បន្ទាប់ពីឆ្លងតាមវគ្គបណ្តុះបណ្តាលកម្រិតបឋមវិជ្ជាជីវៈនគរបាលលើកទី២ រយៈពេល៤ខែ សិស្សនគរបាលថ្មីចំនួន១៨៣នាក់ នៃសាលានគរបាលជាតិភូមិភាគ៤ ខេត្តសៀមរាប បានបញ្ចប់វគ្គបណ្ដុះបណ្ដាលដោយជោគជ័យ និងរៀបចំពិធីបិទវគ្គបណ្តុះបណ្តាលជាផ្លូវការ នៅថ្ងៃទី២១ ខែតុលា ឆ្នាំ២០២៤នេះ ក្រោមអធិបតីភាព ឯកឧត្តម ឧត្តមសេនីយ៍ឯក សាស្ត្រាចារ្យ ប្រាក់ ណារ៉ុង អនុប្រធានបណ្ឌិត្យសភានគរបាលកម្ពុជា។
ឯកឧត្តម ឧត្តមសេនីយ៍ឯក សាស្ត្រាចារ្យ ប្រាក់ ណារ៉ុង មានប្រសាសន៍ថា ក្រសួងមហាផ្ទៃ បានយកចិត្តទុកដាក់ និងផ្តល់អាទិភាពខ្ពស់ ដល់ការងារអប់រំបណ្តុះបណ្តាល ព្រមទាំងបានដាក់ចេញនូវផែនការកំណែទម្រង់លើកងកម្លាំងនគរបាលជាប់ជាប្រចាំ ស្របតាមគោលនយោបាយរបស់រាជរដ្ឋាភិបាល ដោយបានផ្តោតសំខាន់ ទៅលើការធ្វើទំនើបកម្ម និងការពង្រឹងសមត្ថភាព វិជ្ជាជីវ: នៃកងកម្លាំងនគរបាលជាតិ ឱ្យស្របទៅនឹងការវិវត្តនៃស្ថានការសន្តិសុខជាតិ និងអន្តរជាតិ ព្រមទាំងឆ្លើយតបនិងតម្រូវការ នៃអង្គភាពនគរបាល។ ជាពិសេសនោះស្របតាមកម្មវិធីនយោបាយ និងយុទ្ធសាស្ត្របញ្ចកោណរបស់រាជរដ្ឋាភិបាលនីតិកាលទី៧ ក្រោមការដឹកនាំរបស់សម្តេចធិបតី ហ៊ុន ម៉ាណែត នាយករដ្ឋមន្ត្រី។
ព័ត៌មានជាតិ ថ្មីៗ
ឯកឧត្តម ប្រាក់ ណារ៉ុង បានផ្តាំផ្ញើដល់សិស្សនគរបាលជ័យលាភីទាំងអស់ ត្រូវគោរពឱ្យបាននូវបទបញ្ជា អង្គការវិន័យរបស់កងកម្លាំងនគរបាល ព្រមទាំងបានផ្តល់នូវអនុសាសន៍ និងបទពិសោធល្អៗមួយចំនួន ដល់សិស្សនគរបាលទាំងអស់ សម្រាប់យកទៅអនុវត្ត ជាមន្ត្រីនគរបាលយុត្តិធម៌ និងការបម្រើសេវាសាធារណៈជូនប្រជាពលរដ្ឋ ក្នុងការធានាបាននូវសន្តិសុខ សណ្តាប់ធ្នាប់សុវត្ថិភាពនៅក្នុងមូលដ្ឋានខ្លួន។ ជាពិសេសនៅពេលចេញទៅបម្រើការងារនៅតាមមូលដ្ឋានខ្លួន ត្រូវបន្តធ្វើការសិក្សាស្វែងយល់ជំនាញរបស់ខ្លួនបន្ថែមទៀត ព្រមទាំងរក្សានូវក្រមសីលធម៌ វិជ្ជាជីវៈជាមន្ត្រីនគរបាលយុត្តិធម៌ ក្នុងការបម្រើប្រជាពលរដ្ឋ ដោយប្រកាន់ភ្ជាប់នូវសុភាសិតមួយឃ្លាលើកឡើងថា “នៅឱ្យគេស្រឡាញ់ ពេលចាកចេញឱ្យគេនឹករលឹក” ។
ជាមួយគ្នានោះ ឯកឧត្តម ក៏បានថ្លែងកោតសរសើរដល់សិស្សនគរបាលជ័យលាភីទាំងអស់ ដែលបានខិតខំសិក្សាហ្វឹកហាត់ និងគោរពវិន័យរបស់សាលាបានល្អ រហូតទទួលបានជោគជ័យ ព្រមទាំងបានផ្តាំផ្ញើដល់ប្អូនៗឱ្យយកចំណេះដឹង និងជំនាញទៅប្រើប្រាស់ឱ្យមានប្រយោជន៍ដល់អង្គភាព និងសង្គមជាតិ ហើយកុំប្រព្រឹត្តិអ្វីដែលខុសពីតួនាទី និងច្បាប់៕
អត្ថបទ និង រូបភាព៖ លោក ម៉ី សុខារិទ្ធ
កែសម្រួល៖ លោក អ៊ុន ណារាជ្យ
