ស្របពេលដែលជំងឺកូវីដ-១៩ បាននឹងកំពុងរីករាលដាលនៅលើពិភពលោក ក៏ដូចជាប្រទេសកម្ពុជាផងនោះ អាជ្ញាធរជាតិអប្សរា បានសម្រេចលុបចោលកិច្ចប្រជុំគណ:កម្មាធិការអន្ដរជាតិសម្របសម្រួលកិច្ចគាំពារ និងអភិវឌ្ឍន៍តំបន់ប្រវត្តិសាស្ត្ររមណីយដ្ឋានអង្គរហៅកាត់ថា “អាយស៊ីស៊ី-អង្គរ ” ដោយសារជំងឺកូវីដ១៩។
គណ:កម្មាធិការអន្តរជាតិ សម្របសម្រួលកិច្ចគាំពារ និងអភិវឌ្ឍន៍តំបន់ប្រវត្តិសាស្ត្ររមណីយដ្ឋានអង្គរ ហៅកាត់ថា ” ICC Angkor ” កន្លងមកតែងតែបើកកិច្ចប្រជុំពីរដងក្នុងមួយឆ្នាំ ដែលធ្វើឡើង ក្នុងខែមិថុនា សម្រាប់កិច្ចបច្ចេកទេសម្តង និងខែធ្នូសម្រាប់កិច្ចប្រជុំពេញអង្គរម្តងទៀត ប៉ុន្ដែកិច្ចប្រជុំនេះ ត្រូវបានលុបចោលវិញដោយសារជំងឺកូវីដ១៩។
លោក ឡុង កុសល ប្រធាននាយកដ្ឋានផ្សព្វផ្សាយ និងជាអ្នកនាំពាក្យអាជ្ញាធរជាតិអប្សរា បានមានប្រសាសន៍ កាលពីល្ងាចថ្ងៃទី០៦ ខែមិថុនា ឆ្នាំ២០២០នេះ ថា សហប្រធានគណ:កម្មាធិការនេះគឺ ការិយាល័យអង្គការយូណេស្កូប្រចាំនីកម្ពុជា រួមទាំងថ្នាក់ដឹកនាំ និងអ្នកជំនាញអាជ្ញាធរជាតិអប្សរា បានចុះត្រួតពិនិត្យដំណើរការអភិរក្ស និងអភិវឌ្ឍន៍ប្រកបដោយចីរភាពនៅតាមការដ្ឋាននានា ក្នុងរមណីយដ្ឋានអង្គរ ចាប់ពីថ្ងៃទី៦ ដល់ទី១០ ខែមិថុនា ឆ្នាំ២០២០នេះ ។ ការចុះពិនិត្យនេះគឺធ្វើឡើងព្រោះតែកិច្ចប្រជុំបច្ចេកទេសរបស់គណ:កម្មាធិការនេះដែលគ្រោងនឹងប្រព្រឹត្តទៅក្នុងខែមិថុនាត្រូវបានខកខាន ។ ដោយឡែកអ្នកជំនាញចំពោះកិច្ចទាំងផ្នែកអភិរក្ស និងផ្នែកអភិវឌ្ឍន៍ប្រកបដោយចីរភាពពុំបានអញ្ជើញមកដោយផ្ទាល់ ដើម្បីពិនិត្យ និងតាមដានពីវឌ្ឍនភាព នៃការអនុវត្តការងារឡើយ។ លោកបានបន្ដថា ទោះបីស្ថិតក្នុងស្ថានភាពបែបនេះក៏ដោយ សហប្រធានបច្ចេកទេស នៃគណ:កម្មាធិការ អាយស៊ីស៊ី-អង្គរ បានធ្វើការប្តូរវេនគ្នាចុះមកត្រួតពិនិត្យកិច្ចការនេះ ក្នុងរមណីយដ្ឋានអង្គរ ដើម្បីតាមដានការអនុវត្តការងាររបស់ស្ថាប័នជាតិអន្តរជាតិ ថាបានអនុវត្តស្របតាមអនុសាសន៍ ដែលគណ:កម្មាធិការនេះបានផ្តល់ជូននាពេលមុនដែរឬទេ? ។
ព័ត៌មានជាតិ ថ្មីៗ
សូមជម្រាបថា កិច្ចប្រជុំអាយស៊ីស៊ី-អង្គរ ក៏ជាឱកាសមួយក្នុងការចែករំលែកចំណេះដឹងទាក់ទងនឹងគំហើញថ្មីៗ នៃកិច្ចការស្រាវជ្រាវ ការអភិរក្ស ជួសជុលបុរាណដ្ឋានក្នុងតំបន់អង្គរ និងបានធ្វើការវាយតម្លៃលើការងារនៅតាមការដ្ឋាន ។ មិនតែប៉ុណ្ណោះក៏ទទួលបានចំណេះដឹង បទពិសោធន៍ការងារពីកិច្ចសហប្រតិបត្តិការជាតិ-អន្តរជាតិ រួមទាំងបានផ្តល់ឱកាសឱ្យអ្នកជំនាញខ្មែរបានបង្ហាញសមត្ថភាព និងឡើងធ្វើបទបង្ហាញពីលទ្ធផលការងាររបស់ខ្លួនជាភាសាជាតិនិងអន្តរជាតិដល់អ្នកជំនាញការនៃកិច្ចប្រជុំផងដែរ៕
អត្ថបទ និងរូបភាព: លោកបូ សាវី
កែសម្រួលដោយ ៖លីវ សុខុន
