រាជរដ្ឋាភិបាលកម្ពុជាតែងតែប្រារព្ធ ទិវាជនពិការអន្តរជាតិ ដើម្បីរំលឹកពីការតស៊ូទាមទារសិទ្ធិចូលរួមក្នុងសង្គមរបស់ជនពិការ ប្រមាណជាង១ពាន់លាននាក់ នៅក្នុងពិភពលោក។
នៅព្រឹកនៅថ្ងៃទី១៤ ខែធ្នូ ឆ្នាំ២០១៨ នៅមន្ទីរសង្គមកិច្ច អតីតយុទ្ធជន និង យុវនីតិសម្បទាខេត្តសៀមរាប មានរៀបចំទិវាជនមានពិការភាពកម្ពុជាលើកទី២០ និង ទិវាជនមានពិការភាពអន្តរជាតិលើកទី៣៦ ក្រោមប្រធានបទ «លើកកម្ពស់សិទ្ធិជនមានពិការភាព ធានាដល់ការធ្វើបរិយាប័ន្ន និងសមភាព» ការប្រារព្ធទិវាទាំងពីរនេះ បានបង្ហាញពីការយកចិត្តទុកដាក់លើវិស័យពិការភាពនៅកម្ពុជា របស់រាជរដ្ឋាភិបាលកម្ពុជា សំដៅជួយដល់ជនមានពិការភាព និងក្រុមគ្រួសារ ឲ្យទទួលបានគុណភាពជីវិតល្អប្រសើរ គ្មានការរើសអើង ទទួលបានសេវាសង្គមនិងសេវាសាធារណប្រកបដោយគុណភាព ។
តួយ៉ាង រាជរដ្ឋាភិបាលកម្ពុជាបានប្រកាសដាក់ឲ្យអនុវត្តជាផ្លូវការ នូវផែនការយុទ្ធសាស្ត្រជាតិ ស្តីពី ពិការភាព ២០១៤-២០១៨ ដោយបានលើកឡើងលម្អិត នូវគោលនយោបាយជាអាទិភាពសម្រាប់ការអនុវត្តកម្មវិធីកំណែទម្រង់នានា នៃវិស័យពិការភាព សំដៅលើកកម្ពស់សមត្ថភាពស្ថាប័ន ពង្រឹងហេដ្ឋារចនាសម្ព័ន្ធ សង្គមនិងសេដ្ឋកិច្ច ក្នុងទិសដៅបង្កើតកាលានុវត្តភាពការងារសម្រាប់ជនពិការ កាត់បន្ថយភាពក្រីក្រ និងអភិវឌ្ឍ ការងារសំខាន់ៗរបស់វិស័យពិការភាពនៅកម្ពុជា។ ជាពិសេសទៅទៀតថ្មីៗនេះ រាជរដ្ឋាភិបាលកម្ពុជាក៏បានដាក់ចេញនូវក្របខ័ណ្ឌគោលនយោបាយ ជាតិគាំពារសង្គម ដើម្បីកំណត់ផែនការយុទ្ធសាស្ត្ររបស់រាជរដ្ឋាភិបាល ក្នុងការធានាឲ្យបាននូវសន្តិសុខ ប្រាក់ចំណូល និងកាត់បន្ថយភាពងាយរងគ្រោះផ្នែកសេដ្ឋកិច្ច និងហិរញ្ញវត្ថុរបស់ប្រជាជន សំដៅលើកកម្ពស់ សុខុមាលភាពនិងសាមគ្គីភាពសង្គម ព្រមទាំងកាត់បន្ថយភាពក្រីក្រជាអតិបរិមា។
ថ្លែងក្នុងឱកាសនោះ ឯកឧត្តម ភា សុផាត ទីប្រឹក្សាអមក្រសួងសង្គមកិច្ច អតីតយុទ្ធជន និងយុវនីតិសម្បទា បានមានប្រសាសន៍ថា ក្រោមការដឹកនាំរបស់សម្ដេចតេជោ នាយករដ្ឋមន្ត្រី នៃព្រះរាជាណាចក្រកម្ពុជា សម្ដេចបានសម្រេចផ្ដល់ កម្មសិទ្ធិដីធ្លី ជូនយោធិនពិការ នៅស្រុកគូលែន ខេត្តសៀមរាប នៅតំបន់អភិវឌ្ឍន៍ជនពិការ៣១៧ តាកែនកោះស្លា ខេត្តកំពត និងនៅភ្នំឆ័ត្រ ខេត្តបន្ទាយមានជ័យ សម្រាប់សាងសង់លំនៅឋាន និងធ្វើអាជីវកម្ម កសិកម្មជាលក្ខណៈគ្រួសារ ព្រមទាំងបានផ្តល់សេវាស្តារលទ្ធភាពពលកម្មនៅសហគមន៍។
ឯកឧត្តម បានបន្ថែមទៀតថា តាមរយៈសារលិខិតរបស់សម្តេចតេជោ បញ្ជាក់ថា ជនមានពិការភាព ត្រូវបានផ្តល់អទិភាពក្នុងការជ្រើសរើសឲ្យចូលបម្រើការងារនៅក្នុងក្រសួង ស្ថាប័នរដ្ឋចំនួន៤០នៅទូទាំប្រទេស ហើយនៅឆ្នាំ២០១៨នេះ មន្ត្រីមានពិការភាព មានចំនួន ២ ៨៣៩នាក់ ស្មើនឹង ១.៩៣% នៃចំនួនរួមមន្ត្រីរាជការរបស់ក្រសួង ស្ថាប័នរដ្ឋទាំង ៤០ នោះ។ បច្ចុប្បន្ន គ្រប់ក្រសួងស្ថាប័នរដ្ឋ កំពុងជ្រើសរើសបន្ថែម ឲ្យគ្រប់តាមចំនួនអត្រាកំណត់ ២% នៅក្នុងឆ្នាំ២០១៩ ។
បើតាមរបាយការណ៍ស្តីពីសកម្មភាពវិស័យពិការភាព ដែលលើកឡើងដោយ លោក អោ ម៉ៅ ប្រធានមន្ទីរសង្គមកិច្ច អតីតយុទ្ធជន និងយុវនីតិសម្បទាខេត្តសៀមរាប បានឲ្យដឹងថា ជនមានពិការភាពនៅក្នុងខេត្តសៀមរាបមានចំនួនសរុប ៧ ៦៣៧នាក់ ចំពោះជនមានពិការភាព បានទទួលរបបគោលនយោបាយពីរាជរដ្ឋាភិបាលមានចំនួន ២ ១៤៩នាក់ ក្នុងនោះមានបន្ទុកប្រពន្ធ ១ ៨០២នាក់ មានបន្ទុកកូន ១ ៩១២នាក់ បន្ទុកអ្នកបម្រើ ១០៩នាក់ ។ ក្រោមកិច្ចសហការជាមួយសមាគមអតីតយុទ្ធជនកម្ពុជា មន្ទីរសង្គមកិច្ចខេត្តសៀមរាប បានផ្តល់ប័ណ្ណបេឡាជាតិសន្តិសុខសង្គម ជូនជនមានពិការភាព ជាអតីតយុទ្ធជនបានចំនួន ២ ១៤៩នាក់ និងមានការផ្តល់សេវាស្តារលទ្ធភាពពលកម្ម កាយសម្បទាដោយឥតគិតថ្លៃ ផងដែរ ៕
អត្ថបទ និង រូបថត : លោក អ៊ិន សីហរិទ្ធ និងលោក ងិន គឹមឡេង
សម្រួលអត្ថបទៈ លោក សេង ផល្លី
