កាលពីថ្ងៃទី១ ខែឧសភា ឆ្នាំ២០២០ ក្រុមការងារប្រចាំការច្រកអន្តរជាតិប៉ោយប៉ែត និងក្រុមការងារលេខាធិការដ្ឋាននៃគណៈកម្មាធិការប្រយុទ្ធប្រឆាំងអំពើជួញដូរមនុស្សខេត្តសៀមរាប បានទៅដល់ស្រុកម៉ាឡៃ ខេត្តបន្ទាយមានជ័យ ដើម្បីទទួលប្រជាពលរដ្ឋខេត្តសៀមរាបចំនួន ០៩នាក់ ក្នុងនោះស្រី ០៤នាក់ បន្ទាប់ពីមានការឃាត់ខ្លួនដោយ កម្លាំងទាហានសឹករងស្រុកម៉ាឡៃ និងនគរបាលការពារព្រំដែនគោកវរៈ ៨១៥។
ក្រោយទទួលបានបានព័ត៌មាន ពីការឃាត់ខ្លួនប្រជាពលរដ្ឋទាំង៩នាក់នេះ ឯកឧត្តម ទៀ សីហា អភិបាលខេត្តសៀមរាប បានចាត់លោកស្រី យូ សុភា អភិបាលរងខេត្ត ដឹកនាំក្រុមការងារប្រចាំការច្រកអន្តរជាតិប៉ោយប៉ែត និងក្រុមការងារលេខាធិការដ្ឋាននៃគណៈកម្មាធិការប្រយុទ្ធប្រឆាំងអំពើជួញដូរមនុស្សខេត្តសៀមរាប រួមនិងមន្ទីរអង្គភាពពាក់ព័ន្ធមួយចំនួន ធ្វើការសម្របសម្រួល និងនាំយកប្រជាពលរដ្ឋលួចឆ្លងដែនខុសច្បាប់ទាំងនោះ ត្រឡប់មកខេត្តសៀមរាបវិញ នៅល្ងាចថ្ងៃទី០១ ខែមិថុនា ឆ្នាំ២០២០។
តាមរយៈរបាយការណ៍លេខាធិការដ្ឋាននៃគណៈកម្មាធិការប្រយុទ្ធប្រឆាំងអំពើជួញដូរមនុស្សខេត្តសៀមរាប ប្រជាពលរដ្ឋទាំង៩នាក់នោះ រស់នៅក្នុងភូមិជំនុំរាជ្យ ឃុំស្រែខ្វាវ ស្រុកអង្គរជុំ ខេត្តសៀមរាប ត្រូវបានកម្លាំងទាហានសឹករងស្រុកម៉ាឡៃ និងនគរបាលការពារព្រំដែនគោកវរៈ ៨១៥ ឃាត់ខ្លួននៅចំណុចភូមិសង្កែ ឃុំបឹងបេង ស្រុកម៉ាឡៃ ខេត្តបន្ទាយមានជ័យ ខណៈពួកគេរង់ចាំមេខ្យល់មកទទួលចូលទឹកដីថៃ។
ព័ត៌មានជាតិ ថ្មីៗ
ក្នុងឱកាសទៅទទួលប្រជាពលរដ្ឋ ស្រុកម៉ាឡៃ ខេត្តបន្ទាយមានជ័យ លោកស្រី យូ សុភា អភិបាលរងខេត្តសៀមរាប បានថ្លែងអំណរគុណយ៉ាងជ្រាលជ្រៅ ចំពោះអាជ្ញាធរខេត្តបន្ទាយមានជ័យ ពិសេស ឯកឧត្តមអភិបាលខេត្ត អភិបាលស្រុកម៉ាឡៃ សមត្ថកិច្ចទាហានសឹករងស្រុកម៉ាឡៃ និងនគរបាលការពារព្រំដែនគោក វរៈ ៨១៥ ដែលជួយសម្បសម្រួលអន្តរាគមន៍សង្គ្រោះប្រជាពលរដ្ឋខេត្តសៀមរាប ពីការនាំឆ្លងដែនខុសច្បាប់។ ទន្ទឹមនោះ លោក យូ សុភា អភិបាលរងខេត្តសៀមរាប បានណែនាំដល់ប្រជាពលរដ្ឋទាំង៩នោះ ចាំបាច់ត្រូវបំពេញលក្ខខណ្ឌស្របច្បាប់ ដើម្បីទៅធ្វើការនៅបរទេស សូមកុំជឿតាមការលួងលោមរបស់មេខ្យល់ តែក្នុងកាលៈទេសៈនេះ សូមប្រជាពលរដ្ឋទាំងអស់ត្រូវមានការអត់ធ្មត់មួយរយៈសិន រង់ចាំសភាពការណ៍នៃជំងឺកូវីដ១៩ បានធូរស្រាល ឬត្រូវបានបញ្ចប់ និងត្រូវរងចាំការបញ្ជាក់ជាផ្លូវការណាមួយ រវាងប្រទេសកម្ពុជា និងប្រទេសថៃក្នុងការបើកអំណើការច្រកព្រំដែនរវាងប្រទេសទាំងពីរ។
#មន្ទីរព័ត៌មានខេត្តសៀមរាប
