រដ្ឋបាលក្រុងសៀមរាប នៅព្រឹកថ្ងៃទី១២ ខែមិថុនា ឆ្នាំ២០២០នេះ ក្រោមអធិបតីភាព ឯកឧត្តម ទៀ សីហា អភិបាលខេត្តសៀមរាប បានរៀបចំពិធីសំណេះសំណាល និងពិភាក្សាការងារមួយចំនួនផងដែរ ស្តីអំពីបញ្ហាសន្តិសុខ-សណ្តាប់ធ្នាប់សង្គម និងបង្ហាញអំពីបច្ចុប្បន្នភាពការងារអភិវឌ្ឍក្រុង ដែលកំពុងស្ថិតនៅក្នុងចក្ខុវិស័យគ្របដណ្តប់ទៅលើបណ្តាផ្នែកសំខាន់ៗជាច្រើននោះ។
លោក នួន ពុទ្ធារ៉ា អភិបាលក្រុងសៀមរាបបានបញ្ចាក់ឲ្យដឹងថា៖ ដោយសារតែសារៈសំខាន់នៃកិច្ចប្រជុំនេះ មន្រ្តីដែលពាក់ព័ន្ធទាំងអស់ រួមមានការិយាល័យជំនាញជុំវិញរដ្ឋបាលក្រុង ចៅសង្កាត់ និងកម្លាំងប្រដាប់អាវុធទាំង៣ត្រូវបានចូលរួម។ អ្វីដែលជាគោលបំណងនៃកិច្ចប្រជុំនេះ គឺចង់បង្ហាញអំពីវឌ្ឍនភាពការងារ បទពិសោធន៍ ការធ្វើដំណោះស្រាយលើបញ្ហាប្រឈម ព្រមជាមួយនិងការដាក់ចេញនូវវិធានការជំនះនូវរាល់បញ្ហាមួយចំនួន ដែលកិច្ចប្រជុំនេះ បានចាត់ទុកថា ជាឧបស័គ្គ ឬជាករណីណាមួយ ដែលវាកើតឡើងដោយការមិនគោរពច្បាប់។
លោកអភិបាលក្រុង លើកបង្ហាញឲ្យដឹងដែរថា៖ បើទោះជារយៈពេល៦ខែដើមឆ្នាំ២០២០នេះ ថ្វីត្បិតតែវិបត្តិកូវីដ១៩ បានបង្ករឲ្យមានការព្រួយបារម្ភអំពីសុខភាពសាធារណៈ និងបង្កឲ្យមានផលប៉ះពាល់ដល់សេដ្ឋកិច្ចសង្គម ក៏ប៉ុន្តែរដ្ឋបាលក្រុងសៀមរាប បានយកចិត្តទុកដាក់បញ្ជៀសបញ្ហាវិបត្តិកូវីដ១៩ មិនឲ្យប៉ះពាល់រាំងស្ទះ ដល់ការងារអទិភាពសំខាន់ៗរបស់ខ្លួននោះឡើយ។
ព័ត៌មានជាតិ ថ្មីៗ
ឯកឧត្តម ទៀ សីហា អភិបាលខេត្តសៀមរាប បានរំលឹកដល់កិច្ចប្រជុំថា៖ ការងារទប់ស្កាត់ការចម្លងវីរុសកូវីដ១៩ នៅតែស្ថិតក្នុងសុពលភាពគ្មានទីបញ្ចប់នោះទេ ដ៏រាបណាមិនទាន់មានប្រកាសជាថ្មីដែលចេញដោយរាជរដ្ឋាភិបាល ឬក៏ក្រសួងសុខាភិបាលនោះ ដូចនេះអាជ្ញាធរមូលដ្ឋានគ្រប់លំដាប់ថ្នាក់ ត្រូវបន្តពង្រឹងការងារនេះ ឲ្យមានចលនារស់រវើកជានិច្ច។ យ៉ាងណាក៏ដោយ ទាក់ទងទៅនឹងស្ថានភាពនៃវិបត្តិកូវីដ១៩នេះដែរ ឯកឧត្តមអភិបាលខេត្ត ក៏បានជម្រុញឲ្យបណ្តាសង្កាត់ទាំង១២ បន្តការធ្វើអត្តសញ្ញាណកម្មជនក្រីក្រថ្មីឲ្យបានច្បាស់លាស់ និងត្រូវកំណត់ឲ្យបានច្បាស់ដែរថា ការស្រង់ស្ថិតិចុះបញ្ជីជនក្រីក្រនេះ គឺត្រូវឈរលើគោលការណ៍ មិនប្រកាន់និន្នាការនយោបាយអ្វីនោះឡើយ។
ក៏ជាការជម្រុញឲ្យមានការយកចិត្តទុកដាក់ផងដែរ ឲ្យអាជ្ញាធរដែនដី ត្រូវសហការជាមួយកម្លាំងនគរបាលប៉ុស្ថិរដ្ឋបាលគ្រប់បណ្តាសង្កាត់ទាំង១២ ចុះស្រាវជ្រាវឡើងវិញ បន្តអនុវត្តផែនការទប់ស្កាត់ការចរាចរណ៍ ចែកចាយ ប្រើប្រាស់គ្រឿងញៀន និងទប់ស្កាត់ការលេងល្បែងស៊ីសងគ្រប់ប្រភេទ ដែលទាំងនេះវាជាបញ្ហាបង្ករឲ្យមានវិបត្តិសង្គម។ ឯកឧត្តមគូសបញ្ចាក់ថា វិបត្តិកូវីដ១៩ វាបានបង្កឲ្យមានផលប៉ះពាល់ដល់ជីវភាពរស់នៅរបស់ប្រជាពលរដ្ឋរួចទៅហើយ ក៏ប៉ុន្តបើសិនជាវិបត្តិសង្គម ត្រូវកើតឡើងដោយសារគ្រឿងញៀន និងល្បែងស៊ីសងថែមទៀតនោះ ទម្ងន់នៃវិបត្តិសង្គមកាន់តែធ្ងន់ធ្ងរ លំបាកនឹងរកដំណោះស្រាយជាមិនខាន។ ឯកឧត្តម សង្កត់ធ្ងន់ថា៖ វិធានការរដ្ឋបាលនឹងត្រូវបានប្រើប្រាស់ បើសិនជាវិធានការអប់រំ ដែលបានប្រើប្រាស់មិនមានប្រសិទ្ធភាពនោះ៕
អត្ថបទ និងរូបភាព៖ ងិន គឹមឡេង
