នាព្រឹកថ្ងៃទី២៣ ខែតុលា ឆ្នាំ២០២៤នេះ ឯកឧត្តម លី សំរិទ្ធ ប្រធានក្រុមប្រឹក្សាខេត្តសៀមរាប បានទទួលជួបពិភាក្សាការងារ និងទទួលជំនួយនូវរថយន្តពន្លត់អគ្គិភ័យ និងរថយន្តសង្គ្រោះ ៤គ្រឿង ពីសភាខេត្ត Gyeonggi-do នៃសាធារណរដ្ឋកូរ៉េ ដឹកនាំដោយ ឯកឧត្តម Kim Jin Kyung ប្រធានសភាខេត្ត Gyeonggi-do ដោយមានការចូលរួមពីឯកឧត្តម លោកជំទាវសមាជិកក្រុមប្រឹក្សាខេត្ត លោកស្នងការនគរបាលខេត្ត និងប្រតិភូអមដំណើរមួយចំនួនទៀត។
ឯកឧត្តម លី សំរិទ្ធ បានគូសបញ្ជាក់ថា ខេត្តសៀមរាប បានបង្កើតនូវចំណងសម្ព័ន្ធមេត្រីភាពខេត្តក្រុងស្រុក នៅតាមបណ្តាប្រទេសមួយចំនួន សំខាន់ចងសម្ព័ន្ធជាមួយខេត្តក្រុងចំនួន៤ នៃសាធារណរដ្ឋកូរ៉េ។ ចំពោះសមិទ្ធផលនៃកិច្ចសហប្រតិបត្តិការរបស់មិត្តកូរ៉េ នៅលើទឹកដីខេត្តសៀមរាប ទៅលើហេដ្ឋារចនាសម្ព័ន្ធផ្លូវថ្នល់ មន្ទីរពេទ្យ និងការផ្តល់នូវរថយន្តសង្គ្រោះ រថយន្តពន្លត់អគ្គិភ័យ ដើម្បីយកមកបម្រើការងារសង្គ្រោះ នៅក្នុងខេត្តសៀមរាប។
ឯកឧត្តម លី សំរិទ្ធ បន្តថា ក្រោមកិច្ចដឹកនាំរបស់សម្តេចធិបតី ហ៊ុន ម៉ាណែត ជាចក្ខុវិស័យសម្រាប់ឆ្នាំ២០៣០នេះ បានរុញកម្ពុជាឱ្យចាកផុតពីប្រទេសក្រីក្រ ឱ្យក្លាយទៅជាប្រទេសមានចំណូលមធ្យមកម្រិតខ្ពស់។ ក្នុងនោះរាជរដ្ឋាភិបាល បានដាក់ចេញគោលនយោបាយជាច្រើន ក្នុងការកំណែទម្រង់រាជរដ្ឋាភិបាល សំខាន់កំណែទម្រង់សេដ្ឋកិច្ច រដ្ឋបាល ប្រព័ន្ធយុត្តិធម៌ កត្តាទាំងនេះក៏ផ្តើមចេញពីកិច្ចទំនាក់ទំនងអន្តរជាតិផងដែរ។
ក្នុងនាមអាជ្ញាធរខេត្ត ឯកឧត្តមប្រធាន សូមថ្លែងអំណរគុណដល់គណៈប្រតិភូខេត្ត Gyeonggi-do ដែលបានលើកឡើងពីតម្រូវការពលករទៅធ្វើការងារនៅប្រទេសកូរ៉េ ក៏ជាការផ្តល់ឱកាសដល់ពលករកម្ពុជា បានទៅបម្រើការងារនៅកូរ៉េ ដែលមានប្រាក់ចំណូលខ្ពស់។ ក្នុងកិច្ចទំនាក់ទំនងនេះដែរ នឹងផ្តល់ដល់អ្នកវិនិយោគសំខាន់ៗ មកពីបណ្តាប្រទេសនានាចូលមកវិនិយោគនៅកម្ពុជា សំខាន់វិនិយោគនៅខេត្តសៀមរាប។ ឯកឧត្តមក៏សង្ឃឹមជឿជាក់ថា កិច្ចទំនាក់ទំនងនេះ នឹងធ្វើឱ្យចំណងមិត្តភាពប្រទេសទាំងពីរ និងសម្ព័ន្ធមេត្រីភាពនៃខេត្តទាំងពីរ កាន់តែស្អិតរមួតរឹងមាំ យូអង្វែង និងធ្វើឱ្យអ្នកវិយោគមកពីខេត្ត Gyeonggi-do មកបណ្តាក់ទុនលើវិស័យទេសចរណ៍ វប្បធម៌ កសិកម្ម និងសេវាកម្មផ្សេងៗ នៅខេត្តសៀមរាបបន្ថែមទៀត។
ឯកឧត្តម Kim Jin Kyung មានប្រសាសន៍ដែរថា ខេត្តសៀមរាប និង ខេត្ត Gyeonggi-do បានធ្វើកិច្ចសហប្រតិបត្តិការទំនាក់ទំនងល្អនឹងគ្នា ព្រមទាំងបានធ្វើការសិក្សាស្វែងយល់អំពីសក្តានុពលរវាងខេត្តទាំងពីរ ដោយផ្តោតសំខាន់លើវិស័យទេសចរណ៍ វប្បធម៌ កសិកម្ម អប់រំ សុខាភិបាល ពាណិជ្ជកម្មជាដើម។ ដោយវិបត្តិជំងឺកូវីដ-១៩ កិច្ចទំនាក់ទំនងត្រូវបានអាក់ខានមួយរយៈ តែខេត្តយើងទាំងពីរ បានទំនាក់ទំនងកិច្ចសហប្រតិបត្តិការតាមប្រព័ន្ធអនឡាញបានល្អនឹងគ្នា។ហើយខេត្តទាំងពីរ ក៏បានជំរុញសកម្មភាពរបស់ថ្នាក់ដឹកនាំខេត្តទាំងពីរ ក្នុងការពង្រឹងកិច្ចសហប្រតិបត្តិការល្អនឹងគ្នាសំខាន់ខេត្តសៀមរាប។
ឯកឧត្តមបន្តថា ខេត្តសៀមរាប ជាខេត្តសម្បូរទៅដោយសម្បត្តិវប្បធម៌ប្រវត្តិសាស្ត្រ ដែលពោពេញទៅដោយប្រាង្គប្រាសាទល្បីៗ ដែលជាសម្បត្តិបេតិកភណ្ឌពិភពលោក។ ចំពោះជំនួយជាសម្ភារៈ បរិក្ខា រថយន្តនេះ ផ្ដល់មកខេត្តសៀមរាបនេះ នឹងធានាបានល្អនូវផ្នែកសន្តិសុខ សុវត្ថិភាព និង ការ ជួយសង្គ្រោះផ្សេងៗផងដែរ៕
អត្ថបទ និងរូបភាព៖ លោក ម៉ី សុខារិទ្ធ
កែសម្រួល៖ លោក អ៊ុន ណារាជ្យ
