នាព្រឹកថ្ងៃទី១០ ខែមិថុនា ឆ្នាំ២០២០ នៅសាលាខេត្តសៀមរាប មានរៀបចំ កិច្ចប្រជុំសាមញ្ញលើកទី១៣ របស់ក្រុមប្រឹក្សាខេត្តសៀមរាប អាណត្តិទី៣ ក្រោមអធិបតីភាព ឯកឧត្តម អ៊ឹង ហឿន ប្រធានក្រុមប្រឹក្សាខេត្ត, ឯកឧត្តម ទៀ សីហា អភិបាល នៃគណ:អភិបាលខេត្តសៀមរាប ព្រមទាំងវត្តមានឯកឧត្តម លោកជំទាវសមាជិក សមាជិកាក្រុមប្រឹក្សាខេត្ត អភិបាលរងខេត្ត តំណាងអាជ្ញាធរជាតិអប្សរា នាយក នាយករងរដ្ឋបាលសាលាខេត្ត នាយកទីចាត់ការចំណុះសាលាខេត្ត មេបញ្ជាការ មេបញ្ជាការងកងកម្លាំងប្រដាប់អាវុធ អភិបាលក្រុងសៀមរាប ប្រធាន អនុប្រធានមន្ទីរ អង្គភាព មន្ត្រីសាលាខេត្ត និងអ្នកពាក់ព័ន្ធប្រមាណជាង ៥០នាក់ បានចូលរួម ។
មានប្រសាសន៍បើកអង្គប្រជុំនេះ ឯកឧត្តម អ៊ឹង ហឿន ប្រធានក្រុមប្រឹក្សាខេត្ត លើកឡើងថា អំឡុងពេលវិបត្តិនៃជំងឺកូវីដ១៩នេះ កិច្ចប្រជុំពុំអាចអញ្ជើញគ្រប់សមាសភាពជុំវិញខេត្ត ចូលរួមលើសពីចំនួនកំណត់នោះឡើយ ដែលទាំងនេះជាការគោរពតាមសេចក្ដីណែនាំរបស់រាជរដ្ឋាភិបាល។
នៅក្ចុងកិច្ចប្រជុំនេះ បានលើកយករបៀបវារៈចំនួន៩ មកធ្វើការពិនិត្យ ពិភាក្សា និងតាមដាន ដែលក្រុមការងារ នៃរដ្ឋបាលខេត្ត រដ្ឋបាលក្រុង-ស្រុក មន្ទីរ អង្គភាព ស្ថាប័នពាក់ព័ន្ធទាំងអស់ក្នុងខេត្ត បានអនុវត្តន៍ការងារកន្លងមក ក្នុងនោះមាន៖
១- ពិនិត្យ និងអនុម័តលើសេចក្តីព្រាងកំណត់ហេតុកិច្ចប្រជុំសាមញ្ញលើកទី១២ របស់ក្រុមប្រឹក្សាខេត្ត កាលពីថ្ងៃទី០៧ ខែឧសភា ឆ្នាំ២០២០ ។
២- ពិនិត្យ ពិភាក្សា និងអនុម័តលើសេចក្តីព្រាងរបាយការណ៍ប្រចាំខែឧសភា ឆ្នាំ២០២០ ស្ដីពីការអនុវត្តការងារ របស់រដ្ឋបាលខេត្តសៀមរាប ។
៣- ពិនិត្យ ពិភាក្សា និងអនុម័តលើសេចក្តីព្រាងប្រតិទិនកិច្ចប្រជុំសាមញ្ញរបស់ក្រុមប្រឹក្សាខេត្តសម្រាប់រយ:ពេល ១២ខែ (ខែកក្កដាឆ្នាំ២០២០ ដល់ខែមិថុនាឆ្នាំ២០២១ ) ។
៤ – ពិនិត្យ ពិភាក្សា និងអនុម័តលើរបាយការណ៍ ស្ដីពីវឌ្ឍនភាពបញ្ហាប្រឈម និងសំណូមពរ របស់ក្រុមប្រឹក្សាខេត្តអាណត្តិទី ៣ ។
៥- ពិនិត្យ ពិភាក្សា និងអនុម័តលើប្រតិទិនរៀបចំ និងកសាងកម្មវិធីវិនិយោគបីឆ្នាំរំកិលឆ្នាំ ( ២០២១- ២០២៣ ) របស់រដ្ឋបាលខេត្តសៀមរាប ។
៦ – ពិនិត្យ ពិភាក្សា និងអនុម័តលើការកែសម្រួលសមាសភាពគណ:កម្មាធិការសម្របសម្រួលបច្ចេកទេស របស់ក្រុមប្រឹក្សាខេត្ត ។
៧ – ពិនិត្យ ពិភាក្សា និងអនុម័តលើការកែសម្រួលសមាសភាពក្រុមការងារកសាងផែនការអភិវឌ្ឍន៍រយ:ពេលប្រាំឆ្នាំ និងកម្មវិធីវិនិយោគបីឆ្នាំរំកិល របស់រដ្ឋបាលខេត្តសៀមរាប ។
៨ – ពិនិត្យ ពិភាក្សា និងអនុម័តលើការកែសម្រួលគណ:កម្មការពិគ្រោះយោបល់កិច្ចការស្ត្រី និងកុមារ របស់ក្រុមប្រឹក្សាខេត្ត
៩ – បញ្ហាផ្សេងៗ ។
បន្ទាប់ពី អង្គប្រជុំបានលើកយករបៀបវារ:នីមួយៗ បានលើកយកបញ្ហាប្រឈម និងសំណូមពរ មកពិភាក្សាយ៉ាងផុសផុលមក។ទន្ទឹមនោះ ឯកឧត្តម ទៀ សីហា អភិបាលខេត្ត បានណែនាំដល់ថ្នាក់ដឹកនាំ រដ្ឋបាលខេត្ត រដ្ឋបាលក្រុង-ស្រុក មន្ទីរ អង្គភាព ស្ថាប័នពាក់ព័ន្ធទាំងអស់ក្នុងខេត្ត ត្រូវប្រមូលយកនូវបញ្ហាប្រឈម ដែលធ្វើឲ្យប៉ះពាល់ដល់គម្រោងអភិវឌ្ឍនានារបស់ខេត្ត ជាពិសេសប៉ះពាល់ដល់ប្រជាពលរដ្ឋ និងត្រូវបន្តពង្រឹងចំណុចខ្លាំងរបស់អង្គភាពនីមួយ ដើម្បីធ្វើឲ្យការបំពេញការងាររបស់ខ្លួន ប្រព្រឹត្តិទៅប្រកបដោយប្រសិទ្ធភាព។
អត្ថបទ និង រូបថត ៖ មន្ទីរព័ត៌មានខេត្តសៀមរាប
