កាលពីថ្ងៃទី១៣ ខែមិថុនា ឆ្នាំ២០២០ ឯកឧត្តម ង៉ាន់ ភិរុណ ប្រធានក្រុមការងារថ្នាក់កណ្តាលចុះជួយស្រុកបន្ទាយស្រី បានដឹកនាំក្រុមការងារថ្នាក់កណ្តាលចុះជួយស្រុកបន្ទាយស្រី ចុះសួរសុខទុក្ខ និងចែកអំណោយជូនដល់បងប្អូនប្រជាពលរដ្ឋក្រីក្រចំនួន ២៨៣គ្រួសារ ស្ថិតនៅឃុំព្រះដាក់ ស្រុកបន្ទាយស្រី ខេត្តសៀមរាប ដែលកំពុងមានជីវភាពខ្វះខាត អំឡុងពេលវិបត្តិជំងឺកូវីដ១៩ កំពុងបន្តអូសបន្លាយលើសកលលោកនិងនៅកម្ពុជា។
ឯកឧត្តមប្រធាន មានប្រសាសន៍ថា ក្រោមការដឹកនាំរបស់ សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រី នៃព្រះរាជាណាចក្រកម្ពុជា បានធ្វើឲ្យប្រទេសជាតិមានសុខសន្តិភាព ស្ថេរភាពនយោបាយពេញលេញ និងការអភិវឌ្ឍន៍ រីកចម្រើនលើគ្រប់វិស័យ។ ជាក់ស្ដែងស្រុកបន្ទាយស្រី ពីមួយថ្ងៃទៅមួយថ្ងៃ កំពុងតែមានការអភិវឌ្ឍទៅមុខជាលំដាប់ ដូចជា ស្ពាន ផ្លូវ ថ្នល់ សាលារៀន មណ្ឌលសុខភាព ជាដើម ដែលជាសមិទ្ធផល ជួយធ្វើឲ្យជីវភាពប្រជាពលរដ្ឋនៅក្នុងមូលដ្ឋាន កាន់តែមានភាពល្អប្រសើរ។
ទន្ទឹមនោះ ឯកឧត្តមប្រធាន ក៏បានបញ្ជាក់ដែរថា ដោយសារវិបត្តិជាសកល នៃជំងឺកូវីដ១៩ បានធ្វើឲ្យទំនាក់ទំនងពាណិជ្ជកម្មលើពិភពលោកមានការរាំងស្ទះ ក្នុងនោះកម្ពុជា ក៏ទទួលរងនូវផលប៉ះពាល់យ៉ាងខ្លាំងផងដែរ។ ។ ក្នុងអំឡុងពេលនេះ បើគ្រួសារប្រជាពលរដ្ឋណាមួយ ជួបបញ្ហាលំបាកដោយខ្វះខាតស្បៀងអាហារក្នុងជីវភាពប្រចាំថ្ងៃ សូមរាយការណ៍ទៅអាជ្ញាធរមូលដ្ឋាន ដើម្បីពួកគាត់ជួយសម្រួល និងដោះស្រាយជូនគ្រួសាររងគ្រោះ បានទាន់ពេលវេលា។
បន្ទាប់មានប្រសាសន៍សំណេះសំណាលរបស់ ក្រុមការងារថ្នាក់កណ្តាលចុះជួយស្រុកបន្ទាយស្រី ក្រុមការងារបានចែកជូននូវអំណោយ ជាគ្រឿងឧបភោគបរិភោគ ជូនក្នុងមួយគ្រួសារ អង្ករ ១០គីឡូក្រាម ទឹកត្រី ០១យួរ និងទឹកស៊ីអ៊ីវ ០១យួរ។ ជាមួយនោះ ឯកឧត្តមប្រធាន ក៏បាននាំយកទេយ្យវត្ថុមួយចំនួន រួមនិងបច្ច័យ ប្រគេនដល់ព្រះសង្ឃគង់នៅវត្តបឋិសត្ថារាមរង្សី ហៅវត្តព្រះដាក់ផងដែរ។
អត្ថបទ និង រូបថត ៖ មន្ទីរព័ត៌មានខេត្តសៀមរាប
កែសម្រួលអត្ថបទ ៖ សេង ផល្លី
