តំណាងរាស្ត្រមណ្ឌលសៀមរាប សម្ពោធផ្លូវចាក់ក្រាលបេតុងចម្ងាយ ១ ៥០០ ម៉ែត្រ ឆ្លើយតបម្ចាស់សំឡេងឆ្នោត ដែលបានផ្តល់នូវជំនឿទុកចិត្ត គាំទ្រឲ្យបម្រើរាស្ត្របន្តក្នុងអាណត្តិថ្មី នីតិកាលទី៦ នេះ !
ឯកឧត្តម សៀង ណាំ តំណាងរាស្ត្រមណ្ឌលសៀមរាបនិងលោកជំទាវ បានកសាងនិងបើកសម្ពោធដាក់ឲ្យប្រើប្រាស់ជាផ្លូវការ កំណាត់ផ្លូវចាក់ក្រាលបេតុង១ខ្សែ ចម្ងាយ ១ ៥០០ម៉ែត្រ នៅភូមិផ្លាំង ឃុំស្រណាល ស្រុកក្រឡាញ់ ខេត្តសៀមរាប ។
ឯកឧត្តម សៀង ណាំ តំណាងរាស្ត្រមណ្ឌលសៀមរាប មានប្រសាសន៍ថា សមិទ្ធផលថ្មីនេះ គឺជាចំណងដៃនៃការឆ្លើយតបទៅនឹងជំនឿទុកចិត្តរបស់ប្រជារាស្ត្រនៃភូមិផ្លាំង ឃុំស្រណាល ដែលបានចូលរួមបោះឆ្នោតជូនរាជរដ្ឋាភិបាលកម្ពុជាសម្រាប់នីតិកាលទី៦នេះ ឲ្យបន្តកាន់អំណាចដឹកនាំប្រទេសជាតិ ក្នុងសំឡេងយ៉ាងច្រើនលើសលុប ហើយក៏អាចនិយាយបានថា ដើម្បីគាំទ្របេក្ខភាពសម្តេចតេជោ ហ៊ុន សែន ធ្វើជានាយករដ្ឋមន្ត្រីបន្ត។
យោងតាមរបាយការណ៍របស់លោកស្រីអភិបាលស្រុកក្រឡាញ់បានបង្ហាញដឹងថា លទ្ធផលបោះឆ្នោតជ្រើសតាំងតំណាងរាស្ត្រនីតិកាលទី៦នេះ ក្នុងចំណោមក្រុង-ស្រុកទាំង១២របស់ខេត្តសៀមរាប ស្រុកក្រឡាញ់ទទួលបានសម្លេងឆ្នោតគាំទ្រគណបក្សប្រជាជនកម្ពុជា ៨១.៩២% ក្នុងនេះឃុំស្រណាលនៃស្រុកក្រឡាញ់ ជាប់ចំណាត់ថ្នាក់លេខ១ ដែលទទួលបានសម្លេងគាំទ្រក្នុងអត្រាភាគរយច្រើនជាងគេ ក្នុងចំណោមឃុំទាំង១០គឺ ៨៥.៧៦% ហើយភូមិផ្លាំង ជាភូមិល្អជាងគេផងដែរ ទូទាំងឃុំស្រណាលទាំងមូល ។
( សម្លេងដើម ឯកឧត្តម សៀងណាំ ) (មានក្នុងវីដេអូ)
ក្នុងវត្តមានជាលើកដំបូង ជួបប្រជាពលរដ្ឋនៅមូលដ្ឋាន បន្ទាប់ពីមានការប្រកាសចូលកាន់តំណែងជាអភិបាលខេត្តសៀមរាប ឯកឧត្តម ទៀ សីហា មានប្រសាសន៍នៅក្នុងពិធីសម្ពោធផ្លូវបេតុងនោះថា ៖ ក្រោមប្លប់សន្តិភាពនៃគោលនយោបាយ ឈ្នះ ឈ្នះ និង ការដឹកនាំប្រកបដោយគតិបណ្ឌិត សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រី នៃព្រះរាជាណាចក្រកម្ពុជា ប្រទេសជាតិទទួលបាននូវវឌ្ឍនភាពសង្គម ជម្រុញល្បឿន នៃការអភិវឌ្ឍប្រទេសលើគ្រប់វិស័យ ។
ក្រោមកិច្ចខិតខំប្រឹងប្រែងរបស់អាជ្ញាធរមូលដ្ខានគ្រប់ជាន់ថ្នាក់ សមត្ថកិច្ច និងមន្ទីរអង្គភាពពាក់ព័ន្ធ លើការអនុវត្តយ៉ាងសកម្ម គោលនយោបាយ និងយុទ្ធសាស្ត្រចតុកោណពីមួយដំណាក់កាល ទៅមួយដំណាក់កាល បានជម្រុញឲ្យខេត្តសៀមរាប មានការអភិវឌ្ឍគួរឲ្យកត់សម្គាល់ តាមរយៈ នៃការកសាងនិងកែលម្អហេដ្ឋារចនាសម្ព័ន្ធសង្គមនានាជាច្រើន ទាំងនៅទីក្រុងនិងជនបទ ។
ឯកឧត្តម វាយតម្លៃថា នេះគឺជាសមិទ្ធផលថ្មីមួយទៀត ដែលបង្ហាញអំពីការអភិវឌ្ឍក្នុងវិស័យគមនាគមន៍ជនបទ ដែលផ្លូវបេតុងមួយខ្សែនេះ មិនត្រឹមតែបម្រើផលប្រយោជន៍សម្រាប់បងប្អូនប្រជាពលរដ្ឋរស់នៅក្នុងភូមិផ្លាំង ឃុំស្រណាលប៉ុណ្ណោះទេ តែត្រូវបានប្រើប្រាស់ជាប្រយោជន៍សាធារណៈសម្រាប់ប្រជាជនទូទៅ បង្កលក្ខណៈងាយស្រួល សម្រាប់ការធ្វើដំណើរទៅមក ការដឹកជញ្ជូនដើម្បីប្រកបអាជីវកម្ម ដើរតួនាទីយ៉ាងសំខាន់ក្នុងកិច្ចការពារសន្តិសុខ សណ្តាប់ធ្នាប់សាធារណៈ និងសុខមាលភាពសង្គម លើកកម្ពស់ជីវភាពរស់នៅ រួមចំណែកកាត់បន្ថយភាពក្រីក្ររបស់ប្រជាពលរដ្ឋ ។
( បទសម្ភាសន៍ស្តីពីចំណាប់អារម្មណ៍របស់ប្រជាពលរដ្ឋ )(មានក្នុងវីដេអូ)
អត្ថបទ និង រូបថត : លោក ងិន គឹមឡេង
សម្រួលអត្ថបទៈ លោក សេង ផល្លី
