នៅព្រឹកថ្ងៃទី ០៣ ខែមិថុនា ឆ្នាំ២០២០ ឯកឧត្តម រដ្ឋមន្រ្តី ខៀវ កាញារីទ្ធ និង គណ:ប្រតិភូ ក្រសួងព័ត៌មាន បានអញ្ចើញទៅធ្វើទស្សនកិច្ចនៅ ស្ថានីយ៍ទូរទស្សន៍ PNN ដើម្បីពិនិត្យមើល សក្តានុពលនៃការផ្សាយរបស់ទូរទស្សន៍ឯកជនមួយនេះ ព្រមជាមួយការផ្សាយដោយប្រើប្រាស់ប្រព័ន្ធ Digital ដ៏ទំនើបៗ លំដាប់អន្តរជាតិនៅកម្ពុជា។
ថ្នាក់ដឹកនាំ ស្ថានីយទូរទស្សន៍ PNN បាននាំគណៈប្រតិភូ ទស្សនាទីតាំងសំខាន់ៗ នៅក្នុងស្ថានីយមានដូចជា បន្ទប់បច្ចេកទេសបំពាក់ដោយឧបករណ៍ទំនើបៗចុងក្រោយ បន្ទប់កាត់តសំឡេង បន្ទប់បញ្ចូលសំឡេង បន្ទប់ថតកម្មវិធី កន្លែងបញ្ចូលសំឡេងភាពយន្តបរទេស រថយន្តផ្សាយចល័ត រួមនិងទីតាំងសំខាន់ៗជាច្រើនទៀត។
តាមរយៈដំណើរទស្សនៈ កិច្ចនេះ ឯកឧត្តមរដ្ឋមន្ត្រីក្រសួងព័ត៌មាន និងគណៈប្រតិភូបានបង្ហាញការចាប់អារម្មណ៍ ចំពោះបច្ចេកវិទ្យាទំនើបស្តង់ដារអន្តរជាតិ និងទីតាំងដ៏ធំទូលាយរបស់ស្ថានីយ ក្រោមការវិនិយោគរបស់ក្រុមហ៊ុន LYP Group របស់អ្នកឧកញ៉ា លី យ៉ុងផាត់។
តាមការបញ្ជាក់របស់អ្នកគ្រប់គ្រងទូទៅ ទោះបីស្ថានីយទូរទស្សន៍មួយនេះ ទើបតែបង្កើតថ្មី ប៉ុន្តែបុគ្គលិកនៅទីនេះ ប្រមូលផ្តុំដោយអ្នកមានបទពិសោធន៍ច្រើនឆ្នាំ ក្នុងវិស័យសោតទស្សន៍ និងវិស័យសារព័ត៌មាន។ នាពេលកន្លងមក ស្ថានីយទូរទស្សន៍ PNN បាន ក្លាយជាកន្លែងទទួលស្វាគមន៍ដំណើរ ទស្សនកិច្ច ពីសំណាក់សិស្ស និស្សិត មន្ត្រីរាជការ ក្រុមហ៊ុនឯកជន រួមទាំងភ្ញៀវអន្តរជាតិជាបន្តបន្ទាប់។
តាមការបញ្ជាក់របស់លោក ប៉ែន បូណា និពន្ធនាយកព័ត៌មាននៃទូរទស្សន៍ PNN លើកឡើងថា ស្ថានីយ៍ទូរទស្សន៍បានបង្កើតឡើងមកដល់ពេលនេះមានរយៈពេលជិត ៥ ឆ្នាំហើយ ដោយបច្ចុប្បន្ន មានបុគ្គលិកកំពុងបំពេញការងារជាង ៣០០នាក់ ។ ស្ថានីយ៍ទូរទស្សន៍ PNN មានទីតាំងស្ថិតនៅភូមិ ព្រែកតារ័ត្ន សង្កាត់ ព្រែកតាសេក ខណ្ឌ ជ្រោយចង្វា រាជធានីភ្នំពេញ ដោយបានកសាងឡើងនៅលើផ្ទៃដីប្រមាណជាង ៥ ហិចតា បង្គោល អង់តែន មានកំពស់ ១៦០ ម៉ែត្រ កម្លាំងនៃការផ្សាយ ១០ គីឡូវ៉ាត់ ហើយស្ថានីយ៍ទូរទស្សន៍នេះ បានបំពាក់នូវបច្ចេកវិទ្យាទំនើបៗ ទាន់សម័យ ចុងក្រោយគេ ។ ក្នុងនោះ ស្ថានីយ៍ទូរទស្សន៍នេះ មានស្ទូតឌីយ៉ូថតធំៗចំនួន៣ ក្នុងចំណោម៥ មានរថយន្ត ចល័ត ១ គ្រឿង ដែលអាចបំពាក់កាមេរ៉ា ថតផ្សាយបានចំនួន ៣២ គ្រឿង និងមានភាពងាយស្រួលក្នុង ការថត នូវរាល់កម្មវិធីធំៗ រួមទាំងព្រឹត្តការណ៍កីឡាផ្សេងៗបានដោយងាយស្រួល។ វិសាលភាពនៃការផ្សព្វផ្សាយមានរហូតដល់ ៩៥ ភាគរយ គ្របដណ្ដបលើផ្ទៃប្រទេសកម្ពុជា និងមានគុណភាពរូបភាពច្បាស់ល្អ។
អត្ថបទ និងរូបភាព៖ ក្រសួងព័ត៌មាន
