ខេត្តសៀមរាប ជាខេត្តគោលដៅទេសចរប្រវត្តិសាស្ត្រដ៏ធំសម្រាប់កម្ពុជា ដូច្នេះការគ្រប់គ្រង ទុកដាក់សំរាម គឺជាបញ្ហាអាទិភាពមួយដែលទាមទារឱ្យគ្រប់អ្នកពាក់ព័ន្ធ និងពលរដ្ឋទូទៅ ចូលរួមទាំងអស់គ្នាលើបញ្ហាគ្រប់គ្រងសំរាមនេះ។
លោក ពៀច ប៉ូន ប្រធានការិយាល័យគាំពារបរិស្ថាន នៃមន្ទីរបរិស្ថានខេត្តសៀមរាប នៅថ្ងៃទី២៤ ខែតុលា ឆ្នាំ២០២៤នេះ បានបញ្ជាក់ថា បច្ចុប្បន្ន ខេត្តសៀមរាប មានទីលានចាក់សំរាម ២កន្លែង ស្ថិតក្នុងស្រុកប្រាសាទបាគង មានទំហំជិត៨ហិកតា ដែលវិនិយោគដោយក្រុមហ៊ុន ហ្គាអ៊ែរ (Gaea) និង ក្រុមហ៊ុន ស៊ិនទ្រី។ ប៉ុន្តែទីលានទាំង២ ជាទីលានចំហរ និងមិនទាន់ផ្តោតលើលក្ខណៈបច្ចេកទេសត្រឹមត្រូវទេ ដូច្នេះទើបក្រសួង និងអាជ្ញាធរខេត្ត បាននិងកំពុងរៀបចំទីតាំងចាក់សំរាមថ្មីមួយកន្លែងទៀត ដែលមានលក្ខណៈបច្ចេកទេស ស្ដង់ដារ និងអនាម័យដែលមានទីតាំងនៅស្រុកប្រាសាទបាគង ដូចគ្នា។
លោកប្រធានការិយាល័យ បញ្ជាក់បន្ថែមថា តាមរយៈមន្ទីរបរិស្ថានខេត្ត ដែលជាសេនាធិការក្នុងការគាំទ្របច្ចេកទេសដល់រដ្ឋបាលក្រុងស្រុកទាំង១៣ នៃខេត្តសៀមរាប ដើម្បីគ្រប់គ្រងសំរាម ជាក់ស្ដែងស្ថានភាពនៃការយល់ដឹងពីការទុកដាក់ និងគ្រប់គ្រងពីសំរាមរបស់ប្រជាពលរដ្ឋហាក់មានភាពល្អប្រសើរ និងមានការទំនួលខុសត្រូវខ្ពស់។
លោកក៏បានសំណូមពរដល់ប្រជាពលរដ្ឋ ឬអ្នកពាក់ព័ន្ធទាំងអស់ ធ្វើយ៉ាងណាចូលរួមសហការឱ្យបានល្អ សម្រាប់ការគ្រប់គ្រង និងទុកដាក់សំរាម ឬកាកសំណល់នៅទីប្រជុំជនឱ្យបានត្រឹមត្រូវ និងចូលរួមសំខាន់កាត់បន្ថយការប្រើប្រាស់ប្លាស្ទិច តាមរយៈយន្តការនៃការប្រើប្រាស់ផលិតផល ដែលអាចប្រើប្រាស់ឡើងវិញបាន ជាពិសេសចូលរួមថែរក្សាបរិស្ថានក្នុងខេត្តសៀមរាបយើង ឱ្យសក្កិសមជាខេត្តប្រវត្តិសាស្ត្រនៃប្រទេសកម្ពុជា ផងដែរ៕
អត្ថបទ៖ មន្ត្រីវិទ្យុ
កែសម្រួល៖ លោក អ៊ុន ណារាជ្យ
