ដំណើរទស្សនៈកិច្ច ស្វែងយល់អំពីការវិនិយោគរបស់បណ្តាប្រទេសក្នុងសហភាពអ៊ឺរ៉ុបនៅកម្ពុជា បានទាញយកចំណាប់អារម្មណ៍អ្នកសារព័ត៌មានកម្ពុជា យល់បានកាន់តែច្បាស់អំពីការវិនិយោគ នៃបណ្តាប្រទេសក្នុងសហភាពអ៊ឺរ៉ុបនៅកម្ពុជា។
លោក ចច អ៊ីដហ្គា (George Edgar) ឯកអគ្គរដ្ឋទូតសហភាពអ៊ឺរ៉ុបប្រចាំនៅព្រះរាជាណាចក្រកម្ពុជា មានប្រសាសន៍ថា ៖ ដំណើរទស្សនកិច្ច របស់ប្រតិភូអ្នកសារព័ត៌មានកម្ពុជានាពេលនេះ គឺជាព្រឹត្តិការណ៍មួយក្នុងព្រឹត្តិការណ៍ជាច្រើន តែនេះព្រឹត្តិការណ៍ចុងក្រោយ ក្នុងគោលបំណងផ្តល់ព័ត៌មាននៃការចូលរួមសេដ្ឋកិច្ចនៃអ្នកវិនិយោគមកពីសហភាពអ៊ឺរ៉ុបមកកាន់កម្ពុជា ថាតើក្រុមហ៊ុនអ៊ឺរ៉ុបទាំងនោះ បានធ្វើអ្វីខ្លះ និងសម្រេចបានអ្វីខ្លះ ហើយនៅក្នុងដំណើរទស្សនកិច្ចនេះ ក៏មានការបង្ហាញអំពីបច្ចេកវិទ្យា សកម្មភាពផលិតកម្មរបស់ក្រុមហ៊ុន ដែលកំពុងដំណើរការដោយការទទួលខុសត្រូវចំពោះសង្គម បរិស្ថាន ជាដើម ។
ដំណើរទស្សនកិច្ចរបស់អ្នកសារព៍ត៌មានខ្មែរលើកនេះ បានធ្វើឡើងនៅខេត្តសៀមរាបរយៈពេលមួយថ្ងៃ ថ្ងៃទី០៤ ខែធ្នូ ឆ្នាំ២០១៨ ក្នុងគោលដៅចំនួន៤កន្លែង គឺនៅក្រុមហ៊ុនចម្រុះសិប្បករអង្គរ នៅរោងចក្រផលិតថង់ក្រណាត់ដាក់វ៉ែនតា ក្រណាត់ជូតវ៉ែនតា និងសម្ភារៈប្រើប្រាស់ពីកំទេចក្រណាត់ PACTICS ( Cambodia ) Co.,Ltd ក្រុមហ៊ុន Cambodia Airports និង ស្ថានីយ៍ប្រេងឥន្ទនៈក្រុមហ៊ុន Cambodia TOTAL ។
នៅក្រុមហ៊ុនចម្រុះសិប្បកម្មអង្គរ លោក ចច អ៊ីដហ្គា (George Edgar) បង្ហាញថា ៖ ក្រុមហ៊ុនសិប្បកម្មអង្គរ មានលក្ខណៈផ្សេងពីក្រុមហ៊ុនដទៃទៀត ដែលសហភាពអ៊ឺរ៉ុបបានចូលរួមដោយផ្ទាល់ និងជួយជ្រោមជ្រែងឲ្យមានជាតំណាក់កាលនៃការអភិវឌ្ឍមកដល់បច្ចុប្បន្ននេះ ។
លោក ភា អានឌ្រេ រ៉ូម៉ាណូ (Pierre-Andre Romano) នាយកប្រតិបត្តិក្រុមហ៊ុនចម្រុះសិប្បកម្មអង្គរ មានប្រសាសន៍ថា ៖សិប្បកម្មអង្គរ បានបំពេញបេសកកម្មរបស់ខ្លួន ដើម្បីធ្វើឲ្យរស់ឡើងវិញនិងអភិវឌ្ឍជំនាញសិប្បកម្មប្រពៃណីខ្មែរ ផ្តល់ការបណ្តុះបណ្តាលមានគុណភាពផ្នែកសិល្បៈសិប្បកម្ម បង្កើតឲ្យមានស្ថិរភាពការងារធ្វើនៅក្នុងខេត្តសៀមរាប ។ ការដ្ឋានបណ្តុះបណ្តាលវិជ្ជាជីវៈបានបង្កើតឡើងតាំងពីឆ្នាំ១៩៩២ ដើម្បីផ្តល់ចំណេះដឹងវិជ្ជាជីវៈដល់យុវជន យុវនារី នៅតាមទីជនបទ ។ មកដល់បច្ចុប្បន្ននេះ ក្រុមហ៊ុនសិប្បករអង្គរ បានសាងសង់និងផ្គត់ផ្គង់ឧបករណ៍ដល់រោងសិប្បកម្មបានចំនួន៤៨កន្លែង ព្រមទាំងបានដឹកនាំទំនុកបំរុងឲ្យសិប្បករចំនួនជាង៩០០នាក់ មានការងារធ្វើ ។
លោកស្រី ជួន ស្រីម៉ៅ សិប្បការិនីជំនាញចម្លាក់ថ្ម បង្ហើបឲ្យដឹងថា ៖ ( នៅក្នុងវីដេអូ )
លោក ឌីឡូបែល អេរីក (Delobel Eric) នាយកប្រតិបត្តិក្រុមហ៊ុន Cambodia Airports មានប្រសាសន៍ឲ្យដឹងថា ៖ ក្រុមហ៊ុន Cambodia Airports គឺជាក្រុមហ៊ុនរបស់កម្ពុជា មានភាគហ៊ុនដោយវិនិយោគិនបារាំង គ្រប់គ្រងដោយជនជាតិបារាំង ជាក្រុមហ៊ុនសម្បទានិកពីរាជរដ្ឋាភិបាលកម្ពុជា ដើម្បីដំណើរការអាកាសយានដ្ឋានអន្តរជាតិទាំង៣នៅកម្ពុជា ហើយការចាប់ផ្តើមដំបូង គឺកាលពី២៥ឆ្នាំមុន ។ បច្ចុប្បន្ននេះ ក្រុមហ៊ុនបានបង្កើតការងារប្រមាណជាចំនួន ២ ០០០នាក់ ក្នុងនេះ ៩៩% ជាជនជាតិខ្មែរ ។
ចំពោះដំណើរទស្សនកិច្ចរបស់ប្រតិភូអ្នកសារព័ត៌មានកម្ពុជា លោក ឌីឡូបែល អេរីក (Delobel Eric) វាយតម្លៃថា ៖ វាជាឱកាសដ៏ល្អ សម្រាប់ការសិក្សាអំពីស្ថានភាពនៃអ្នកវិនិយោគិនអ៊ឺរ៉ុបនៅកម្ពុជារបស់អ្នកយកព័ត៌មានកម្ពុជា ព្រឹត្តិការណ៍បែបនេះ មិនមានជាញឹកញាប់នោះទេ ៕
បទសម្ភាសន៍ លោក Delobel Eric (មានក្នុងវីដេអូ)
រូបភាព និង អត្ថបទ៖ ងិន គឹមឡេង