ដើម្បីឱ្យផលនេសាទទទួលបានទិន្នផលខ្ពស់ប្រកបដោយនិរន្តរភាព និងការបង្ក្រាបទប់ស្កាត់បទល្មើសនេសាទ បានលទ្ឋផលល្អប្រសើរគឺទាមទារការចូលរួមពីអាជ្ញាធរដែនដី កងកម្លាំងប្រដាប់អាវុធ និងសហគមន៍ក្នុងមូលដ្ឋាន បំផុសនិងពន្យល់ប្រជាពលរដ្ឋឱ្យយល់ពីធនធានជលផលថាជាទ្រព្យសម្បត្តិយើងទាំងអស់គ្នា។
ក្នុងឱកាស ចុះត្រួតពិនិត្យ ទប់ស្កាត់បទល្មើសជលផលនៅបឹងទន្លេសាប ឯកឧត្តម ណៅ ធួក រដ្ឋលេខាធិការក្រសួងកសិកម្មរុក្ខាប្រមាញ់និងនេសាទ បានដឹកនាំមន្ត្រីរដ្ឋបាលជលផលខេត្តសៀមរាប មន្ត្រីអធិការខណ្ឌរដ្ឋបាលជលផលខាងជើងបឹងទន្លេសាប និងអធិការខណ្ឌជលផលខាងត្បូងបឹងទន្លេសាប សរុបចំនួន៣០នាក់។
នៅក្នុងប្រតិបត្តការនេះ ឯកឧត្តម ណៅ ធួក បានពិនិត្យឃើញ និងបង្ក្រាបឧបករណ៍នេសាទខុសច្បាប់មួយចំនួន ដោយបាន បំផ្លាញចោលនៅនឹងកន្លែង ដែលស្របទៅតាមច្បាប់ស្តីពីជលផលដែលបានកំណត់។
ព័ត៌មានជាតិ ថ្មីៗ
ឯកឧត្តម បានបញ្ជាក់ថា ដើម្បីរក្សាទិន្នផលនេសាទខ្ពស់ប្រកបដោយនិរន្តរភាព ទាមទារការចូលរួមពីអាជ្ញាធរដែនដី កងកម្លាំងប្រដាប់អាវុធ និងសហគមន៍ក្នុងមូលដ្ឋាន បំផុសនិងពន្យល់ប្រជាពលរដ្ឋឱ្យយល់ថា ធនធានជលផលទាំងនេះជាទ្រព្យសម្បត្តិរបស់យើងទាំងអស់គ្នា ដូច្នេះយើងត្រូវជួយការពារទាំងអស់គ្នា។ ផ្ទុយទៅវិញ ធនធាននេសាទមិនមែនជាទ្រព្យសម្បត្តិរបស់ក្រសួងកសិកម្មរុក្ខាប្រមាញ់និងនេសាទ ឬមន្ត្រីណាម្នាក់នោះទេ មន្ត្រីជលផលពួកគាត់មានតួនាទីផ្តល់តែទៅលើការងារបច្ចេកទេសតែប៉ុណ្ណោះ។
លោកទា គឹមសុទ្ឋ ប្រធានមន្ទីរកសិកម្មរុក្ខាប្រមាញ់និងនេសាទខេត្តសៀមរាប បានបញ្ជាក់ថា៖ នាពេលកន្លងមក មន្ត្រីយើងខិតខំបង្ក្រាប បទល្មើសនេសាទជាញឹកញាប់ដូចភ្លៀងរលឹម យ៉ាងណាក៍ដោយ ក៍យើងនៅតែមិនអាចបំបាត់ឱ្យបានអស់ឡើយ តែយើងអាចជួយការពារបានមួយផ្នែកធំដែរ ដូចជាការប្រើស្បៃមុងឬសាច់អួន ដែលច្បាប់ហាមឃាត់ ដែលយើងត្រូវទប់ស្កាត់និងបង្ក្រាប យើងសង្កេតឃើញថាបទល្មើសនេសាទខុសច្បាប់ថយចុះជាបន្តបន្ទាប់ ព្រោះប្រជានេសាទមួយចំនួនពួកគាត់ងាកទៅប្រកបមុខរបរជាមួយសហគមន៍ទេសចរណ៍ តាមរយៈការដឹកជញ្ជូនអ្នកទេសចរណ៍តាមកាណូត និងលក់ដូរចំណីអាហារ វត្ថុអនុស្សាវរីយ៍ ដល់អ្នកទេសចរណ៍ដែលទៅកំសាន្តនៅតំបន់ទន្លេសាបជាពិសេសកំពង់ភ្លុក និងចុងឃ្នៀស។
អត្ថបទ និងរូបភាព៖ លោក យូ វង្ស
កែសម្រួល៖ លោក សេង ផល្លី
