាច្រើន ដើម្បីការពារតំបន់ក្បាលជុក ព្រោះទីនេះ ជាតំបន់រក្សាប្រភពទឹក ដែលហូរឆ្លងកាត់តំបន់ប្រាសាទបន្ទាយស្រី និងហូរចាក់ទៅកាន់ស្ទឹងសៀមរាប។ ប្រសិនបើប្រភពទឹកនេះ មានការខ្វះខាត ប្រាសាទបុរាណនានា នឹងជួបផលលំបាក ជាពិសេសប្រាសាទ ស្ថិតក្នុងស្រុកបន្ទាយស្រី។
ព័ត៌មានជាតិ ថ្មីៗ
លោកអភិបាលស្រុកបន្ទាយស្រី បានអំពាវនាវដល់សាធារណៈជនទាំងអស់ ឲ្យបង្កើនការប្រុងប្រយ័ត្ន និងចៀសវាងការទិញដី និងសំណង់ នៅក្នុងតំបន់ឧទ្យានជាតិនិងតំបន់ជើងភ្នំគូលែន ពីឈ្មួញលក់ដីខុសច្បាប់ ទោះក្នុងតម្លៃទាបយ៉ាងណាក៏ដោយ គឺរដ្ឋបាលស្រុកនឹងមិនទទួលខុសត្រូវចំពោះការខាតបង់ផលប្រយោជន៍ដោយប្រការណាមួយនោះឡើយ ។ សម្រាប់ជនណាដែលលួចទន្ទ្រានយកដីរដ្ឋទៅលក់ នឹងត្រូវរងការចោទប្រកាន់ពីបទល្មើសព្រហ្មទណ្ឌ ដែលមានចែងក្នុងច្បាប់ជាធរមាន ៕
អត្ថបទនិងរូបភាព៖ វិទ្យុជាតិកម្ពុជា
កែសម្រួល៖ លោក សេង ផល្លី
