មានប្រសាសន៍ក្នុងពិធីប្រកាសចូលកាន់មុខតំណែងជាអភិបាលខេត្តសៀមរាប នៅព្រឹកថ្ងៃទី១៣ ធ្នូ ឆ្នាំ២០១៨នេះ សម្ដេចក្រឡាហោម ស ខេង ឧបនាយករដ្ឋមន្រ្តី រដ្ឋមន្រ្តីក្រសួងមហាផ្ទៃ បានណែនាំដល់អាជ្ញាធរមានសមត្ថកិច្ចទាំងអស់ ត្រូវចេះសហការជាមួយម្ចាស់ក្លឹប ផ្ទះសំណាក់ សណ្ឋាគារជាដើម ដើម្បីផ្តល់ព័ត៌មានពីអ្នកស្នាក់នៅ បំណងដើម្បីទប់ស្កាត់ការជួញដូរ និងប្រើប្រាស់គ្រឿងញៀន ព្រោះកន្លងមកក៏មានការប្រើប្រាស់ និងជួញដូរគ្រឿងញៀននៅតាមផ្ទះសំណាក់ និងសណ្ឋាគារដែរ ហើយកាន់តែងាយស្រួលចែកចាយទៅទៀត នៅតាមក្លឹប ឬរង្គសាល ។
សម្ដេចក្រឡាហោម ស ខេង មានប្រសាសន៍បន្ថែមថា សមត្ថកិច្ចត្រូវចុះអនុស្សរណៈយោគយល់ជាមួយម្ចាស់ផ្ទះសំណាក់ សណ្ឋាគារ ក្លឹបកម្សាន្ត ដូច្នេះពួកគេមានភារកិច្ចរាយការណ៍ព័ត៌មានអ្នកស្នាក់នៅ ធ្វើដូច្នេះ វាបង្កភាពងាយស្រួលដល់សមត្ថកិច្ច ព្រោះថា សមត្ថកិច្ចទាំងអស់មិនអាចដឹងសព្វគ្រប់ថាផ្ទះសំណាក់ ឬសណ្ឋាគារណាមានការលួចជួញដូរ និងប្រើប្រាស់ថ្នាំញៀនអស់ទេ ។
សូមបញ្ជាក់ថា ក្នុងរយៈពេល៩ខែ ដើមឆ្នាំ២០១៨កន្លងទៅនេះ ស្នងការដ្ឋាននគរបាលខេត្ត និង បញ្ជាការដ្ឋានកងរាជអាវុធហត្ថខេត្តសៀមរាប សហការបង្ក្រាបករណីគ្រឿងញៀន បានចំនួនសរុប ៣១៣ករណី ឃាត់ខ្លួនមនុស្សចំនួន៧៨២នាក់ ក្នុងនោះជាស្ត្រីចំនួន៧០នាក់ ជាជនជាតិបរទេសចំនួន០៧នាក់ មានស្រីចំនួន០៣នាក់ , ចាប់យកគ្រឿងញៀនប្រភេទមេតំហ្វេតាមីន ( Ice )ចំនួន ២.០២៣,៣០ក្រាម , ប្រភេទយ៉ាម៉ា ( WY ) ចំនួន ១២,៩១ក្រាម , ប្រភេទកាតាមីន ( K ) ចំនួន២៤,២៤ក្រាម , ប្រភេទកូកាអ៊ីន ចំនួន១.៦៩២,២៩ក្រាម , ប្រភេទអ៊ិកស្តាលី ចំនួន ២៥,៧ក្រាម , ប្រភេទកញ្ឆាចំនួន១.៧៥៦,៧៦ក្រាម និង សម្ភារពាក់ព័ន្ធមួយចំនួន ៕
អត្ថបទ និង រូបថត ៖ លោក ម៉ាត់ អារីហ្វីន
កែសម្រួលអត្ថបទ ៖ លោក លីវ សាន្ត
#មន្ទីរព័ត៌មានខេត្តសៀមរាប
