នៅព្រឹកថ្ងៃទី១១ ខែមិថុនា ឆ្នាំ២០២០ នាក្រុងសៀមរាប មានរៀបចំសិក្ខាសាលា ពិភាក្សាជាមួយអង្គភាពពាក់ព័ន្ធលើការអនុវត្តច្បាប់ ស្ដីពីរបបសារព័ត៌មាន ក្រោមអធិបតីភាព លោក ពៅ ពិសិដ្ឋ អភិបាលរងខេត្ត តំណាងដ៍ខ្ពង់ខ្ពស់ឯកឧត្តម ទៀ សីហា អភិបាលខេត្តសៀមរាប សហការរៀបចំដោយ អង្គការជំនួយផ្នែកច្បាប់ និងមន្ទីរព័ត៌មានខេត្តសៀមរាប ព្រមទាំងមានអ្នកសារព័ត៌មានក្នុងខេត្ត ចំនួន១០អង្គភាពផងដែរ។
លោកអភិបាលរងខេត្ត បង្ហាញថា បច្ចុប្បន្ន រាជរដ្ឋាភិបាល បានយកចិត្តទុកដាក់ខ្ពស់ទៅច្បាប់ស្ដីពីរបបសារព័ត៌មាននៅកម្ពុជា ដើម្បីធ្វើឲ្យវិស័យព័ត៌មាន កាន់តែមានភាពល្អប្រសើរ ក្រមសីលធម៌ និងវិជ្ជាជីវៈ។ ក្នុងនោះអ្នកសារព័ត៌មាន គួរចៀសវាង ប្រើប្រាស់តួនាទី និងសិទ្ធជាអ្នកសារព័ត៌មាន ជំនួសការងាររបស់សមត្ថកិច្ចជំនាញ និងបំពានលើសិទ្ធអ្នកដទៃ។ ទន្ទឹមនោះ អ្នកសារព័ត៌មាន គប្បីបង្ហាញនូវចំណេះដឹងរបស់ខ្លួន ចូលរួមផ្សព្វផ្សាយពី ចំណុចអភិវឌ្ឍរបស់រាជធានី-ខេត្តនីមួយៗ ក្នុងនោះវិស័យទេសចរណ៍នៅក្នុងខេត្តសៀមរាបជាដើម។
ថ្លែងក្នុងឱកាសនោះដែរ ឯកឧត្តម លីវ សុខុន ទីប្រឹក្សាក្រសួងព័ត៌មាន និងជាប្រធានមន្ទីរព័ត៌មានខេត្តសៀមរាប លើកឡើងថា សិក្ខាសាលានាពេលនេះ បានចូលរួមផ្ដល់ចំណេះដឹងបន្ថែម ដល់អ្នកសារព័ត៌មាន ឲ្យយល់កាន់តែច្បាស់ពីសិទ្ធ និងតួនាទីរបស់ខ្លួន ជាពិសេសធ្វើឲ្យមានភាពស៊ីសង្វាក់គ្នារវាងអាជ្ញាធរ និងអ្នកសារព័ត៌មាន គ្រប់និន្នាការក្នុងខេត្តសៀមរាប។ ជាមួយនោះ មន្ទីរព័ត៌មានខេត្តសៀមរាប បានបំពេញតួនាទីយ៉ាងខ្ជាប់ខ្ជួន ក្នុងនាមជាសេនាធិការរបស់ក្រសួងព័ត៌មាន ដើម្បី សម្របសម្រួលរវាងអាជ្ញាធរខេត្ត មន្ទីរ-អង្គភាពជំនាញ ជាមួយអ្នកសារព័ត៌មានជាតិ និងអន្តរជាតិ។
ឯកឧត្តម បញ្ជាក់បន្ថែមថា បច្ចុប្បន្ន ក្រសួងព័ត៌មាន បាននិងកំពុងពង្រាងច្បាប់ស្ដីពីសិទ្ធទទួលព័ត៌មាន ក្នុងគោលបំណងធានាឱ្យសាធារណជនគ្រប់រូបនូវសិទ្ធិ សេរីភាព ក្នុងការទទួលបានព័ត៌មាន ពីស្ថាប័នសាធារណៈ ស្របតាមរដ្ឋធម្មនុញ្ញ នៃព្រះរាជាណាចក្រកម្ពុជា។
បើតាមការបង្ហាញពី លោកមេធាវី អ៊ុន ច័ន្ទថុល តំណាងអង្គការជំនួយផ្នែកច្បាប់នៅកម្ពុជា (LAC) គម្រោងការពារក្តីជូនដល់អ្នកសារព័ត៌មាននេះ មានរយៈពេល១៨ ខែ ចាប់ពីថ្ងៃទី ០១ ខែ មករា ឆ្នាំ២០១៩ រហូតដល់ថ្ងៃទី៣០ ខែ មិថុនា ឆ្នាំ២០២០នេះ នាពេលកន្លងមក អង្គការបានការពារក្តីជូនអ្នកសារព័ត៌មានចំនួន ១៣ករណី មានអ្នកសារព័ត៌មានពាក់ព័ន្ធចំនួន ២២នាក់ ស្ថិតក្នុងខេត្តចំនួន៩ ហើយក្នុងនោះ ក៏មាន០២ ករណីក្នុងខេត្តសៀមរាបផងដែរ ។ កន្លងមកអង្គការជំនួយផ្នែកច្បាប់ បានបណ្តុះបណ្តាល និង ពង្រឹងផ្នែកច្បាប់ដល់អ្នកសារព័ត៌មាន បានចំនួន០៣លើក និងមានអ្នកចូលរួម សរុបចំនួន ៩១ នាក់ ៕
អត្ថបទ និង រូបថត ៖ មន្ទីរព័ត៌មានខេត្តសៀមរាប
