នៅព្រឹកថ្ងៃទី១៥ ខែមិថុនា ឆ្នាំ២០២០ នៅទីស្នាក់ការសាខាកាកបាទក្រហមកម្ពុជា ខេត្តសៀមរាប លោក ស៊ុ សំអន នាយកសាខា តំណាងឯកឧត្តម ទៀ សីហា ប្រធានគណៈកម្មាធិការសាខា បានជួបសំណេះសំណាល និងទទួលថវិកា៦,១០០,៥០០(ប្រាំមួយលានមួយសែនប្រាំរយ)រៀល ដើម្បីអបអរខួបលើកទី១៥៧ នៃទិវាពិភពលោកកាកបាទក្រហម អឌ្ឍចន្ទក្រហម ឆ្នាំ២០២០ ពីលោក ធិននី វិធូ ប្រធានគណៈកម្មាធិការអនុសាខាកាកបាទក្រហមកម្ពុជា ស្រុកវ៉ារិន ។
ក្នុងឱកាសនោះ លោក ធិននី វិធូ បញ្ជាក់ថា ថវិកាដែលប្រគល់ជូនសាខាកាកបាទក្រហមកម្ពុជា ខេត្តសៀមរាប នាពេលនេះ គឺជាទឹកចិត្តសប្បុរសរបស់មន្ត្រី នៃរដ្ឋបាលស្រុកវ៉ារិន និងសប្បុរសជនក្នុងស្រុកស្រុកវ៉ារិន ក្នុងការរួមចំណែកជាមួយសកម្មភាពមនុស្សធម៌របស់កាកបាទក្រហមកម្ពុជា។
លោកនាយកសាខាកាកបាទក្រហមកម្ពុជា ខេត្តសៀមរាប បានថ្លែងអំណរគុណយ៉ាងជ្រាលជ្រៅចំពោះទឹកចិត្តដ៏សប្បុរសធម៌របស់ មន្ត្រី នៃរដ្ឋបាលស្រុក និងសប្បុរសជន ក្នុងស្រុកវ៉ារិន ក្នុងការគិតគូរពីកិច្ចការសង្គម និងចូលរួមជាមួយកាកបាទក្រហមកម្ពុជា ដើម្បីជួយដល់ប្រជាពលរដ្ឋ ដែលកំពុងជួបនូវការលំបាកទីទ័លក្រ។
លោកនាយកសាខា មានប្រសាសន៍បន្ថែមថា ចំពោះថវិកាមនុស្សធម៌នេះ នឹងចូលរួមជួយដល់ប្រជាពលរដ្ឋនៅទូទាំងខេត្ត ដោយមិនប្រកាន់ ពូជសាសន៍ ពណ៌សម្បុរ និងនិន្នាការនយោបាយណាមួយឡើយ ស្របតាមគោលការណ៍គ្រឹះទាំង៧ប្រការរបស់ចលនាអន្តរជាតិកាកបាទក្រហម អឌ្ឍចន្ទក្រហម។
កែសម្រួលអត្ថបទ ៖ សេង ផល្លី
