ថ្លែងបើកអង្គសិក្ខាសាលា កាលពីថ្ងៃទី១៨ខែធ្នូឆ្នាំ២០១៨នៅខេត្តសៀមរាប ឯកឧត្តម ឈួ អ៊ីម៉េង អនុរដ្ឋលេខាធិការក្រសួងសុខាភិបាល មានប្រសាសន៍ថា៖ ក្រសួងសុខាភិបាលចាត់ទុក ការងារសុខភាពមាតា និងទារកជាការងារអាទិភាព ស្របទៅតាមគោលនយោបាយជាតិក្នុងការកាត់បន្ថយអត្រាស្លាប់របស់មាតា និងកុមារ ក្រោមការដឹកនាំដ៍ឈ្លាសវៃរបស់ សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រី សម្រេចបាននូវសមិទ្ឋផល ដោយកាត់បន្ថយអត្រាស្លាប់របស់មាតាឱ្យថយចុះជិត៣ដង ពី៤៣៧ ក្នុងចំណោមទារកកើតរស់១០០,០០០នាក់ក្នុងឆ្នាំ២០០០ មកនៅប្រមាណ១៧០ក្នុងចំណោមទារកកើតរស់១០០,០០០នាក់នៅក្នុងឆ្នាំ២០១៤។
អត្រាស្លាប់កុមារអាយុក្រោម៥ឆ្នាំបានថយចុះជិត៤ដងពី១២៤ក្នុងចំណោមកើតរស់១,០០០នាក់នៅឆ្នាំ២០០០ មកនៅ៣៥ក្នុងចំណោមទារកកើតរស់១,០០០នាក់នៅក្នុងឆ្នាំ២០១៤។អត្រាស្លាប់ទារកបានថយចុះពី៣៧ ក្នុងចំណោមទារកកើតរស់១,០០០នាក់នៅឆ្នាំ២០០០ មកនៅ១៨ក្នុងចំណោមទារកកើតរស់១,០០០នាក់នៅឆ្នាំ២០១៤។
ឯកឧត្តម អនុរដ្ឋលេខាធិការបន្តថា ផ្អែកតាមរបាយការណ៍នេះ អាចបញ្ជាក់បានថា កម្ពុជាអាចនឹងឈានទៅសម្រេចបានគោលដៅក្នុងផែនទីចង្អុលផ្លូវសម្រាប់ពន្លឿនការកាត់បន្ថយអាត្រាស្លាប់របស់មាតានិងទារកនិងផែនការសកម្មភាពរយៈពេល៥ឆ្នាំសម្រាប់ការថែទាំទារក ដែលបានកំណត់អត្រាស្លាប់របស់ទារកឱ្យថយចុះមកនៅត្រឹម១៤ក្នុងចំណោមទារកកើតរស់១,០០០នាក់នៅឆ្នាំ២០២០។ ប៉ុន្តែអត្រានេះ បើប្រៀបធៀបជាមួយអត្រាការស្លាប់របស់កុមារអាយុក្រោម៥ឆ្នាំនិងអត្រាស្លាប់របស់ទារកនៅកម្ពុជា ទៅនឹងប្រទេសក្នុងសហគមន៍អាស៊ាន ឃើញថា អាត្រាស្លាប់នេះ កម្ពុជាយើងស្ថិតនៅខ្ពស់ជាងគេនៅឡើយ។
ព័ត៌មានជាតិ ថ្មីៗ
ឯកឧត្តម បញ្ជាក់ថា មូលហេតុនៃការស្លាប់របស់ទារក មានដូចជាការថប់ដង្ហើមនៅពេលកើត ទារកកើតមិនគ្រប់ខែនិងទម្ងន់ទាប និងជម្ងឺយាយីដោយមេរោគនៅលើទារក តែបញ្ហាទាំងនេះអាចបង្ការនិងព្យាបាលបាន ហើយដើម្បីកាត់បន្ថយការស្លាប់របស់ទារកទើបនឹងកើតនិងការស្លាប់របស់កុមារអាយុក្រោម៥ឆ្នាំ ក្រសួងសុខាភិបាលបានដាក់ឱ្យប្រើប្រាស់នូវផែនការសកម្មភាពរយៈពេល៥ឆ្នាំសម្រាប់ការថែទាំទារកឆ្នាំ២០១៦ ដល់២០២០ និងបង្កើតគោលការនែនាំជាតិជាច្រើន សម្រាប់ការអនុវត្តន៍ថែទាំសារវន្តទារកទើបនឹងកើត សមស្របទៅនឹងស្ថានភាពនិងបរិបទជាក់ស្តែងនៃសេវាសុខាភិបាលក្នុងប្រទេសបច្ចុប្បន្ន ជាពិសេសវិធីសាស្ត្រសាមញ្ញៗមួយចំនួនដែលបាននឹងកំពុងអនុវត្តយ៉ាងទូលំទូលាយនៅតាមសេវាសុខាភិបាលមូលដ្ឋាន ដូចជាការថែទារកទើបនឹងកើតភ្លាមដោយការជូតសម្ងួតទារក ដាក់ទារកឱ្យស្បែកប៉ះទៅនឹងស្បែកម្តាយ គាបនិងកាត់ទងផ្ចិតនៅពេលជីពចរឈប់លោត ជួយសង្គ្រោះទារកកើតមកមិនដកដង្ហើម និងការអន្តរាគមន៍មួយចំនួនទៀត ទាំងការបំបៅដោះដំបូង ថ្លឹងទម្ងន់ទារក បន្តក់ថ្នាំភ្នែក ចាក់ថ្នាំបង្ការផ្សេងៗជាដើម សុទ្ឋតែបានដាក់បញ្ចូលទៅក្នុងបញ្ជីឱសថសារវន្ត។
ដើម្បីឱ្យការថែទាំសុខភាពកុមារនៅកម្ពុជាឱ្យកាន់តែល្អប្រសើរថែមទៀត ឯកឧត្តម ឈួ អ៊ីម៉េង បានជម្រុញនិងអំពាវនាវឱ្យមានការសហការគ្នាឱ្យបានជិតស្និទ្ឋរវាងស្ថាប័ននិងដៃគូរអភិវឌ្ឍនានា ដើម្បីពង្រឹងគុណភាពនៃសេវាថែទាំទាំងនៅថ្នាក់ជាតិនិងនៅថ្នាក់ក្រោមជាតិ និងបន្តគាំទ្របច្ចេកទេសថវិកាក្នុងការអនុវត្តផែនការសកម្មភាពសម្រាប់ការថែទាំកុមារនិងការថែទាំជាសារវន្តទារកទើបនឹងកើត ជាពិសេសពង្រីកការគ្របដណ្តប់នៃការពង្រឹងគុណភាពសេវាថែទាំជាសារវន្តទារកទើបនឹងកើតទៅខេត្តផ្សេងៗទៀត។
សូមបញ្ជាក់ថា៖ក្រសួងសុខាភិបាលបានរៀបចំសិក្ខាសាលាប្រចាំឆ្នាំដើម្បីពិនិត្យឡើងវិញអំពីសុខភាពរបស់កុមារនិងវឌ្ឍនភាពនៃកការអនុវត្តន៍ការថែទាំជាសារវន្តទារកទើបនឹងកើត ពីថ្ងៃទី១៨ដល់ថ្ងៃទី១៩ខែធ្នូឆ្នាំ២០១៨នៅសណ្ឋាគារសោមាទេវីខេត្តសៀមរាប ដោយមានវត្តមានអញ្ជើញចូលរួមតំណាងដៃគូរអភិវឌ្ឍន៍សុខាភិបាលនិងថ្នាក់ដឹកនាំនាយកដ្ឋាន កម្មវិធីជាតិនិងថ្នាក់ដឹកនាំនៃមន្ទីរសុខាភិបាល រាជធានីខេត្តទាំង២៥ និងអ្នកទទួលបន្ទុកការងារសុខភាព មាតានិងទារក ផងដែរសរុបចំនួន១៦០នាក់។
អត្តបទ៖ យូ វង្ស និងងិន គីមឡេង
