នៅថ្ងៃទី១០ ខែមិថុនា ឆ្នាំ២០២០ នៅទីស្នាក់ការសាខាកាកបាទក្រហមកម្ពុជា ខេត្តសៀមរាប លោក ស៊ុ សំអន នាយកសាខា តំណាងឯកឧត្តម ទៀ សីហា ប្រធានគណៈកម្មាធិការសាខា ទទួលថវិកាសប្បុរសធម៌ចំនួន២លានរៀល ពីកងឯកភាពកម្ចាត់មីនទី៤ ខេត្តសៀមរាប ក្នុងឱកាសអបអរខួបលើកទី១៥៧ ទិវាពិភពលោកកាកបាទក្រហម អឌ្ឍចន្ទក្រហម ឆ្នាំ២០២០។
ក្នុងឱកាសនោះ លោក អ៊ាន សុធា ប្រធានកងឯកភាពកំចាត់មីនទី៤ ខេត្តសៀមរាប បានឱ្យដឹងថា ថវិកាដែលប្រគល់ជូនសាខាកាកបាទក្រហមកម្ពុជា ខេត្តសៀមរាប នាពេលនេះ គឺជាការរួមចំណែក ជាមួយសកម្មភាពមនុស្សធម៌របស់កាកបាទក្រហមកម្ពុជា ដែលមន្ត្រី បុគ្គលិកនៃកងឯកភាពកម្ចាត់មីនទី៤ ខេត្តសៀមរាប បានបរិច្ចាគដោយសទ្ធាជ្រះថ្លា ដែលជាវប្បធម៌នៃការចែករំលែកជួយគ្នា ទោះតិចក្ដីច្រើនក្ដី តែជាទឹកជួយគ្នាក្នុងគ្រាលំបាក ។
លោក ស៊ុ សំអន នាយកសាខាកាកបាទក្រហមកម្ពុជា ខេត្តសៀមរាប បានថ្លែងអំណរគុណយ៉ាងជ្រាលជ្រៅចំពោះទឹកចិត្តដ៏សប្បុរសធម៌របស់ មន្ត្រី បុគ្គលិក ពិសេសលោកប្រធានកងឯកភាពកម្ចាត់មីនទី៤ ខេត្តសៀមរាប ដែលបានយកចិត្តទុកដាក់ចូលរួមចំណែកក្នុងសកម្មភាពមនុស្សធម៌ ជាមួយកាកបាទក្រហមកម្ពុជា ដែលមានសម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ជាប្រធាន ដើម្បីជួយដល់បងប្អូនប្រជាពលរដ្ឋរងគ្រោះ និងងាយរងគ្រោះបំផុត។
ព័ត៌មានជាតិ ថ្មីៗ
លោកនាយកសាខា មានប្រសាសន៍បន្ថែមថា ចំពោះថវិកាមនុស្សធម៌នេះ នឹងចូលរួមជួយដល់ប្រជាពលរដ្ឋនៅទូទាំងខេត្ត ដោយមិនប្រកាន់ ពូជសាសន៍ ពណ៌សម្បុរ និងនិន្នាការនយោបាយណាមួយឡើយ ស្របតាមគោលការណ៍គ្រឹះទាំង៧ប្រការរបស់ចលនាអន្តរជាតិកាកបាទក្រហម អឌ្ឍចន្ទក្រហម។
កែសម្រួលអត្ថបទ ៖ សេង ផល្លី
