លោកជំទាវ សុខ ណារ៉ូ អនុប្រធានគណៈកម្មាធិការសាខាកាកបាទក្រហមខេត្ត បាននាំយកអំណោយទៅចែកជូនបងប្អូនគ្រួសារងាយរងគ្រោះ ក្នុងពេលមានវិបត្តិជម្ងឺកូវិដ១៩ ចំនួន៤០គ្រួសារ ក្នុងស្រុកស្រីស្នំ ខេត្តសៀមរាប ដែលជាអំណោយរបស់សម្ដេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ប្រធានកាកបាទក្រហមកម្ពុជា កាលពីព្រឹកថ្ងៃទី ១២ ខែ មិថុនា ឆ្នាំ២០២០ ដោយមានការអញ្ជើញចូលរួមពីអស់លោក លោកស្រីជាសមាជិកគណៈកម្មាធិការសាខា អនុសាខាស្រុក រួមទាំងអាជ្ញាធរមូលដ្ឋានផងដែរ ។
មានប្រសាសន៍សំណេះសំណាលនោះលោកជំទាវ សុខ ណារ៉ូ ក៏បានពាំនាំនូវការផ្ដាំផ្ញើសួរសុខទុក្ខពីសម្ដេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ប្រធានកាកបាទក្រហមកម្ពុជា និងឯកឧត្តម ទៀ សីហា ប្រធានគណៈកម្មាធិកាកសាខា ដែលជានិច្ចកាលសម្ដេចតែងតែយកចិត្តទុកដាក់គិតគូរខ្ពស់បំផុត ចំពោះសុខទុក្ខប្រជាពលរដ្ឋគ្រប់រូប មិនប្រកាន់វណ្ណៈ ពណ៌សម្បុរ ជំនឿសាសនា ឬនិន្នាការនយោបាយណាមួយឡើយ ។ លោកជំទាវក៏បានបញ្ជាក់ដែរថា អំណោយមនុស្សធម៌ទាំងអស់នេះ គ្រាន់តែអាចជួយសម្រួលការខ្វះខាតរបស់បងប្អូនបានមួយរយៈពេលខ្លី ក្នុងពេលដែលប្រទេសជាតិកំពុងជួប នូវវិបត្តិជម្ងឺកូវីដ១៩ ដែលធ្វើឲ្យមានផលប៉ះពាល់ដល់ជីវភាពរបស់បងប្អូនជាគ្រួសារងាយរងគ្រោះ ។
ក្នុងនោះដែរ លោកជំទាវ ក៏បានក្រើនរម្លឹកដល់បងប្អូនប្រជាពលរដ្ឋទាំងអស់ មិនត្រូវធ្វេសប្រហែសអំពីជម្ងឺកូវីដ១៩ ដែលជាបញ្ហាប្រឈមរួម ទូទាំងសកលលោកនាពេលនេះ ទោះបីចំនួនអ្នកឆ្លងនៅក្នុងប្រទេសយើងមានតិចក្តី តែយើងត្រូវបង្កើនការយកចិត្តទុកដាក់ខ្ពស់ និង ត្រៀមទប់ស្កាត់គ្រប់ពេលវេលា ដោយ ធ្វើអនាម័យសុខភាពឲ្យបានជាប្រចាំ ដើមី្បការពារអាយុជីវិតសម្រាប់ខ្លួនឯងផ្ទាល់ និង ក្រុមគ្រួសារកុំឲ្យមានឆ្លងមេរោគកូវីដ១៩ ក៏ដូចក្នុងសហគម សំខាន់ក្នុងការចូលរួមប្រយុទ្ធប្រឆាំងទប់ស្កាត់ជាមួយរាជរដ្ឋាភិបាលយើង និង អនុវត្តឲ្យបាន តាមការណែនាំ និងវិធានការរបស់ក្រសួងសុខាភិបាល គឺ ត្រូវដុសលាងសម្អាតដៃជាប្រចាំដោយ ទឹកសាប៊ូ និងអាល់កុល ឬជែល និងពាក់ម៉ាស់ឲ្យបានត្រឹមត្រូវ និង ត្រូវខ្ទប់មាត់ជាមួយក្រម៉ា ឬម៉ាស់ នៅពេលក្អក ឬកណ្តាស នៅក្នុងចំណោមក្រុមមនុស្សច្រើន ឬទីប្រជុំជននានាជាដើម ។
ព័ត៌មានជាតិ ថ្មីៗ
ម្យ៉ាងវិញទៀត ចូលរួមគោរពច្បាប់ចរាចរណ៍ផ្លូវគោកថ្មី ដើម្បីការពារអាយុជីវិតខ្លួនឯង និងក្រុមគ្រួសាររបស់ខ្លួន សំខាន់កាត់បន្ថយឲ្យបាននូវគ្រោះថ្នាក់ចរាចរណ៍ និងធ្វើការអប់រំកូនចៅ ជៀសឲ្យឆ្ងាយពីគ្រឿងញៀន និង ត្រូវយកចិត្តទុកដាក់ខ្ពស់អំពីសុខភាពរបស់ កុមារតូចៗ កុំឲ្យមានកើតជម្ងឺគ្រុនឈាម គឺត្រូវធ្វើអនាម័យនៅជុំវិញលំនៅដ្ឋាន បំបាត់ទីជម្រកមូសខ្លា ដោយរដូវភ្លៀងធ្លាក់ បានមកដល់ហើយ សូមបងប្អូនរួសរាន់លើការងារបង្កបង្កើនផលធ្វើស្រែចម្ការ និង ដាំដុះដំណាំរួមផំ្ស ដើម្បីបង្កើនជីវភាពរស់នៅប្រចាំថ្ងៃបន្ថែមទៀតផង ។
អំណោយជូនដល់បងប្អូនគ្រួសារងាយរងគ្រោះទាំង ៤០គ្រួសារ ដោយមួយគ្រួសារទទួលបាន អង្ករ ២៥គីឡូក្រាម ត្រីខ ១យួរ អាវយឺត២ និង ថវិកា ៤ម៉ឺនរៀល ។ ក្នុងនោះដែរលោកជំទាវ និង ប្រតិភូក៏បានជួបសំណេះសំណាលជាមួយ កុមារពិការ ដោយជម្ងឺរលាកខួក្បាល អាយុ ៣ឆ្នាំ ដែលត្រូវឪពុកម្តាយ បានទុកចោលឲ្យនៅជាមួយជីដូន ក្នុងជីវភាពក្រលំបាក ហើយលោកជំទាវក៏បាននាំគ្រឿងឧបភោគបរិភោគ និង ឃិត១កញ្ចប់ រួមទាំងថវិកា ២០ម៉ឺនរៀលផ្តល់ជូនដល់ក្រុមគ្រួសារក្មួយប្រុសផងដែរ ៕
អត្ថបទ និងរូបភាព៖ ម៉ី សុខារិទ្ធ
