ព្រឹកថ្ងៃទី១០ខែមិថុនាឆ្នាំ២០២០នេះ ម្ចាស់ភោជនីយដ្ឋានមុខប្រាសាទអង្គរវត្តចំនួនពីររូបទៀត បានស្ម័គ្រចិត្តឲ្យអាជ្ញាធរជាតិអប្សរា រុះរើសំណង់ភោជនីយដ្ឋានរបស់ខ្លួន និងប្រគល់ទីតាំងជូនអាជ្ញាធរជាតិអប្សរា ដើម្បីរៀបចំសោភណ្ឌភាពខាងមុខប្រាសាទអង្គរវត្ត ។ការរុះរើនេះ ធ្វើឡើងកាលពីព្រឹកថ្ងៃទី១០ខែមិថុនាឆ្នាំ២០២០នេះ ។
មានប្រសាសន៍នៅទីតាំងរុះរើសំណង់នោះ លោក យិត ចាន់ដារដ្ឋ អគ្គនាយករងអាជ្ញាធរជាតិអប្សរា បង្ហាញថា អាជ្ញាធរជាតិអប្សរា ការរៀបចំសោភណ្ឌបរិវេណខាងមុខប្រាសាទអង្គរវត្តនេះ គឺដើម្បីកែលម្អហេដ្ឋារចនាសម្ព័ន្ធរូបវន្ត សម្បទាទេសចរណ៍ រួមទាំងការកែលម្អទេសភាពបៃតង សម្រាប់ការបម្រើសេវាកម្មទេសចរណ៍កម្រិតអន្តរជាតិ។
ជាការលើកឡើងរបស់ម្ចាស់ភោជនីយដ្ឋានទាំងពី អាជីវកម្មរបស់ពួកគាត់ បានដំណើរការអំឡុងឆ្នាំ១៩៩០ ហើយការស្ម័គ្រចិត្តឲ្យអាជ្ញាធររុះរើនេះ គឺដើម្បីចូលរួមធ្វើ ឲ្យខេត្តសៀមរាប កាន់តែមានភ្ញៀវទេសចរមកទស្សនាកាន់តែច្រើននាពេលអនាគត។
ព័ត៌មានជាតិ ថ្មីៗ
បើតាមការឲ្យដឹងពីអាជ្ញាធរជាតិអប្សរា គិតមកទល់ថ្ងៃទី១០ខែមិថុនា ឆ្នាំ២០២០នេះ មានម្ចាស់សំណង់ភោជនីយដ្ឋានចំនួន០៩ កន្លែងហើយ បានស្មគ្រ័ចិត្តរុះរើ ក្នុងចំណោមសំណង់ជាង១០០នៅមុខបរិវេណប្រាសាទអង្គរវត្ត។ តាមគម្រោងនៅត្រឹមចុងខែសីហា ឆ្នាំ២០២០ខាងមុខនេះ នឹងត្រូវរុះរើឲ្យអស់ ចំពោះសំណង់នៅមុខបរិវេណប្រាសាទអង្គរវត្ត ដើម្បីរៀបចំទីធ្លានោះឲ្យក្លាយជាតំបន់ទេសចរណ៍មានពណ៌បៃតងគ្រប់រដូវកាល៕
អត្ថបទ និង រូបថត ៖ បូ សាវី
កែសម្រួលអត្ថបទ ៖ សេង ផល្លី
