នារសៀលថ្ងៃទី២៤ ខែតុលា ឆ្នាំ២០២៤ម្សិលមិញនេះ នៅសាលាខេត្តសៀមរាប មានរៀបចំកិច្ចប្រជុំត្រួតពិនិត្យវឌ្ឍនភាពការងាររបស់អនុគណៈកម្មការបច្ចេកទេសរៀបចំពិធីបុណ្យអុំទូក បណ្តែតប្រទីប និងសំពះព្រះខែ អកអំបុក ដឹកនាំដោយលោក អុឹង គឹមលាង អភិបាលរងខេត្ត និងជាប្រធានអនុគណៈកម្មការបច្ចេកទេស ដោយមានការចូលរួមពីថ្នាក់ដឹកនាំ មន្ត្រីរាជការ និងអ្នកពាក់ព័ន្ធមួយចំនួនទៀត។
មានប្រសាសន៍ក្នុងឱកាសនោះ លោក អុឹង គឹមលាង បានណែនាំដល់ក្រុមការងារទាំងអស់ ត្រូវត្រួតពិនិត្យឱ្យបានត្រឹមត្រូវក្នុងការរៀបចំទីលានប្រកួតឱ្យបានល្អ ទាំងសោភ័ណ្ឌភាព បរិស្ថាន អនាម័យ និង ធានាសុវត្ថិភាពដល់ក្រុមកីឡាករ។ ម៉្យាងទៀត អនុគណៈកម្មការបច្ចេកទេស ត្រូវមើលការខុសត្រូវខ្ពស់លើការចាប់ផ្គូផ្គងទូក ទៅតាមប៉ូលនីមួយៗ ប្រកបដោយភាពសុក្រឹត្យ និងគ្រប់គ្រងឱ្យបានចំនួនកីឡាករ កីឡាការិនី ចំណុះទូកនីមួយៗឱ្យបានត្រឹមត្រូវ ទៅតាមឈ្មោះកីឡាករដែលគណៈកម្មការទទួលបាន។
លោកអភិបាលរងខេត្ត ក៏បានជំរុញដល់មន្ទីរអង្គភាព រដ្ឋបាលក្រុងស្រុក ដែលពុំទាន់មានទូក ត្រូវប្រញាប់កំណត់ទូក ដែលខ្លួនត្រូវធ្វើការឧបត្ថម្ភ គាំទ្រ ក្នុងការគ្រប់គ្រងឧបត្ថម្ភដល់កីឡាករក្នុងពេលហ្វឹកហាត់ និងកំណត់ទីកន្លែងស្នាក់នៅឱ្យបានច្បាស់លាស់។ ទូកចូលរួមប្រកួតត្រូវពិនិត្យផ្គូផ្គងវាយតម្លៃឱ្យច្បាស់លាស់ និងយុត្តិធម៌ ទៅលើកម្លាំងចំណុះទូក ក៏ដូចជាកម្លាំងត្រៀមជៀសវាងកើតមានបាតុភាពមិនល្អ ព្រោះថារដ្ឋបាលខេត្តសៀមរាប ក៏បានត្រៀមកញ្ចប់ថវិកាសម្រាប់ជ័យលាភីតាមលំដាប់លំដោយផងដែរ។
នៅរសៀលដដែលនោះដែរ អនុគណៈកម្មការផ្គត់ផ្គង់ អុជកាំជ្រួច និងបណ្តែតប្រទីប ក៏បានរៀបចំប្រជុំត្រួតពិនិត្យវឌ្ឍនភាពការងាររបស់អនុគណៈកម្មការរបស់ខ្លួនដូចគ្នា ក្រោមការដឹកនាំដោយរបស់ លោក ង៉ូវ សេងកាក់ អភិបាលរងខេត្ត និងជាប្រធានអនុគណៈកម្មការផ្គត់ផ្គង់ អុចកាំជ្រួច និងបណ្តែតប្រទីប។
ក្នុងនោះ លោក ង៉ូវ សេងកាក់ បានបញ្ជាក់ជូនអង្គប្រជុំដោយផ្តោតទៅលើការរៀបចំប្រទីបរបស់មន្ទីរអង្គភាព ត្រូវយកចិត្តទុកដាក់ខ្ពស់ពីសុវត្ថិភាពជាចំបង ចំពោះការរៀបចំខ្សែចរន្តអគ្គិសនី នៅតាមប្រទីបរបស់ខ្លួន។ ម៉្យាងទៀត ធ្វើយ៉ាងណាត្រូវរំលេចនូវអត្តសញ្ញាណ អត្ថន័យ ពីប្រទីបរបស់ខ្លួន ក្នុងការទាក់ទាញអារម្មណ៍ដល់មហាជន ភ្ញៀវទេសចរ ដែលចូលមកបានយល់ដឹងអំពីប្រវត្តិសាស្ត្រនៃខេត្តសៀមរាបផងដែរ៕
អត្ថបទ និង រូបភាព៖ លោក ម៉ី សុខារិទ្ធ
កែសម្រួល៖ លោក អ៊ុន ណារាជ្យ
