អាជ្ញាធរស្រុកប្រាសាទបាគង បានសហការជាមួយអាជ្ញាធរជាតិអប្សរា សម្រេចដាក់ម៉ាស៊ីនបូមយកភក់ចេញពីកសិន្ធុទឹកនៃប្រាសាទបាគង ដើម្បីជួយសង្គ្រោះត្រីនៅសេសសល់ ក្រោយពីពួកវាបានងាប់ជាង១០ក្បាលនៅក្នុងកសិន្ធុនោះ ដោយសារខ្វះទឹកកាលពីថ្ងៃទី០៨ ខែមិថុនា ឆ្នាំ២០២០។
លោក សូ ប្លាតុង អភិបាលស្រុកប្រាសាទបាគង ខេត្តសៀមរាប បានឱ្យដឹងនៅរសៀលថ្ងៃទី១១ ខែមិថុនាម្សិលមិញថា អាជ្ញាធរបានសម្រេចចិត្ដដាក់ម៉ាស៊ីនបូបយកភក់ចេញនេះ ក្រោយពេលពួកគាត់ប្រើប្រាស់រថយន្ដដឹកទឹកដាក់ចូលកសិន្ធុនោះអស់ជាច្រើនគ្រឿងដើម្បីសង្គ្រោះត្រីដែលនៅសល់ ប៉ុន្ដែមិនអាចធ្វើអោយទឹកកើនច្រើនបានដោយសារភក់ និងភើកច្រើន ទើបអាជ្ញាធរទាំងពីសម្រេចប្រើម៉ាស៊ីនបូបដីភក់ចេញបន្ថែម ដើម្បីអោយទឹកហូរចូលកសិន្ធុវិញ ទើបសង្ឃឹមត្រីធំៗដែលសេសសល់ អាចមានជីវិតរស់នៅ។ រថយន្ដដឹកទឹកដាក់កសិន្ធុនេះ មានរថយន្ដនគបាលស្រុកប្រាសាទបាគង និងរថយន្ដដឹកទឹករបស់អាជ្ញាធរជាតិអប្សរា។ លោកបានបន្ដថា ការបូបភក់ចេញនោះមានការលំបាកដោយសារភក់ និងពើកជ្រៅ ប៉ុន្ដែអាជ្ញាធរទាំងពីរត្រូវសង្គ្រោះត្រីអោយបានជោគជ័យ ដែលអាចប្រើពេលមួយល្ងាចទល់យប់។ លោកថា ត្រីនៅក្នុងកសិន្ធុមានច្រើនទើបពួកគាត់ខិតខំរកវិធីសាស្ដ្រដើម្បីសង្គ្រោះត្រីនោះ។
អ្នកនាំពាក្យអាជ្ញាធរជាតិអប្សរា លោក ឡុង កុសល បានអោយដឹងថា ស្ថានភាពបច្ចុប្បន្ននៃទឹកក្នុងកសិន្ធុប្រាសាទបាគងមានសភាពរីងហួតខ្លាំង និងមាននៅសល់ទឹកតិចតួច ព្រោះតែដើមរដូវវស្សាកន្លងមកពុំមានភ្លៀងធ្លាក់ច្រើន។ មូលហេតុចម្បងមួយទៀតនោះព្រោះកសិន្ធុទឹកប្រាសាទបាគងមានទំនាក់ទំនងតែជាមួយនឹងស្រទាប់ទឹកក្រោមដី ហើយក៏ពុំមានភ្ជាប់ទំនាក់ទំនងដោយផ្ទាល់ជាមួយស្ទឹងណាទៀតដែរ។លោក ឡុង កុសល បានបង្ហាញដែរថា ដើម្បីដោះស្រាយបញ្ហានេះ នៅថ្ងៃអនាគត់អាជ្ញាធរជាតិអប្សរាមានគោលដៅស្នើសុំទៅរដ្ឋាភិបាលធ្វើការអភិវឌ្ឍន៍បារាយណ៍ប្រាសាទលលៃឡើងវិញ ដើម្បីអាចស្តុបទឹកបានច្រើន និងអាចជួយធ្វើឱ្យកសិន្ធុប្រាសាទបាគងនេះឈប់រីងបន្តទៀត ព្រោះតែបារាយណ៍ប្រាសាទលលៃនេះមានប្រព័ន្ធភ្ជាប់គ្នាជាមួយកសិន្ធុប្រាសាទបាគង។
បើតាមលោក សូរ ប្លាតុង អភិបាលស្រុកប្រាសាទបាគង បានអោយដឹងថា អាជ្ញាធរបានប្រើប្រាស់វិធានការចំនួន៣រួចមកហើយ គឺទី១សមត្ថកិច្ចបានយករថយន្តដឹកទឹកពីក្រៅមកបញ្ចូលក្នុងកសិន្ធុ ទី២ការបុកអណ្តូងទឹកដើម្បីបូមបញ្ជូលទៅក្នុងកសិន្ធុនេះ និងទី៣កម្លាំងប្រជាការពារ កាយភក់ចេញ ដើម្បីឱ្យជ្រៅបន្តិច ។ បន្ទាប់ពីអាជ្ញាធរសិក្សាឃើញថា នៅខាងក្រោមពើកដែលរលួយមានទឹកដក់នៅច្រើន ដូច្នេះបើបូមយកភក់ដែលជាកំទេច ពើករលួយចេញ ទឹកនិងមានច្រើនអាចឱ្យត្រីបន្តរស់នៅបាន។សូមជម្រាបថា ចាប់ពីល្ងាចថ្ងៃទី០៨ ខែមិថុនា ឆ្នាំ២០២០នេះ ត្រីដែលងាប់នៅក្នុងកសិន្ធុប្រាសាទបាគងនោះមានចំនួន១៣ក្បាល ខណៈដែល៤ក្បាលទៀតបានដឹកយកទៅដាក់ក្នុងស្រះទឹកវត្ដផ្សេង និងនៅសេសសល់អាជ្ញាធរកំពុងជួយសង្គ្រោះដោយប្រើម៉ាស៊ីនបូបភក់ចេញនេះ៕
អត្ថបទ និងរូបភាព៖ បូ សាវី
