នៅរសៀលថ្ងៃទី១៦ ខែ ធ្នូ ឆ្នាំ២០១៨ នៅវត្តអារញ្ញសាគរ ស្ថិតក្នុងសង្កាត់សៀមរាប ក្រុងសៀមរាប ខេត្តសៀមរាប បានធ្វើពិធីសម្ពោធសមទ្ធិនានា ដែលមានដងទង់ ក្លោងទ្វារ ផ្លូវចាក់បេតុង ក្រោមអធិបតីភាពលោកជំទាវបណ្ឌិត សៀង ចាន់ហេង អគ្គនាយិកា ក្រុមហ៊ុនហេងអភិវឌ្ឍន៍ និង លោក ពិន ប្រាកដ អភិបាលរង នៃគណៈអភិបាលខេត្ត ដោយមានការចូលរួមពីសំណាក់អាជ្ញាធរមូលដ្ឋាន សីលវ័ន្ត សីលវន្តី លោកគ្រូ អ្នកគ្រូ សិស្សានុសិស្ស និង ប្រជាពលរដ្ឋ ជាច្រើនកុះករផងដែរ ។
បន្ទាប់ពីធ្វើពិធីក្រុងពលី បួងសួងទៅតាមបែបព្រះពុទ្ធសាសនារួចមក តាមសង្ឃដិការបស់ព្រះគ្រូសុធីវរបញ្ញាវិសោរទោ ហ៊ាក់ គឹមហ៊ត់ ព្រះចៅអធិការវត្តអារញ្ញសាគរនិងជាទីប្រឹក្សាផ្តាល់សម្ដេចព្រះអគ្គមហាសង្ឃរាជនៃព្រះរាជាណាចក្រកម្ពុជា បានគូសបញ្ជាក់ថា សមទ្ធិផលដែលកសាងឡើងក្នុងឆ្នាំ២០១៨នេះ មានដងទង់មួយគូរមុខព្រះវិហារ , ក្លោងទ្វារ , ក្រាលការ៉ូជុំវិញកំផែង កែវព្រះវិហារ , ផ្លូវចាក់បេតុង រួមទាំងសមទ្ធិផលមួយចំនួនទៀត សរុបទឹកប្រាក់ ៩១ពាន់៣១៦ដុល្លា និង នៅជំពាក់ថ្លៃ គ្រឿងសំណង់ និង ជាង សរុបទឹកប្រាក់ ៤៩ពាន់៨១៦ដុល្លា ។
មានប្រសាសន៍សំណេះសំណាលនោះដែរ លោក ពិន ប្រាកដ អភិបាលរងខេត្ត និង លោកជំទាវបណ្ឌិត សៀង ចាន់ហេង អគ្គនាយិកាក្រុមហ៊ុនហេងអភិវឌ្ឍន៍បានលើកឡើងថា សមទ្ធិផលទាំងនេះ គឺស្តែងចេញឡើង ក្រោមស្មារតីជ័យជម្មះ៧មករា ក្រោមដំបូលសន្តិភាពដ៏រឹងមាំ ក្រោមការកិច្ចដឹកនាំដ៏ឈ្លាសវៃរបស់សម្តេចតេជោ ហ៊ុន សែន នាយករដ្ឋមន្ត្រី បានធ្វើឲ្យប្រទេសជាតិទាំងមូល មានការអភិវឌ្ឍរីកចម្រើនលើគ្រប់វិស័យ ទាំងវិស័យអាណាចក្រ និង ពុទ្ធចក្រ ។
ការរីកចម្រើននេះ ក៏ផ្តើមចេញពីកម្លាំងនៃ មហាសាមគ្គី ពីថ្នាក់ដឹកនាំ មន្ត្រីរាជការ អាជ្ញាធរមូលដ្ឋាន សប្បុរសជន និង ប្រជាពុទ្ធបរិស័ទជិតឆ្ងាយផងដែរ ។ ម្យ៉ាងទៀតទីវត្តអារាមនេះហើយ ដែលជាជង្រុកនៃអក្សរសាស្ត្រជាតិ ដែលជាទីកន្លែងប្រមូលផ្តុំនូវសម្បត្តិវប្បធម៌ អរិយធម៌ ប្រពៃណី ទំនៀមទំលាប់ និងការបណ្តុះបណ្តាលនូវធនធាន មនុស្ស ដែលជាអត្តសញ្ញាណនៃជាតិសាសន៍ខ្មែរយើង ហើយបានកំពុងធ្វើការទាក់ទាញដល់ភ្ញៀវទេសចរជាតិ អន្តរជាតិ ចូលមកទស្សនាកម្សាន្ត ស្វែងយល់ផងដែរ ។
លោកជំទាវបណ្ឌិត សៀង ចាន់ហេង បានគូសបញ្ជាក់ថា វិស័យព្រះពុទ្ធសាសនា គឺជាសាសនារបស់រដ្ឋ ដើម្បីឲ្យវិស័យសាសនាកាន់តែរីកចម្រើនបន្ថែមទៀត សូមបងប្អូនប្រជាពលរដ្ឋជិតឆ្ងាយបន្ដនៅការជួយជ្រោមជ្រែង ព្រះសង្ឃ កសាងសមិទ្ធផលនានាក្នុងវត្ត សាមគ្គីគ្នា អភិវឌ្ឍន៍ភូមិ ឃុំរបស់យើងទាំងអស់គ្នា ។
ទន្ទឹមនឹងការសាងសង់ដងទង់ព្រះវិហារ និង ក្លោងទ្វារវត្ត និង ជាមួយនឹងសមិទ្ធផលថ្មីៗនេះ សូមទាំង ព្រះសង្ឃ សីលវ័ន្តសីវន្តី បងប្អូនប្រជាពលរដ្ឋ អាជ្ញាធរគ្រប់លំដាប់ថ្នាក់ មេត្ដាជួយថែរក្សាសមិទ្ធផលនេះ ឲ្យបានគង់វង្សយូរអង្វែងតទៅ ព្រោះនេះជាទ្រព្យសម្បត្ដិរួមរបស់យើងទាំងអស់គ្នា ។
ហើយទាំងនេះក៏ដើម្បីភាពគង់វង្ស នៃវប្បធម៌ សាសនា យើងគ្រប់រូបត្រូវចូលរួមក្នុងការថែរក្សាឲ្យបាននូវ សុខសន្តិភាពនៅកម្ពុជា និង ជាភាពសុខសាន្ត របស់យើងគ្រប់គ្នា ព្រមទាំងប្រកាន់យកនូវព្រះពុទ្ធឱវាទរបស់ ព្រះសម្មាសាម្ពុទ្ធ ព្រះបរមគ្រូនៃយើង ដែលជាប្រទីបបំភ្លឺផ្លូវ ក្នុងការអប់រំសីសធម៌ ចរិយាធម៌ សេចក្ដីថ្លៃថ្នូសមស្របទៅនឹងទស្សនៈថា “ ព្រះពុទ្ធសាសនាជាកម្លាំងដឹកនាំចរិយាធម៌សង្គម ” ។
ក្នុងនោះដែរលោកជំទាវបានជួយសម្រួលដោះស្រាយ នូវបំណុលសេសសល់ក្នុងការកសាងក្នុងទីវត្តអារញ្ញសាគរ ចំនួន៤៩ពាន់៨១៦ដុល្លា និងប្រគេនបច្ច័យ១០លានរៀល សម្រាប់ពិធីរាប់បាត្រសមណសិស្ស ព្រមទាំងជួយធ្វើផ្លូវ ចាក់បេតុងក្នុងវត្តបង្ហើយប្រវែង៤០០ម៉ែត្រ និង ប្រគេនបច្ច័យដល់វត្តកំបោរ ក្នុងឃុំខ្វាវ ស្រុកជីក្រែង ចំនួន ៣ម៉ឺន ៥ពាន់ ដុល្លាដើម្បីធ្វើផ្លូវ និង ជាវដីពង្រីកទីវត្ត១០ហិចតា ។ ក្នុងនោះដែរបានធ្វើទានចំពោះសីលវ័ន្ត សីលវន្តី ១៥០នាក់ ម្នាក់ៗ ក្រណាត់ស ១ដុំ ប្រាក់៥ម៉ឺនរៀល ,តាយាយ ម្នាក់ៗ ៥ម៉ឺនរៀល, ប្រជាពលរដ្ឋ ៧០០នាក់ ម្នាក់ៗក្រម៉ា១ ប្រាក់១ម៉ឺនរៀល , លោកគ្រូអ្នកគ្រូ និង ប្រជាការពារ ៨០នាក់ម្នាក់ៗ ៥ម៉ឺនរៀល សិស្ស ម្នាក់ៗ ១ម៉ឺនរៀល , ក្រុមភ្លេង ម្នាក់ៗ ១០ម៉ឺនរៀល ,ប្រគេនព្រះសង្ឃគង់ក្នុងវត្តអារញ្ញសាគរ ចំនួន២លាន៥សែនរៀលផងដែរ ៕
អត្ថបទ និង រូបថត : លោក អ៊ិន សីហរិទ្ធ
