តាមការគ្រោងទុកព្រលានយន្តហោះអន្តរជាតិសៀមរាបថ្មី នឹងត្រូវដាក់ដំណើរការជាផ្លូវការនៅឆ្នាំ២០២៣ ដែលវានឹងអាចជួយឲ្យមានកំណើនទេសចរប្រមាណ៩លាននាក់ នេះបើតាមការលើកឡើង របស់ លោក លី សំរិទ្ធ អភិបាលរងនៃគណៈអភិបាលខេត្តសៀមរាប ក្នុងសន្និសីទសារព័ត៌មានស្តីពី «វឌ្ឍនភាព និង ទិសដៅការងារ បន្តរបស់រដ្ឋបាលខេត្តសៀមរាប» នាព្រឹកថ្ងៃទី០២ ខែមិថុនា ឆ្នាំ២០២០ នៅទីស្តីការគណៈរដ្ឋមន្ត្រី។
លោកអភិបាលរងខេត្ត បង្ហាញថា ព្រលានយន្តហោះអន្តរជាតិថ្មីនេះ មានចម្ងាយប្រមាណ ៣០គីឡូម៉ែត្រ ស្ថិតនៅភាគខាងកើតក្រុងសៀមរាប ដោយបានដំណើរការ សាងសង់អស់រយៈពេលជាង១ឆ្នាំមកហើយ។ ការរំពឹងនៃកំណើនអ្នកទេសចររហូតដល់ប្រមាណ៩លាននាក់ ដោយសារ រាជរដ្ឋាភិបាល បានអនុញ្ញាតយន្ដហោះគ្រប់ប្រភេទចុះចត ដែលខុសពីព្រលានយន្ដហោះបច្ចុប្បន្ន មិនអាចមានលទ្ធភាពគ្រប់គ្រាន់អាចឲ្យយន្តហោះធន់ធំចុះចតបាន។
គួរបញ្ជាក់ថា នៅឆ្នាំ២០១៩ កម្ពុជាទទួលបានអ្នកទេសចរអន្តរជាតិ ជាង៦លាននាក់ ក្នុងនោះខេត្តសៀមរាប ទទួលបានជាង ២លាននាក់ នេះបើតាមការឲ្យដឹងពី ឯកឧត្តមបណ្ឌិត ថោង ខុន រដ្ឋមន្ត្រីក្រសួងទេសចរណ៍។ ដោយឡែក នៅឆ្នាំ២០២០ អំឡុងវិបត្តិជម្ងឺកូវីដ១៩ នៅត្រីមានទី១នេះ ខេត្តសៀមរាប ទទួលភ្ញៀវទេសចរអន្តរជាតិសរុបជិត ៤០ម៉ឺននាក់ ចំនួននេះមានការថយចុះប្រមាណ៥១ភាគរយ បើធៀបនឹងរយៈពេលដូចគ្នាកាលពីឆ្នាំ២០១៩។
អត្ថបទ ៖ សេង ផល្លី
