ក្នុងឱកាសជួបសំណេះសំណាលជាមួយមន្ត្រីនៃលេខាធិការរដ្ឋានរៀបចំការបោះឆ្នោតខេត្តសៀមរាប នៅទីស្នាក់ការលេខាធិការរដ្ឋានខេត្តសៀមរាប កាលពីរសៀលថ្ងៃទី០៨ ខែមិថុនា ឆ្នាំ២០២០ម្សិលមិញនេះ ឯកឧត្តម ស៊ិក ប៊ុនហុក ប្រធានគណៈកម្មាធិការជាតិរៀបចំការបោះឆ្នោត បានធ្វើក្រើនរំលឹកដល់មន្ត្រីបោះឆ្នោតក្នុងខេត្តសៀមរាប ត្រូវបន្តអនុវត្តនូវតួនាទីរបស់ខ្លួន ដោយគោរពឱ្យបានខ្ជាប់ខ្ជួននូវច្បាប់ បទបញ្ជា និងនីតិវិធី និងក្រមសីលធម៌សម្រាប់មន្ត្រីបោះឆ្នោតឲ្យល្អប្រសើរ ជាពិសេសត្រូវបង្កើននូវចំណេះដឹងបន្ថែមទៀត ដើម្បីអនុវត្តការងារឲ្យកាន់តែមានប្រសិទ្ធភាព លើផែនការសកម្មភាពការងាររបស់គណៈកម្មាធិការជាតិរៀបចំការបោះឆ្នោត ដូច្នេះសូមមន្ត្រីបោះឆ្នោតខេត្ត និងមន្រ្តីជាប់កិច្ចសន្យាទាំងអស់ ត្រូវទទួលយក និងអនុវត្តឲ្យខានតែបាននូវកំណែទម្រង់ការបោះឆ្នោតដែលនឹងត្រូវធ្វើតាមប្រព័ន្ធបច្ចេកវិទ្យាព័ត៌មាន ក្នុងន័យធានាឱ្យបាននូវប្រសិទ្ធភាពការងារបន្ថែមទៀត ដើម្បីឱ្យប្រជាពលរដ្ឋកាន់តែមានជំនឿទុកចិត្តកាន់តែខ្លាំងឡើងលើការបោះឆ្នោត ។
ឯកឧត្តម ស៊ិក ប៊ុនហុក មានប្រសាសន៍ទៀតថា បច្ចុប្បន្ននេះ មានការងារមួយចំនួនដែលគណៈកម្មាធិការជាតិរៀបចំការបោះឆ្នោត បាននឹងកំពុងធ្វើ និងបន្តធ្វើ រួមមាន ៖ កំណែទម្រង់ការបោះឆ្នោតនាពេលកន្លងមក ដែលធ្វើឱ្យការបោះឆ្នោតទទួលបានជោគជ័យនាំមកនូវសុខសន្តិភាព និងការអភិវឌ្ឍន៍ប្រទេសជាតិរហូតមកដល់បច្ចុប្បន្ន , ការបន្តធ្វើកំណែទម្រង់ការបោះឆ្នោត ដើម្បីត្រៀមលក្ខណៈសម្រាប់ការចុះឈ្មោះបោះឆ្នោត ការបោះឆ្នោតសកល នាឆ្នាំ២០២២ និងឆ្នាំ២០២៣ និង ការត្រៀមលក្ខណៈរបស់មន្ត្រីលេខាធិការ ។
គួររំលឹកថា តាមរបាយការណ៍របស់លេខាធិការរដ្ឋានរៀបចំការបោះឆ្នោតខេត្តសៀមរាប បានឲ្យដឹងថា នៅក្នុងឆ្នាំ២០១៩ នៅទូទាំងខេត្តសៀមរាប មានការិយាល័យបោះឆ្នោតសរុបចំនួន ១.៤៩៣ការិយាល័យ និង មានអ្នកបោះឆ្នោតដែលមានឈ្មោះក្នុងបញ្ជីបោះឆ្នោតសរុបចំនួន ៥៥៣.៧១៥នាក់ ខណៈដែលក្នុងអំឡុងពេលបោះឆ្នោតសកលឆ្នាំ២០១៨ មានការិយាល័យបោះឆ្នោតសរុបចំនួន ១.៤៧៣ការិយាល័យ , មានអ្នកបោះឆ្នោតដែលមានឈ្មោះក្នុងបញ្ជីបោះឆ្នោតសរុបចំនួន ៥៣៥.៥២១នាក់ និង អ្នកទៅបោះឆ្នោតសរុបចំនួន ៤២២.៦២៤ ស្មើនឹង៧៨,៩២ភាគរយ ៕
អត្ថបទ និង រូបថត ៖ លោក ស៊ាន សុផាត
កែសម្រួលអត្ថបទ ៖ លោក លីវ សាន្ត
