នាព្រឹកថ្ងៃទី១៥ ខែមិថុនា ឆ្នាំ២០២០ ធនាគារ ជីប ម៉ុង ខមមើសល បានបើកសម្ពោធសាខាទី១០របស់ខ្លួន ក្នុងខេត្តសៀមរាប ដើម្បីចូលរួមពង្រឹងទំនុកចិត្តវិនិយោគិនក្នុងខេត្ត និងដំណោះស្រាយហិរញ្ញវត្ថុ អំឡុងពេលនេះវិបត្តិជំងឺកូវីដ១៩ ក៏ដូចជាពេលអនាគត។
អញ្ជើញជាអធិបតីក្នុងពិធីសម្ពោធនោះ លោកជំទាវកិតិ្តបណ្ឌិត អ៊ុក ម៉ាលី អគ្គទេសាភិបាលរងធនាគារជាតិនៃកម្ពុជា លើកឡើថា ការដាក់ទុនវិនិយោគលើវិស័យធនាគារ-ហិរញ្ញវត្ថុរបស់ភាគទុនិក គឺជាការបង្ហាញនូវភាពទុកចិត្ត ការគាំទ្រនិងការចូលរួមកាន់តែសកម្មជាមួយគោលនយោបាយរបស់រាជរដ្ឋាភិបាល ក្រោមការដឹកនាំប្រកបដោយគតិបណ្ឌិត នៃសម្តេចតេជោ ហ៊ុន សែន នាយករដ្ឋមន្រ្តីនៃព្រះរាជាណាចក្រកម្ពុជា សំដៅជំរុញកំណើនសេដ្ឋកិច្ច និងអភិវឌ្ឍវិស័យដ៏មានសារសំខាន់នេះ ឲ្យកាន់តែរឹងមាំបន្ថែមទៀត ផ្អែកទៅលើយន្តការទីផ្សារ និងបរិយាប័ន្ន។
លោកជំទាវក៏បានបង្ហាញផងដែរ អំពីការយកចិត្តទុកដាក់របស់ធនាគាជាតិនៃកម្ពុជា ក្នុងការរួមចំណែកកាត់បន្ថយផលប៉ះពាល់សេដ្ឋកិច្ចនិងសង្គមជាតិនៅក្នុងវិបត្តិកូវីត១៩នេះ។ ក្នុងនាមជាអាជ្ញាធររូបិយវត្ថុ ដែលមានភារកិច្ចត្រួតពិនិត្យគ្រឹះស្ថានហិរញ្ញវត្ថុនិងធនាគារនោះ បានដាក់ចេញនូវវិធានការជាបន្តបន្ទាប់ ដូចជាការកំណត់អត្រាការប្រាក់ឥណទាន និងវិធីសាស្រ្តគណនាអត្រាការប្រាក់ រៀបចំឥណទានឡើងវិញ និងស្នើឲ្យធនាគារនិងគ្រឹះស្ថានមីក្រូហិរញ្ញវត្ថុ អនុគ្រោះ បន្ធូរបន្ថយសេវាផ្សេងៗដែលពាក់ព័ន្ធទៅនឹងឥណទាន ឬលើកលែងការផាកពិន័យផ្សេងៗចំពោះអតិថិជន។
ព័ត៌មានជាតិ ថ្មីៗ
ថ្លែងក្នុងឱកាសនោះ ឯកឧត្តម ទៀ សីហា អភិបាលខេត្តសៀមរាប បញ្ជាក់ថា ទោះបីខេត្តសៀមរាប ស្ថិតនៅក្នុងស្ថានភាពដ៏លំបាកនៃវិបត្តិជំងឺកូវីដ១៩ រដ្ឋបាលខេត្ត នៅតែបន្តខិតខំប្រឹងប្រែង ធ្វើយ៉ាងណា ស្ដារប្រព័ន្ធហេដ្ឋារចនាសម្ព័ន្ធក្នុងខេត្ត និងជំរុញវិស័យសេដ្ឋកិច្ចសំខាន់ៗ រួមមាន វិស័យកសិកម្ម និងទេសចរណ៍ ដើម្បីទាក់ទាញអ្នកវិនិយោគ និងភ្ញៀវទេសចរ មកកាន់ខេត្តទេសចរណ៍ វប្បធម៌ ប្រវត្តិសាស្ត្រ និងធម្មជាតិមួយនេះ។
លោកឧកញ៉ា លាង ឃុន ភាគទុនិកនៃក្រុមហ៊ុន ជីប ម៉ុង ខមមើសល នៅក្នុងពិធីសម្ភោធនោះ បង្ហាញថា ធនាគារ ជីបម៉ុង មានចក្ខុវិស័យនិងយុទ្ធសាស្រ្តច្បាស់លាស់យូរអង្វែង។ ទិសដៅជាចម្បងរបស់ធនាគារនេះ គឺការបង្កើតធនាគារ ឌីជីថល ធំជាងគេនៅកម្ពុជា ដោយការនាំយកបច្ចេកវិទ្យាទំនើបចុងក្រោយជូនអតិថិជន ព្រមទាំងបង្កើតផលិតផលនិងសេវាថ្មីៗ ដែលអតិថិជនមានតម្រូវការ។ យុទ្ធសាស្រ្តនេះ ដើរស្របជាមួយនឹងចក្ខុវិស័យរបស់រាជរដ្ឋាភិបាល ក្នុងការកសាងនិងអភិវឌ្ឍហេដ្ឋរចនាសម្ព័ន្ធឌីជីថល និងបច្ចេកវិទ្យាទូរគមនាគមន៍និងព័ត៌មានវិទ្យា ក្នុងគោលដៅត្រៀមខ្លួនជំរុញឲ្យសេដ្ឋកិច្ចកម្ពុជា ក្លាយជាសេដ្ឋកិច្ចឌីជីថល ក្នុងពេលអនាគតដ៏ខ្លីខាងមុខនេះ។
គួរជម្រាបថា គិតត្រឹមខែមេសា ឆ្នាំ២០២០នេះ វិស័យធនាគារនៅកម្ពុជា មាន ធនាគារពាណិជ្ជចំនួន៥១ ធនាគារឯកទេស១៤ គ្រឹះស្ថានមីក្រូហិរញ្ញវត្ថុទទួលប្រាក់បញ្ញើមានចំនួន៦ គ្រឹះស្ថានហិរញ្ញវត្ថុមិនទទួលប្រាក់បញ្ញើចំនួន៧៦ ក្រុមហ៊ុនប្រតិសន្យាហិរញ្ញវត្ថុចំនួន១៥ ក្រុមហ៊ុនផ្តល់សេវាទូទាត់សងប្រាក់មានចំនួន១២៤ គ្រឹះស្ថានឥណទានជនបទ ២៤៦ និងតូបប្តូរប្រាក់មានចំនួនជាង៣ពាន់តូបនៅក្នុងទូទាំងប្រទេស សារុបទំហំទ្រព្យសកម្មមានប្រមាណជាង ៥២ពាន់លានដុល្លាអាមេរិក។
អត្ថបទ និង រូបថត ៖ ងិន គឹមឡេង និង ស៊ាន សុផាត
កែសម្រួលអត្ថបទ ៖ សេង ផល្លី
