នៅព្រឹកថ្ងៃទី២៥ ខែតុលា ឆ្នាំ២០២៤នេះ មន្ទីររៀបចំដែនដី នគរូបនីយកម្ម សំណង់ និងសុរិយោដីខេត្តសៀមរាប សហការជាមួយអាជ្ញាធរស្រុកស្រីស្នំ បានចុះផ្សព្វផ្សាយសេចក្តីប្រកាសកំណត់តំបន់វិនិច្ឆ័យសម្រាប់ការចុះបញ្ជីដីធ្លីមានលក្ខណៈជាប្រព័ន្ធជូនប្រជាពលរដ្ឋស្ថិតនៅក្នុងភូមិចំនួន៧ រួមមាន ភូមិស្លែងតាវេត ភូមិពង្របត់ចាន់ ភូមិស្លែងគង់ ភូមិល្បើក ភូមិសំរោង ភូមិក្លាំងហាយ និងភូមគោកថ្កូវ ក្នុងឃុំក្លាំងហាយ នៃស្រុកស្រីស្នំ ដែលពិធីនេះធ្វើឡើងក្នុងបរិវេណវត្តពោធិ៍ល្បើក ក្រោមវត្តមាន លោក ហែន ពុទ្ធី អភិបាលរងខេត្តសៀមរាប ដោយមានការចូលរួមពីថ្នាក់ដឹកនាំមន្ទីរ អាជ្ញាធរមូលដ្ឋាន មន្ត្រីជំនាញ និងប្រជាពលរដ្ឋជាច្រើនរូប។
អនុប្រធានមន្ទីររៀបចំដែនដី នគរូបនីយកម្ម សំណង់ និងសុរិយោដីខេត្តសៀមរាប លោក ប៊ូ ជុំសម្បត្តិ មានប្រសាសន៍ថា ការចុះផ្សព្វផ្សាយនូវតំបន់វិនិច្ឆ័យសម្រាប់ការចុះបញ្ជីដីធ្លីមានលក្ខណៈជាប្រព័ន្ធនេះ គឺជាការជូនដំណឹងដល់ម្ចាស់ក្បាលដីទាំងអស់ ដើម្បីត្រៀមលក្ខណៈទៅលើទីតាំងដីរបស់ខ្លួន ដូចជាការពិនិត្យទៅលើព្រំដីរបស់ខ្លួន និងអ្នកជាប់ព្រំឱ្យមានការឯកភាពគ្នា បញ្ចៀសទំនាស់អំឡុងពេលក្រុមការងារចុះវាស់វែង ជាពិសេសត្រៀមនូវឯកសារដែលពាក់ព័ន្ធឱ្យបានរួចជាស្រេច ដើម្បីឱ្យមន្រ្តីជំនាញចុះបញ្ជីវាស់វែងបានលឿន មាននូវសុក្រឹត្យភាព ត្រឹមត្រូវទាំងលក្ខណៈបច្ចេកទេស និងទាំងលក្ខណៈច្បាប់។
លោកអនុប្រធានមន្ទីរ បន្តថាចំពោះការចុះបញ្ជីដីធ្លីមានលក្ខណៈជាប្រព័ន្ធនេះ គឺទាមទារការកំណត់ព្រំដី ការវាស់វែង និងការវិនិច្ឆ័យច្បាស់លាស់ ដែលអនុវត្តផ្ទាល់ដោយមន្ត្រីជំនាញ របស់មន្ទីរសហការជាមួយអាជ្ញាធរដែនដី និងមន្ទីរអង្គភាពគ្រប់គ្រងដីរដ្ឋដែលពាក់ព័ន្ធទាំងអស់ ហើយក្រុមការងារអនុវត្តន៍តាមនីតិវិធីសំខាន់ៗ ចំនួន៥ដំណាក់កាលគឺ ១.ត្រៀមរៀបចំ ២.ប្រតិបត្តិបច្ចេកទេស ៣.បិទផ្សាយជាសាធារណៈនូវឯកសារនៃការវិនិច្ឆ័យ ៤.សម្រេចលើឯកសារវិនិច្ឆ័យ និងទី៥.ចេញបណ្ណ និងចែកបណ្ណជូនម្ចាស់ដី។
លោក ឡុត ញាន អភិបាលរងស្រុកស្រីស្នំ មានប្រសាសន៍ថា ការចុះបញ្ជីដីធ្លីមានលក្ខណៈជាប្រព័ន្ធ ពិតជាមានសារៈសំខាន់ណាស់សម្រាប់បងប្អូនជាម្ចាស់ក្បាលដី ដើម្បីទទួលបាននូវវិញ្ញាបនបត្រសម្គាល់ម្ចាស់កម្មសិទ្ធិដីធ្លី ឬជាបណ្ណសម្គាល់សិទ្ធិកាន់កាប់អចលនវត្ថុពេញលេញស្របតាមលក្ខណៈច្បាប់។ លើសពីនេះ ការចុះបញ្ជីដីធ្លីមានលក្ខណៈជាប្រព័ន្ធ គឺមន្ត្រីជំនាញបានអនុវត្តទៅតាមនីតិវិធី និងបច្ចេកវិទ្យាទំនើប ដែលមានតម្លាភាព សុក្រឹត្យភាព និងការទទួលខុសត្រូវដែលប្រទេសជឿនលឿនលើពិភពលោកកំពុងអនុវត្ត និងមានប្រសិទ្ធភាពលើការគ្រប់គ្រងដីធ្លីដែលស្របតាមគោលនយោបាយដីធ្លីរបស់រាជរដ្ឋាភិបាល។
ក្នុងឱកាសនោះដែរ លោកហែន ពុន្ធី អភិបាលរងខេត្ត មានប្រសាសន៍ថា ចំពោះការចុះបញ្ជីដីធ្លីនេះ គឺមិនទាមទារឱ្យមានការចំណាយថវិកា អំឡុងពេលក្រុមការងារចុះអនុវត្តន៍នោះ មិនថាតែក្នុងដំណាក់កាលវាស់វែង ឬក្នុងដំណាក់កាលចែកបណ្ណកម្មសិទ្ធិ ឬក្នុងដំណាក់កាលផ្សេងៗនោះទេ។ លោកក៏បានអំពាវនាវឱ្យបងប្អូនជាម្ចាស់ដីទាំងអស់ដែលរស់នៅក្នុងឃុំក្លាំងហាយ ត្រូវចូលរួមសហការជាមួយក្រុមការងារចុះវាស់វែង មិនត្រូវអវត្តមានអំឡុងពេលក្រុមការងារចុះវាស់ដីរបស់ខ្លួន ពិសេសត្រូវត្រៀមឯកសារពាក់ព័ន្ធ ដើម្បីជួយពន្លឿនការចុះវាស់វែងដីធ្លីនេះឱ្យបានលឿន និងឆាប់បានទទួលបណ្ណកម្មសិទ្ធិគ្រប់ៗគ្នា៕
អត្ថបទ និង រូបភាព៖ លោក ស៊ុំ គីន
កែសម្រួល៖ លោក អ៊ុន ណារាជ្យ
