នៅថ្ងៃទី២២ ខែតុលា ឆ្នាំ២០២៤នេះ គណៈកម្មការ អាចារ្យ និងប្រជាពុទ្ធបរិស័ទជិតឆ្ងាយបានមូលមតិគ្នា ដង្ហែអង្គកឋិនទានមហាសាមគ្គី យកទៅវេរប្រគេនដល់ភិក្ខុសង្ឃនៃវត្តអារញ្ញសាគរ ក្នុងសង្កាត់សៀមរាប ក្រុងសៀមរាប ដើម្បីទំនុកបំរុងដល់ព្រះភិក្ខុសង្ឃដែលគង់ចាំវស្សាអស់រយៈពេលបីខែកន្លងមក ទៅតាមព្រះវិន័យដែលព្រះពុទ្ធបានបញ្ញតិទុកមក និងប្រមូលបច្ច័យសម្រាប់បន្តកសាងមហាកុដិក្នុងវត្ត។
ព្រះវិភត្តិមុនីញាណ ហ៊ាក់ គឹមហ៊ត់ វិសារទោ ព្រះគ្រូចៅអធិការវត្តអារញ្ញសាគរ មានសង្ឃដីកាបញ្ជាក់ថា បច្ច័យអមត្រៃនៃអង្គកឋិននាពេលនេះ មានចំនួនជាង ៦១លានរៀល ហើយបច្ច័យទាំងនេះនឹងបែងចែកទុកផ្គត់ផ្គង់ចង្ហាន់ប្រចាំថ្ងៃព្រះសង្ឃគង់ក្នុងវត្តចំនួន ៣៧អង្គ និងមួយចំនួនធំយកទៅបន្តសាងសង់មហាកុដិថ្មី ដែលចាប់ផ្តើមកសាងតាំងពីឆ្នាំ២០២១មក មានបណ្តោយ៣៦ម៉ែត្រ ទទឹង១២ម៉ែត្រ ដែលគ្រោងចំណាយថវិកាប្រមាណ ២០ម៉ឺនដុល្លារ ដោយបច្ចុប្បន្នសមិទ្ធផលថ្មីនេះសម្រេចបានជាង ៦៥ភាគរយហើយ។
ព្រះវិភត្តិមុនីញាណ ហ៊ាក់ គឹមហ៊ត់ បានសម្ដែងនូវព្រះទ័យសោមនស្សសាទរ ចំពោះសទ្ធាជ្រះថ្លារបស់ប្រជាពុទ្ធបរិស័ទជិតឆ្ងាយដែលបានស្រុះស្រួលគ្នាដង្ហែអង្គកឋិននេះឡើង សបញ្ជាក់ឱ្យឃើញពីស្មារតីសាមគ្គីជួយគ្នាទ្រទ្រង់ព្រះពុទ្ធសាសនាឱ្យបានចម្រើនរុងរឿងគង់វង់នៅយូរអង្វែង បានផ្តល់កម្លាំងកាយ ចិត្តឱ្យដល់ព្រះភិក្ខុសង្ឃ ជាសាសនាទាយាទបន្តអាយុព្រះពុទ្ធសាសនាតទៅ។ ជាមួយនោះព្រះអង្គ ក៏បានអំពាវនាវដល់សប្បុរសជនជិតឆ្ងាយ សូមបន្តបរិច្ចាគធនធានថវិកា សម្ភារៈ ដើម្បីសមិទ្ធផលមួយនេះឆាប់រួចរាល់ ទុកជាសម្បត្តិគរុភ័ណ្ឌវត្តប្រើប្រាស់ឱ្យព្រះសង្ឃគង់ស្នាក់អាស្រ័យ និងជួយសម្រួលដល់ញាតិញោមមកបំពេញបុណ្យទានផងដែរ៕
ព័ត៌មានជាតិ ថ្មីៗ
អត្ថបទ និងរូបថត៖ លោក យូ វង្ស
កែសម្រួល៖ លោក អ៊ុន ណារាជ្យ
