ក្នុងឱកាសនៃប្រកាសចូលកាន់តំណែងថ្មីជាអភិបាលខេត្តសៀមរាប ឯកឧត្តម ទៀ សីហា បានប្តេជ្ញាចិត្តថា នឹងគោរពនិង អនុវត្តន៍ឱ្យបានខ្ជាប់ខ្ជួននូវរដ្ឋធម្មនុញ្ញ ច្បាប់និងលិខិតបទដ្ឋានគតិយុត្តិជាធរមាន ព្រមទាំងអនុវត្តន៍តាមការចាត់តាំង និងការណែនាំរបស់ថ្នាក់ដឹកនាំ ដោយតម្កល់នូវឧត្តមប្រយោជន៍ជាតិ និងប្រជាជនជាធំ ជាពិសេស នឹងខិតខំលើកកម្ពស់ស្មារតីសាមគ្គីភាព និងឯកភាពផ្ទៃក្នុង និងបន្តប្រពៃណីសហការជាមួយគណៈអភិបាលខេត្ត ក្រុមប្រឹក្សាខេត្ត ក្រុង ស្រុក ឃុំសង្កាត់ និងមន្ទីរអង្គភាពជុំវិញខេត្ត សំដៅសម្រេចធ្វើឱ្យបានការអភិវឌ្ឍរីកចម្រើនលើគ្រប់វិស័យនៅក្នុងខេត្ត ព្រមទាំងខិតខំសម្របសម្រួលជំរុញការបម្រើសេវាសាធារណៈ និងដោះស្រាយបញ្ហានានជូនប្រជាពលរដ្ឋឱ្យបានឆាប់រហ័ស ប្រកបដោយប្រសិទ្ឋភាព និងប្រសិទ្ឋផល ។
គួររំលឹកថា ឯកឧត្តម ទៀ សីហា ឋានន្តរសកិ្ត ឧត្តមមន្ត្រី ថ្នាក់លេខ៣ បច្ចុប្បន្នជាអភិបាលរងខេត្តសៀមរាប ត្រូវបានប្រកាសចូលកាន់មុខតំណែងជាអភិបាលខេត្តសៀមរាប ជាផ្លូវការ កាលពីព្រឹកថ្ងៃទី១៣ ខែធ្នូ ឆ្នាំ២០១៨នេះ តាមព្រះរាជក្រឹត្យលេខ នស.រកត ១២១៤/១៣៥៦ ដែលឡាយព្រះហស្ថដោយព្រះករុណាព្រះបាទសម្ដេចព្រះបរមនាថ នរោត្ដម សីហមុនី ព្រះមហាក្សត្រ នៃព្រះរាជាណាចក្រកម្ពុជា ជំនួសឯកឧត្តមបណ្ឌិត ឃឹម ប៊ុនសុង អតីតអភិបាលខេត្តសៀមរាប ដែលត្រូវតែងតាំងទទួលមុខដំណែងថ្មី ជារដ្ឋលេខាធិការក្រសួងការពារជាតិ ហើយពិធីប្រកាសចូលកាន់តំណែងជាអភិបាលខេត្តសៀមរាបនេះ បានប្រព្រឹត្តទៅក្រោមអធិបតីភាពសម្ដេចក្រឡាហោម ស ខេង ឧបនាយករដ្ឋមន្ត្រី រដ្ឋមន្ត្រីក្រសួងមហាផ្ទៃ ។
មានប្រសាសន៍ក្នុងឱកាសនោះ សម្តេចក្រឡាហោម ស ខេង ឧបនាយករដ្ឋមន្ត្រី រដ្ឋមន្ត្រីក្រសួងមហាផ្ទៃ បានសង្ឃឹមជឿជាក់ថា ឯកឧត្តម ទៀ សីហា នឹងប្រើប្រាស់សមត្ថភាព និង បទពិសោធន៍ ដើម្បីរួមគ្នាបន្តអនុវត្តន៍បន្ថែមទៀត នូវសមិទ្ឋផល និងស្នាដៃនានាដែល ឯកឧត្តម ឃឹម ប៊ុនសុង និងថ្នាក់ដឹកនាំមុនៗសម្រេចបាន ដើម្បីអភិវឌ្ឍន៍ខេត្តសៀមរាបឱ្យកាន់តែរីកចម្រើនថែមទៀត ប៉ុន្តែសំខាន់ សំណូមពរដល់ក្រុមប្រឹក្សាខេត្ត គណៈអភិបាលខេត្ត ក្រុង ស្រុក និងមន្ទីរអង្គភាព អាជ្ញាធរមូលដ្ឋានគ្រប់លំដាប់ថ្នាក់ ព្រមទាំងកងកម្លាំងប្រដាប់អាវុធ និងប្រជាពលរដ្ឋក្នុងទូទាំងខេត្តសៀមរាប ផ្តល់ការគាំទ្រ និងបន្តសហការរួមគ្នាជាមួយ ឯកឧត្តម ទៀ សីហា ដើម្បីបន្តថែរក្សាសន្តិភាព ស្ថេរភាពនយោបាយសង្គម សន្តិសុខសណ្តាប់ធ្នាប់ របៀបរៀបរយសាធារណៈ និងខិតខំរួមគ្នាធ្វើការអភិវឌ្ឍខេត្តសៀមរាប ឱ្យកាន់តែមានការរីកចម្រើន ៕
ព័ត៌មានជាតិ ថ្មីៗ
អត្ថបទ និង រូបថត ៖ លោក យូ វង្ស
កែសម្រួលអត្ថបទ ៖ លោក លីវ សាន្ត
#មន្ទីរព័ត៌មានខេត្តសៀមរាប
