នៅល្ងាចប្រមាណ ៦ល្ងាច ថ្ងៃទី១០ ខែមិថុនា ឆ្នាំ២០២០ នៅក្នុងក្រុងសៀមរាប មានភ្លៀងលាយនឹងខ្យល់កន្ត្រាក់មួយមេ បង្កឲ្យដើមអង្កាញ់នៅអមសងខាងផ្លូវ ២៦ ដើមរលំ និងបាក់មែក នៅតាមបណ្ដោយផ្លូវ នៃរង្វង់មូល វិថីវិបុលបញ្ញា សុខ អាន ឬហៅថាផ្លូវ៦០ម៉ែត្រ ឆ្ពោះទៅផ្លូវជាតិលេខ៦។
លោក ពៅ ដារ៉ាវុធ អភិបាលរងក្រុងសៀមរាប បានឲ្យដឹងថា ក្នុងចំណោមដើមអង្កាញ់ ២៦ដើមនោះ មាន រលំ ០៧ដើម និងបាក់មែក១៩ដើម។ ករណីនេះ បានបង្កឲ្យមានការកកស្ទះចរាចរណ៍ តែពុំបង្កឲ្យមានគ្រោះថ្នាក់ដល់អ្នកធ្វើដំណើរឡើយ។ ក្រោយការបាក់រលំនេះ អាជ្ញាធរក្រុង បានដឹកនាំកម្លាំងប្រជាការពារ កម្មករចុះធ្វើការអន្តរាគមន៍ភ្លាម ដើម្បីកាត់ និងអូសទាញដើមឈើទាំងនោះ ចេញពីទ្រូងផ្លូវ។
ទន្ទឹមនោះ នៅថ្ងៃដដែល ឯកឧត្តម ទៀ សីហាអភិបាលខេត្តសៀមរាប បានសរសេរនៅលើបណ្ដាញសង្គមផ្លូវការរបស់ឯកឧត្តម កោតសរសើរ ចំពោះចំណាត់ការភ្លាមៗ ប្រកបដោយប្រសិទ្ធភាព របស់អាជ្ញាធរក្រុង។
ព័ត៌មានជាតិ ថ្មីៗ
គួរជម្រាបថា ដើមឈើអង្កាញ់ទាំងនេះ ត្រូវបានអាជ្ញាធរជាតិអប្សរា ដាំលម្អអមសងខាងផ្លូវ ដើមី្បទប់បំណាក់ដីចិញ្ចើមផ្លូវ ដែលអាចហូរច្រោះចូលទៅក្នុងប្រឡាយរំដោះទឹកនៅសងខាងផ្លូវ ព្រមទាំងបង្កើនសោភណ្ឌភាពបៃតង សមស្របជាខេត្តទេសចរណ៍ផងដែរ។
