នៅព្រឹកថ្ងៃទី១០ ខែមិថុនា ឆ្នាំ២០២០ លោកស្រី យូ សុភា អភិបាលរងខេត្តសៀមរាប និងជាលេខាធិការដ្ឋាននៃគណៈកម្មាធិការប្រយុទ្ធប្រឆាំងអំពើជួញដូរមនុស្ស (គ.ខ.ប.ជ) ខេត្តសៀមរាប សហការជាមួយនឹងអង្គការសកម្មភាពដើម្បីកុមារ (APLE) បានជួបសំណេះសំណាល និងចែកអំណោយដល់ គ្រួសារកុមាររងគ្រោះ និងងាយរងគ្រោះដោយការរំលោភ និងកេងប្រវ័ញ្ចផ្លូវភេទចំនួន ៦០គ្រួសារ មកពី សង្កាត់សៀមរាប សង្កាត់គោកចក និងសង្កាត់ស្លរក្រាម នៃក្រុងសៀមរាប។
លោកស្រីអភិបាលរងខេត្ត បានអំពាវនាវដល់ អាណាព្យាបាល និងអាជ្ញាធរមូលដ្ឋានទាំងអស់ ត្រូវយកចិត្តទុកដាក់ខ្ពស់បន្ថែមទៀត លើការប្រយុទ្ធប្រឆាំងអំពើជួញដូរមនុស្ស ដែលហេតុបង្កឲ្យមានការកេងប្រវ័ញ្ចកម្លាំងពលកម្ម និងផ្លូវភេទ ការនាំឆ្លងដែនខុសច្បាប់ និងការរំលោភបំពាននានា លើកុមារ។ ក្នុងនោះ ដើម្បីអនុវត្តន៍សកម្មភាពទាំងនេះឲ្យទទួលបានប្រសិទ្ធភាព ទាំងក្រុមការងារថ្នាក់ក្រុង-ស្រុក និងឃុំ-សង្កាត់ ត្រូវរៀបចំផែនការសកម្មភាព គ្រោងកញ្ចប់ថវិកាលើការអនុវត្តសកម្មភាពប្រយុទ្ធប្រឆាំងអំពើជួញដូរមនុស្សឲ្យបានសមស្រប ឆ្លើយតបទៅនឹងបញ្ហា និងតម្រូវក្នុងមូលដ្ឋានរបស់ខ្លួន ។
ជាមួយនោះ លោកស្រីអភិបាលរងខេត្ត ក៏បានលើកយកនូវបញ្ហាអ្នកសុំទានក្នុងក្រុងសៀមរាប ដើម្បីឲ្យអាជ្ញាធរធ្វើការដោះស្រាយជាបន្ទាន់ផងដែរ។ ក្នុងនោះ មានមានកុមារមួយចំនួន បានចូលរួមសកម្មភាពទាំងនោះ ដែលវាបានរំលោភដល់សិទ្ធកុមារ ដូចជាធ្វើការហួសកម្លាំង មិនបានចូលសាលា និងអាចឈានទៅដល់អំពើរជួញដូរផ្លូវភេទផងដែរ។
ព័ត៌មានជាតិ ថ្មីៗ
ឆ្លៀតក្នុងឱកាសនោះ លោកស្រីក៏បាន អំពាវនាវដល់ប្រជាពលរដ្ឋខ្មែរទាំងអស់ ជាពិសេសក្នុងខេត្តសៀមរាប សូមមានការអត់ធ្មត់ ចៀសវាងការធ្វើចំណាកស្រុកទៅធ្វើការនៅបរទេស តាមការលួងលោមរបស់មេខ្យល ខណៈនៅបណ្ដាប្រទេសជិតខាង និងពិភពលោក នៅពុំទាន់បង្ហាញពីការទប់ស្កាត់នៃការចម្លងទាំងស្រុងនៃជំងឺកូវីដ១៩ឡើយ។ សូមប្រជាពលរដ្ឋទាំងអស់ រង់ចាំសេចក្ដីជូនដំណឹងរបស់រាជរដ្ឋាភិបាលកម្ពុជាជាផ្លូវការអំពីការបើកព្រំដែនរវាងប្រទេសជិតខាង មុននឹងសម្រេចចិត្តធ្វើចំណាកស្រុក។
សូមជម្រាបថា អំណោយដែលបានប្រគល់ជូន នាពេលនោះ ក្នុងមួយគ្រួសារទទួលបាន អង្ករ ២៥គីឡូក្រាម ,ត្រីខ ១យួរ ,ទឹកត្រី ១យួរ ,ទឹកស៊ីអ៊ីវ ១យួរ ,អំបិល ១កញ្ចប់ ,សាប៊ូដុសខ្លួន ១ប្រអប់ ,សាប៊ូម្សៅ ១កញ្ចប់ ,ប្រេងឆា ១ដប ,អាកុលលាងដៃ ២ដប ,ម៉ាសក្រណាត់ ១ដុំ និងថវិការចំនួន ៤ម៉ឺនរៀល ៕
អត្ថបទ និង រូបថត ៖ អ៊ុន ណារាជ្យ
កែសម្រួលអត្ថបទ ៖ សេង ផល្លី
