នាព្រឹកថ្ងៃទី១១ ខែ មិថុនា ឆ្នាំ២០២០នេះ នៅសាលប្រជុំសាលាស្រុកស្រីស្នំ មានរៀបចំកិច្ចប្រជុំពិគ្រោះយោបល់លើកទី១ ក្នុងការបង្កើតរមណីយដ្ឋានក្នុងស្រុក និងផ្សារណាត់ ដើម្បីទាក់ទាញភ្ញៀវទេសចរ ខណៈស្រុកមួយនេះ មានតំបន់ប្រកបដោយសក្ដានុពលទេសចរណ៍ជាច្រើនកន្លែង។
មានប្រសាសន៍ក្នុងកិច្ចប្រជុំនោះ លោក នាក់ ណេរ៉ុន អភិបាលរងខេត្ត បង្ហាញថា ដោយមានការយកចិត្តទុកដាក់ ពីឯកឧត្តម ទៀ សីហា អភិបាលខេត្តសៀមរាប ឯកឧត្តម តែងតែបានក្រើនរំលឹក និងជំរុញឲ្យបណ្ដាបណ្ដាស្រុកនានា ធ្វើការបំផុសការផ្សព្វផ្សាយ ក៏ដូចជាសេវាកម្មទេសចរណ៍បន្ថែមទៀត ដើម្បីធ្វើឲ្យប្រជាពលរដ្ឋនៅក្នុងមូលដ្ឋាន អាចទទួលបានប្រាក់ចំណូលបន្ថែម ក្រៅពីការប្រកបរបរកសិកម្ម។
តាមការបញ្ជាក់ពីលោកអភិបាលរងខេត្ត កិច្ចប្រជុំនាពេលនេះ គឺដើម្បីសិក្សា និងប្រមូលធាតុចូលសំខាន់ៗ ពុំមែនជាការសម្រេចណាមួយក្នុងការបង្កើតគម្រោងនេះនៅឡើយទេ។ ការពិភាក្សានេះដែរ បានបង្ហាញពីការយកចិត្តទុកដាក់របស់អាជ្ញាធរខេត្ត ជុំវិញផលប៉ះពាល់នានា និងការអភិវឌ្ឍប្រកបដោយចីរភាព សម្រាប់ប្រជាពលរដ្ឋនៅតាមមូលដ្ឋាន នាពេលអនាគត។
ព័ត៌មានជាតិ ថ្មីៗ
តាមការលើកឡើង របស់លោក ហ៊ន់ ឫទ្ធិ អភិបាលស្រុកស្រីស្នំ បង្ហាញថា បច្ចុប្បន្នស្រុកបានវាយតម្លៃតំបន់ដែលមានសក្ដានុពលចំនួន១៣កន្លែង រួមនិងការបង្កើតផ្សារណាត់មួយកន្លែងផងដែរ។
សូមជម្រាបថា គម្រោងផ្សារណាត់ នឹងក្លាយជាទីផ្សារប្រមូលនូវកសិផល ត្រីសាច់ ធម្មជាតិ ដែលផលិតបានដោយប្រជាពលរដ្ឋក្នុងមូលដ្ឋាន។ ផ្សារណាត់នេះដែរ គ្រោងនឹងបង្កើតនៅតាមបណ្ដាយផ្លូវជាតិលេខ៦៨ ក្នុងស្រុកស្រីស្នំ ប្រសិនបើមានសេចក្ដីសម្រេចពីរដ្ឋបាលខេត្តសៀមរាប។ ក្នុងការបង្កើតផ្សារណាត់ ក្នុងភូមិសាស្ត្រផ្លូវជាតិលេខ៦៨ បានផ្ដល់ភាពងាយស្រួល ដល់អ្នកដំណើរក្នុងស្រុកចុះទស្សនា ឬទិញផលិតផលធម្មជាតិ ខណៈដំណើរទៅកាន់ ច្រកទ្វារអន្តរជាតិអូរស្មាច់ ខេត្តឧត្តរមានជ័យ និងត្រឡប់មកក្រុងសៀមរាបវិញ ។
អត្ថបទ និង រូបថត ៖ ស៊ាន សុផាត
កែសម្រួលអត្ថបទ ៖ សេង ផល្លី
