នៅថ្ងៃទី២៧ ខែតុលា ឆ្នាំ២០២៤ គណៈកម្មការ អាចារ្យ និងប្រជាពុទ្ធបរិស័ទជិតឆ្ងាយបានមូលមតិគ្នា ដង្ហែអង្គកឋិនទានសាមគ្គី យកទៅវេរប្រគេន ដល់ភិក្ខុសង្ឃនៃវត្តដំណាក់ ក្រុងសៀមរាប ដើម្បីទំនុកបំរុងដល់ព្រះភិក្ខុសង្ឃដែលគង់ចាំវស្សាអស់រយៈពេលបីខែកន្លងមក ដែលអង្គកឋិនសាមគ្គី ទទួលបានបច្ច័យចំនួនជាង៦០លានរៀល សម្រាប់ទ្រទ្រង់ចតុបច្ច័យដល់ភិក្ខុ-សាមណេរក្នុងវត្តទាំង៧៤អង្គ ហើយថវិកាមួយចំនួនធំត្រូវបែងចែកយកទៅផ្គត់ផ្គង់សម្ភារៈសិក្សា ដល់ភិក្ខុ សាមណេរដែលកំពុងសិក្សារៀនសូត្រផ្នែកពុទ្ឋិក:បឋមសិក្សា និងពុទ្ឋិកៈវិទ្យាល័យ និងមួយផ្នែកទៀតលៃលក កែលំអ ទីសេនាសនសង្ឃ និងថែទាំបរិស្ថាន ក្នុងវត្តជាដើម។
ព្រះគ្រូធម្មវិសុទ្ឋិរង្សី ឡាច ចន្ថា ព្រះចៅអធិការវត្តដំណាក់ បានសម្តែងនូវព្រះទ័យសោមនស្សសាទរចំពោះសទ្ឋាជ្រះថ្លារបស់ប្រជាពុទ្ឋបរិស័ទជិតឆ្ងាយដែលបានស្រុះស្រួលគ្នាដង្ហែអង្គកឋិននេះឡើង នេះជាសទ្ឋាបញ្ជាក់ឱ្យឃើញពីការជឿគោរពព្រះពុទ្ឋសាសនា និងស្មារតីសាមគ្គីជួយគ្នារបស់ប្រជាពុទ្ឋបរិស័ជិតឆ្ងាយ ដើម្បីទ្រទ្រង់ព្រះពុទ្ធសាសនាឱ្យបានចំរើនរុងរឿងនៅយូរអង្វែង និងជាការជួយទំនុកបំរុងដល់ព្រះភិក្ខុសង្ឃ ក្រោយពីគង់ចាំព្រះវស្សាអស់កាលត្រីមាសកន្លងមក ។
ជាមួយគ្នានេះដែរ មហាឧបាសិកាសាសនូបត្ថម្ភ ង៉ែត វណ្ណដារ៉ា តំណាងប្រជាពុទ្ធបរិស័ទ បានបង្ហាញអារម្មណ៍រីករាយជ្រះថ្លាថា៖ គណៈកម្មការវត្ត ក៏ដូចជាប្រជាពុទ្ឋបរិស័ទចំណុះជើងវត្តដំណាក់តែងតែផ្តួចផ្តើមកំណត់កាលវេលាប្រារព្ឋនូវអង្គកឋិននេះឡើងជារៀងរាល់ឆ្នាំ ទៅតាមពុទ្ឋានុញ្ញាតិ ពីព្រោះក្នុងនាមជាពុទ្ឋបរិស័ទពួកយើងខ្ញុំយល់ច្បាស់ពីសារៈសំខាន់អង្គកឋិន គឺដើម្បីប្រគេនចីវរដល់ព្រះសង្ឃគង់ចាំព្រះវស្សាអស់កាលត្រីមាសក្នុងអារាម ដើម្បីចូលរួមកសាងកែលម្អសមិទ្ធផលនានាក្នុងវត្ត និងលើកកម្ពស់វិស័យព្រះពុទ្ឋសាសនាឱ្យរឹងមាំស្ថិតស្ថេរយូរអង្វែងញ៉ាំងសទ្ឋាឱ្យដល់ព្រមដោយលះបង់នូវអំពើអាក្រក់ សេចក្តីកំណាញ់ ទាំងឡាយ ព្រោះខ្លាចអំពើបាបនៅជាតិខាងមុខ។
អត្ថបទ និងរូបភាព ៖ យូ វង្ស
កែសម្រួល៖ ហាំ ម៉េងហួត
