នៅព្រឹកថ្ងៃទី១១ ខែមិថុនា ឆ្នាំ២០២០ គណៈកម្មាធិការបណ្តុះបណ្តាលវិជ្ជាជីវៈសារព័ត៌មាន និងវិក្រឹតការ នៃក្រសួងព័ត៌មាន បានបើកកិច្ចប្រជុំ ក្រោមវត្តមានប្រធានអង្គប្រជុំ ឯកឧត្តម ហ៊ីវ ជននាថ រដ្ឋលេខាធិការ ក្រសួងព័ត៌មាន ព្រមទាំងសមាសភាពចូលរួមពីសំណាក់ ឯកឧត្តម លោកជំទាវ ជាអនុរដ្ឋលេខាធិការ ថ្នាក់ដឹកនាំ អគ្គនាយកដ្ឋានទាំង ៥ និងប្រធានមណ្ឌលបណ្តុះបណ្តាលវិជ្ជាជីវៈ និងវិក្រឹតការ។
ឯកឧត្តម ហ៊ីវ ជននាថ បញ្ជាក់ថា គណៈកម្មាធិនេះ បង្កើតឡើងដោយ ឯកឧត្តម ខៀវ កាញារីទ្ធ រដ្ឋមន្រ្តី ក្រសួងព័ត៌មាន ដែលមានភារកិច្ច ធ្វើការបណ្តុះបណ្តាល វិជ្ជាជីវៈសារព័ត៌មាន និង វិក្រឹតការដល់អ្នកសារព័ត៌មានជាតិ និងអន្តរជាតិ – ត្រួតពិនិត្យ តាមដាន និង វាយតម្លៃលើគុណភាព វិជ្ជាជីវៈសារព័ត៌មានរដ្ឋ និង វិស័យឯកជន ព្រមទាំងលើកកម្ពស់សមត្ថភាពមន្ត្រីជំនាញគ្រប់វិស័យដែលពាក់ព័ន្ធលើផ្នែកសារព័ត៌មាន។ ក្នុងនោះ ក៏មានភារកិច្ចផ្តួចផ្តើមគំនិតក្នុងការរៀបចំផែនការ យុទ្ធសាស្ត្រ និងលើកគម្រោង ផែនការបណ្តុះបណ្តាលជាមួយភាគីដៃគូជាតិ និងអន្តរជាតិ រួមទាំងការងារសំខាន់ៗនានាជាច្រើនទៀត។
តាមការលើកឡើង របស់ ឯកឧត្តម លោកជំទាវ ជាអនុប្រធាន អនុប្រធានអចិន្រ្តៃយ៏ សមាជិក នៃគណៈកម្មាធិការ នាពេលកន្លងមក សកម្មភាពការងារបណ្តុះបណ្តាលតាមបណ្តា អង្គភាព និង អគ្គនាយកដ្ឋាននីមួយៗ បានរៀបចំនូវវគ្គខ្លីៗ ដែលនៅមិនទាន់ឆ្លើយតប តាមតម្រូវ នៃការវិវឌ្ឍន៍ការងារ នាពេលបច្ចុប្បន្ននេះ នឹងពេលខាមុខនោះនៅឡើយ។ ដូច្នេះ តាមបណ្តាអគ្គនាយកដ្ឋានជំនាញ ក៏មានការលើកជាសំណើអោយមានការបណ្តុះបណ្តាល រយៈពេលវែងដល់មន្រ្តី ពិសេសការងារ បច្ចេកទេស និងជំនាញសម្រាប់ការត្រៀមធ្វើការផ្លាស់ប្តូរប្រព័ន្ធផ្សាយ ទូរទស្សន៍ពី អានណាឡូក ទៅជា ឌីជិថល នាឆ្នាំ២០២៣ ខាងមុខនេះ។
ព័ត៌មានជាតិ ថ្មីៗ
អត្ថបទ និង រូបថត ៖ ក្រសួងព័ត៌មាន
