អាជ្ញាធរជាតិអប្សរា និងនាយកប្រតិបត្តិភ្នាក់ងារសហប្រតិបត្តិការអន្តរជាតិកូរ៉េ បានចុះអនុស្សារណៈយោគយល់គ្នា ដើម្បីបន្តជួសជុល អភិរក្សក្រុមប្រាសាទព្រះពិធូរជំហានទី២ រួមនឹងលានជល់ដំរីនៅក្រុងអង្គរធំ ក្នុងរយៈពេល៥ឆ្នាំ និងត្រូវចំណាយថវិកាសរុបប្រមាណ ៧លានដុល្លារសហរដ្ឋអាមេរិច។
នាព្រឹកថ្ងៃទី០៥ ខែធ្នូ ឆ្នាំ២០១៨ នៅក្នុងកិច្ចប្រជុំបច្ចេកទេសលើកទី៣១ និងពេញអង្គលើកទី២៥ របស់អាយស៊ីស៊ី-អង្គរ ឯកឧត្តមបណ្ឌិត ស៊ុ ម៉ាប់ អគ្គនាយក នៃអាជ្ញាធរជាតិអប្សរា តំណាងឱ្យភាគីអាជ្ញាធរជាតិអប្សរា និងឯកឧត្តម ចុង យ៉ុងជីល (Jeong Yungil) នាយកប្រតិបត្តិភ្នាក់ងារសហប្រតិបត្តិការអន្តរជាតិកូរ៉េ ហៅកាត់ថា កយកា(KOICA) តំណាងឱ្យភាគីកូរ៉េ បានចុះអនុស្សារណៈយោគយល់គ្នា ដើម្បីបន្តជួសជុល អភិរក្សក្រុមប្រាសាទព្រះពិធូរជំហានទី២ រួមនឹងលានជល់ដំរីនៅក្រុងអង្គរធំ។
បន្ទាប់ពីគម្រោងជួសជុលក្រុមប្រាសាទព្រះពិធូរជំហានទី១ បានបញ្ចប់នៅចុងឆ្នាំ២០១៨ ដោយជោគជ័យ នៅថ្ងៃទី១៦-២១ កញ្ញា ២០១៨ ទីភ្នាក់ងារសហប្រតិបត្តិការអន្តរជាតិកូរ៉េ បានចុះមកពិនិត្យមើលការងារបច្ចេកទេស លទ្ធភាពក្នុងការជួសជុល និងប្រមូលផ្តុំព័ត៌មានផ្សេងៗ ដើម្បីឈានទៅរកការសម្រេចបន្តកិច្ចសហប្រតិបត្តិការនេះឡើង។
ភារកិច្ចសំខាន់ក្នុងកិច្ចសហប្រតិបត្តិការនេះ គឺអភិរក្សជួសជុលប្រាសាទជម ដែលជាប្រាសាទតូច ស្ថិតនៅក្នុងក្រុមនៃប្រាសាទព្រះពិធូរ, សិក្សាពីចំណុចហានិភ័យខ្ពស់នៅតាមប្រាសាទក្នុងក្រុមប្រាសាទព្រះពិធូ, ជួសជុលមួយផ្នែកនៅលានជល់ដំរី រួមទាំងផ្តល់សម្ភារៈក្នុងដំណើរការជួសជុលក្នុងគម្រោងនេះផងដែរ។ បន្ថែមពីលើនោះទៀត គម្រោងនេះក៏បានជួយបណ្តុះបណ្តាលធនធានមនុស្ស លើផ្នែកអភិរក្សបេតិកភណ្ឌវប្បធម៌ ដល់អ្នកជំនាញអាជ្ញាធរជាតិអប្សរាទៀតផង។ ហើយគម្រោងជួសជុលក្រុមប្រាសាទព្រះពិធូរជំហានទី២នេះ នឹងចាប់ផ្ដើមអនុវត្តការងារចាប់ពីឆ្នាំ២០១៩ ដល់ ២០២៣។
រូបភាព និង អត្ថបទ៖ លោក អ៊ិន សីហរិទ្ធ និង លោក ជា ស្រស់
កែសម្រួល៖ លោក សេង ផល្លី
