កាលពីព្រឹកមិញនេះ នៅរដ្ឋបាលខេត្តសៀមរាប បានបើកកិច្ចប្រជុំសាមញ្ញលើកទី ៥៥ របស់ ក្រុម ប្រឹក្សាខេត្តសៀមរាប អាណត្តិទី២ ក្រោមអធិបតិយភាពឯកឧត្តម អ៊ឹង ហឿន ប្រធានក្រុមប្រឹក្សាខេត្ត និង លោក លី សំរិទ្ធ អភិបាលរង ខេត្តសៀមរាប ដើមី្បពិនិត្យ ពិភាក្សា និង អនុម័តទៅលើ របៀបវារៈ ចំនួន០៣ចំណុច ដោយបានអនុម័តលុបចេញរបៀបវារៈចំណុចទី៣ ដែលគ្រោងយកទៅដាក់ក្នុងរបៀបវារៈកិច្ចប្រជុំសាមញលើកទី៥៦។
លោក លី សំរិទ្ធ អភិបាលរងខេត្ត បានលើកឡើងនិង បកស្រាយ នូវបញ្ហាមួយចំនួន ដែលសមាជិកក្រុមប្រឹក្សាខេត្ត បានលើកឡើងដូចជា បញ្ហាការរំលោភដីចំណីផ្លូវ ដែលករណីនេះ អាជ្ញាធរខេត្ត បានចាត់វិធានការឱ្យ អាជ្ញាធរក្រុង អនុវត្តចំពោះសំណង់អាណាធិបតេយ្យ ដែលបានយកដីចំណីផ្លូវ និង ដី របស់រដ្ឋធ្វើជាកម្មសិទ្ធិផ្ទាល់ខ្លួន ដែលធ្វើឲ្យមានផលប៉ះ ពាល់ដល់ផលប្រយោជន៍សាធារណៈ ។
លោកអភិបាលរងខេត្ត បានមានប្រសាសន៍បន្តថា ដើម្បីឲ្យការងារនេះទទួលបានជោគជ័យ សូមឲ្យកម្លាំងមានសមត្ថកិច្ចនិងមន្ត្រីអង្គភាព មន្ទីរជំនាញ កិច្ចសហការគ្នា ត្រួតពិនិត្យឡើងវិញ រាល់ការធ្វើចរាចរណ៍របស់រថយន្តធំៗ និងត្រួតពិនិត្យចំពោះអ្នក បើកបររថយន្តទាំងនោះ ខ្លាចក្រែងមានសារធាតុញៀនក្នុងខ្លួន ព្រោះឥរិយាបទនៃបើកបររបស់ពួកគាត់មួយចំនួន ហាក់ដូចជាមិនប្រក្រតី ការដឹកជញ្ជូនដីធ្លាក់តាមដងផ្លូវ និង ធ្វើឲ្យខូចផ្លូវ បាត់នូវសោភណ្ឌភាពក្រុង ។
មានប្រសាសន៍បូកសរុបក្នុងឱកាសនោះ ឯកឧត្តម អ៊ឹង ហឿន មានប្រសាសន៍ថា ដើម្បីជម្រុញឲ្យ ថ្នាក់ដឹ នាំខេត្ត មន្ទីរ អង្គភាព ក្រុង ស្រុក សំដៅឆ្ពោះទៅរកមូលដ្ឋានបម្រើប្រជាពលរដ្ឋឲ្យបានកាន់តែល្អប្រសើរថែមទៀត និង ដើម្បីកែលម្អភាពអសកម្ម នានា និង ដោះស្រាយបញ្ហាប្រឈមដែលនៅសេសសល់ សូមស្នើដល់ មន្ទីរ អង្គភាពពាក់ព័ន្ធ អាជ្ញាធរ ក្រុង ស្រុក ត្រូវ យកចិត្តទុកដាក់ខ្ពស់ រួមគ្នាដោះស្រាយបញ្ហា។
ឯកឧត្តមមានប្រសាសន៍បន្តថា ចំពោះអ្នកដែលសាងសង់រំលោភយកដីចំណីផ្លូវរបស់រដ្ឋ ធ្វើជាកម្មសិទ្ធិរបស់ខ្លួន ត្រូវ អាជ្ញាធរក្រុងខេត្តនិងសមត្ថកិច្ចនគរបាល អង្គភាពមន្ទីរពាក់ព័ន្ឋនានា ត្រូវសហការគ្នាឈរលើវិធានការច្បាប់ឱ្យបានម៉ឺងម៉ាត់ ប្រកបដោយតម្លាភាពនិងយុត្តិធម៌ និងត្រូវបន្តយកចិត្តទុកដាក់ខ្ពស់ ត្រួតពិនិត្យចំពោះ អ្នកបើកបររថយន្តធុនធ្ងន់ ដូចជា រថយន្តក្រុង រថយន្តដឹកដី និង កុងទឺន័រ ព្រមទាំងត្រួតពិនិត្យសារធាតុញៀន ដើម្បីកាត់បន្ថយ ការកកស្ទះចរាចរណ៍ និង គ្រោះថ្នាក់ចរាចរណ៍ជាយថាហេតុ ដោយសារតែអ្នកបើកបររថយន្តធំៗទាំងនោះខ្វះការប្រុងប្រយ័ត្ន
អត្ថបទ និងរូបភាព៖ លោក យូ វង្ស
កែសម្រួល៖ លោក អ៊ុន ណារាជ្យ់
