នៅព្រឹកថ្ងៃទី២៣ ខែតុលា ឆ្នាំ២០២៤នេះ លេខធិការដ្ឋានរៀបចំការបោះឆ្នោតខេត្ដសៀមរាប បានរៀបចំកិច្ចប្រជុំផ្សព្វផ្សាយស្តីពីការបិទផ្សាយបញ្ជីបោះឆ្នោតដំបូង និងបញ្ជីឈ្មោះអ្នកបោះឆ្នោតដែលនឹងត្រូវលុបចេញពីបញ្ជីបោះឆ្នោត សម្រាប់ការពិនិត្យបញ្ជីឈ្មោះ និងការចុះឈ្មោះបោះឆ្នោត ឆ្នាំ២០២៤ ដឹកនាំដោយ លោក នឹម វ៉ាន់សំ ប្រធានលេខធិការដ្ឋានរៀបចំការបោះឆ្នោតខេត្ដសៀមរាប ដោយមានការចូលរួមពីតំណាងគណបក្សនយោបាយ អង្គការសង្គមស៊ីវិល និងអ្នកពាក់ព័ន្ធមួយចំនួនទៀត។
លោក នឹម វ៉ាន់សំ មានប្រសាសន៍ថា ដើម្បីធានាបាននូវបញ្ជីបោះឆ្នោតកាន់តែមានភាពត្រឹមត្រូវ ពេញលេញនូវបច្ចុប្បន្នភាព និងរក្សាបានសិទ្ធិបោះឆ្នោតរបស់អ្នកមានឈ្មោះក្នុងបញ្ជីបោះឆ្នោត គណៈកម្មាធិការជាតិរៀបចំការបោះឆ្នោត ហៅកាត់ថា គ.ជ.ប បានណែនាំដល់លេខាធិការដ្ឋានរាជធានីខេត្តរៀបចំការបោះឆ្នោត ហៅកាត់ថា ល.ធ.ខ.ប ក្រុមប្រឹក្សាឃុំសង្កាត់ ហៅកាត់ថា ក.ប.ឃ.ស និងមេភូមិ ត្រូវយកចិត្តទុកដាក់ពិនិត្យផ្ទៀងផ្ទាត់ឈ្មោះ និងទិន្នន័យ នៅក្នុងបញ្ជីបោះឆ្នោតដំបូង និងបញ្ជីឈ្មោះអ្នកបោះឆ្នោតដែលនឹងត្រូវលុបចេញពីបញ្ជីបោះឆ្នោត ឆ្នាំ២០២៤ ដែលបានបិទផ្សាយនៅតាមឃុំ សង្កាត់ពាក់ព័ន្ធរបស់ខ្លួន។
លោក នឹម វ៉ាន់សំ បន្ដថា ប្រសិនបើមានករណីពិនិត្យឃើញថា ឈ្មោះ និងទិន្នន័យអ្នកបោះឆ្នោតណាម្នាក់ ត្រូវបានស្រង់ចូលក្នុងបញ្ជីឈ្មោះអ្នកបោះឆ្នោតដែលនឹងត្រូវលុបពីបញ្ជីបោះឆ្នោតឆ្នាំ២០២៤ ប៉ុន្តែបុគ្គលនោះបាននឹងកំពុងស្នាក់នៅក្នុងឃុំសង្កាត់ ក.ប.ឃ.ស ត្រូវសហការជាមួយមេភូមិ និងសាមីខ្លួនរកឯកសារសំអាងត្រឹមត្រូវ ដើម្បីប្តឹងតវ៉ាសុំរក្សាទុកឈ្មោះក្នុងបញ្ជីបោះឆ្នោតនៃឃុំសង្កាត់នេះវិញ។ បើពិនិត្យឃើញថា ឈ្មោះ និងទិន្នន័យអ្នកបោះឆ្នោត ត្រូវបានស្រង់ចូលក្នុង ទ.១០២៥ ដោយមូលហេតុទទួលមរណភាព ឬដកហូតជាបណ្តោះអាសន្ននូវសិទ្ធិបោះឆ្នោត ឬលុបឈ្មោះចេញពីបញ្ជីបោះឆ្នោត ឬផ្លាស់ចេញ ដែលត្រូវបានលុបឈ្មោះដោយក្រុមចុះឈ្មោះបោះឆ្នោត ប៉ុន្តែ គ.ជ.ប បានរក្សាទុកឈ្មោះវិញ ឬក្រុមចុះឈ្មោះបោះឆ្នោត មិនបានលុបឈ្មោះ ដោយសារពុំមានឯកសារសំអាងត្រឹមត្រូវច្បាស់លាស់ ក.ប.ឃ.ស ត្រូវសហការជាមួយមេភូមិ ឬសាច់ញាតិរៀបចំឯកសារភស្តុតាងបន្ថែម ដើម្បីប្តឹងជំទាស់លុបឈ្មោះបុគ្គលនោះចេញពីបញ្ជីបោះឆ្នោត ឆ្នាំ២០២៤។
លោកបានស្នើឱ្យប្រជាពលរដ្ឋខ្មែរ ដែលបានចុះឈ្មោះបោះឆ្នោតរួចហើយ ត្រូវទៅពិនិត្យមើលឈ្មោះរបស់ខ្លួន នៅក្នុងបញ្ជីបោះឆ្នោតដំបូង និងបញ្ជីឈ្មោះអ្នកបោះឆ្នោតដែលនឹងត្រូវលុបចេញពីបញ្ជីបោះឆ្នោត ដែលត្រូវបិទផ្សាយនៅ ថ្ងៃទី២៣ ខែតុលា ឆ្នាំ២០២៤។ ចំពោះបញ្ជីបោះឆ្នោតដំបូង និងបញ្ជីឈ្មោះអ្នកបោះឆ្នោតដែលនឹងត្រូវលុបចេញពីបញ្ជីបោះឆ្នោត មានបិទផ្សាយនៅតាមសាលាឃុំសង្កាត់ និងនៅទីតាំងណាមួយក្នុងឃុំ សង្កាត់ទូទាំងប្រទេស ព្រមទាំងមានផ្សព្វផ្សាយតាម គេហទំព័ររបស់ គ.ជ.ប ដែលមានអាសយដ្ឋាន voterlist.nec.gov.kh ឬចូលរកតាមកម្មវិធីទូរសព្ទ (App) NEC KH៕
អត្ថបទ និងរូបភាព៖ លោក បូ សាវី
កែសម្រួល៖ លោក អ៊ុន ណារាជ្យ
