កម្លាំងសមត្ថកិច្ចចម្រុះ ដឹកនាំដោយអភិបាលក្រុងសៀមរាប នៅព្រឹកថ្ងៃទី៧ខែធ្នូឆ្នាំ២០១៨នេះ បានចុះទៅរុះរើផ្ទះតូចៗ ចំនួនពីរខ្នង ដែលសង់លើដីចំណីផ្លូវក្រវ៉ាត់ក្រុង ក្នុងភូមិកក្រាញ់ សង្កាត់សៀមរាប ក្រុងសៀមរាប។
លោក វ៉េង ហ៊ាង ម្ចាស់ផ្ទះដែលត្រូវរុះរើ បាននិយាយថា ដីរបស់គាត់បានទិញពី ឈ្មោះ អ៊ុន ប៊ុនធី ភេទប្រុស អស់រយៈពេលជិត២០ឆ្នាំមកហើយ ចាប់តាំងពីអាជ្ញាធរមិនទាន់ធ្វើផ្លូវក្រវ៉ាត់ក្រុងមកម្ល៉េះ ពោលគឺតាំងពីតំបន់នេះមិនទាន់មានមនុស្សទៅរស់។ លុះពេលធ្វើផ្លូវ ដីនេះត្រូវបានឈូសដាច់មួយចំហៀង ចំណែកមួយចំហៀងដែលនៅសល់ រូបលោកបានសង់ផ្ទះពីរខ្នងសម្រាប់ប្រកបមុខរបរ។
លោក វ៉េង ហ៊ាង បន្តថាដោយសារផ្ទះរបស់លោក បាំងពីមុខផ្ទះឈ្មោះអ៊ុន ប៊ុនធី ទើបនៅឆ្នាំ២០១៤ ឈ្មោះ អ៊ុន ប៊ុនធី បានប្តឹងទៅតុលាការសុំឲ្យរុះរើផ្ទះនេះ ដោយចោទថាសង់លើដីចំណីផ្លូវ។ ការតតាំងក្តីគ្នានៅតុលាការជាច្រើនឆ្នាំមក ហើយផ្ទះលោក វ៉េង ហ៊ាង មិនត្រូវបានរុះរើឡើយ បន្ទាប់មក ឈ្មោះ អ៊ុន ប៊ុនធី បានសុំសងជាសំណងមកខាងលោក ១៥០០០ដុល្លារ តែខាងលោកមិនទទួល ដោយបញ្ជាក់ថា បើគិតថា ជាដីចំណីផ្លូវ ទី១ បើរដ្ឋត្រូវការ លោកនឹងរុះរើដោយស្មគ្រ័ចិត្ត ទី២បើប៉ះចំណីផ្លូវ ត្រូវអនុវត្តគ្រប់ផ្ទះដែលមាននៅលើដីចំណីផ្លូវ មិនមែនរុះតែផ្ទះលោកនោះទេ។
លោកបានបញ្ជាក់ទៀតថា នៅថ្ងៃកើតហេតុនេះ អាជ្ញាធរជូនដំណឹងពីល្ងាច ព្រឹកឡើងក៏ដាក់កម្លាំងមករុះរើទាំងកំរោល នេះបញ្ជាក់ឲ្យឃើញថា ការអនុវត្តនេះ គឺដោយសារតែបានប្រយោជន៏ ពីភាគីជម្លោះយ៉ាងជាក់ស្តែង។
លោក គឹម នន់ អនុប្រធានការិយាល័យអភិវឌ្ឍន៍ក្រុង នៃរដ្ឋបាលក្រុងសៀមរាប បានបញ្ជាក់ថាវិញថា សេចក្ដីជូនដំណឹងរុះរើសំណង់របស់លោក វ៉េង ហ៊ាង នៅលើដីចំណីផ្លូវនេះ គឺមានការជូនដំណឹងពីរដ្ឋបាលក្រុង និងខេត្ត ជាច្រើនឆ្នាំមកហើយ មិនមែនទើបតែជូនដំណឹងកាលពីពេលថ្មីៗនេះឡើយ។
លោកនួន ពុទ្ធារ៉ា អភិបាលក្រុងសៀមរាប បានបកស្រាយនៅនឹងការចោទប្រកាន់ របស់លោក វ៉េង ហ៊ាងថា ការរុះរើតូបនៅលើចំណីផ្លូវនេះ មិនបានបម្រើដល់ផលប្រយោជន៍បុគ្គលណាម្នាក់ឡើយ គឺបម្រើជាសម្បត្តិសាធារណៈ ហើយក៏មិនបានតែរុះរើតូបចំនួនពីរនេះទេ គឺបន្តធ្វើការរុះរើជាជំហានៗ ទៅតាមសេចក្តីជូនដំណឹងរបស់រដ្ឋបាលក្រុង មួយវិញទៀតក៏យើងមិនអាចអនុវត្តបានក្នុងពេលតែមួយនោះឡើយ។
លោកអភិបាលក្រុងសៀមរាប បានបន្ថែមទៀតថា ការរុះរើនេះ ជាការទប់ស្កាត់រាល់ការរំលោភយកដីចំណីផ្លូវសាធារណៈ មកបម្រើផលប្រយោជន៍ឯកជន ហើយការអនុវត្តលើបុគ្គល ដែលមិនស្តាប់តាមការណែនាំពីអាជ្ញាធរមានសមត្ថកិច្ចនោះ អាជ្ញាធរខេត្តឯកភាពតាមគោលការណ៍ឲ្យរដ្ឋបាលក្រុង ចាត់នូវវិធានការរុះរើ រាល់សំណង់ដែលបានសាងសង់រំលោភលើដីចំណីផ្លូវ និង ប៉ះពាល់ដល់ផលប្រយោជន៍ស្របច្បាប់របស់បុគ្គលដទៃ។
អត្ថបទ និងរូបភាព៖ លោក ជា ស្រស់
កែសម្រួល៖ លោក សេង ផល្លី
