នៅព្រឹកថ្ងៃទី២៥ ខែតុលា ឆ្នាំ២០២៤នេះ សាខាកាកបាទក្រហមកម្ពុជាខេត្តសៀមរាប បានរៀបចំពិធីផ្សព្វផ្សាយលើកកម្ពស់ការយល់ដឹងស្តីពីយុវជនប្តេជ្ញាប្រកាន់យកឥរិយាបទវិជ្ជមានដើម្បីបញ្ចប់ជំងឺអេដស៍ ជូនដល់យុវជនកាកបាទក្រហមកម្ពុជាខេត្ត រួមនឹងលោកគ្រូអ្នកគ្រូ និស្សិតសាកលវិទ្យាល័យអង្គរ និងសាកលវិទ្យាល័យបៀលប្រាយ ក្រោមអធិបតីភាព ឯកឧត្ដមសាស្រ្តាចារ្យ មហាបរិញ្ញា ហោ ប៊ុនឡេង សមាជិកគណៈកម្មាធិការកណ្តាលកាកបាទក្រហមកម្ពុជា។
លោកជំទាវ ទុយ ជិ ប្រាក់ សោភ័ណ អនុប្រធានគណៈកម្មាធិការសាខាកាកបាទក្រហមខេត្តសៀមរាប និងជាអនុប្រធានក្រុមការងារឥស្សរជនឆ្នើមថ្នាក់ជាតិសាខាខេត្ត មានប្រសាសន៍ថា ខេត្តសៀមរាប បានខិតខំស្ដារឡើងវិញនូវកំណើនសេដ្ឋកិច្ចជាតិតាមរយៈវិស័យទេសចរណ៍ ដែលតម្រូវឱ្យមានការចូលរួមពីគ្រប់ភាគីពាក់ព័ន្ធជាមួយនឹងស្មារតីទទួលខុសត្រូវខ្ពស់ក្នុងការគ្រប់គ្រងការរីករាលដាលមេរោគអេដស៍/ជំងឺអេដស៍ តាមគ្រប់រូបភាព ជាពិសេសការចម្លងក្នុងចំណោមយុវវ័យ និងស្ត្រីបម្រើការនៅតាមគ្រឹះស្ថានកម្សាន្តសប្បាយ មនុស្សពេញវ័យជាដើម។ល។ ជាមួយនោះ សាខាកាកបាទក្រហមកម្ពុជាខេត្តសៀមរាប និង ក្រុមការងារឥស្សរជនឆ្នើមថ្នាក់ជាតិសាខាខេត្ត បានប្តេជ្ញាចិត្តខ្ពស់ក្នុងការចូលរួមជាមួយរាជរដ្ឋាភិបាល ឆ្ពោះទៅសម្រេចគោលដៅបញ្ចប់ជំងឺអេដស៍នៅឆ្នាំ២០២៥។
លោកជំទាវ ទុយ ជិ ប្រាក់ សោភ័ណ ក៏បានអំពាវនាវដល់ប្អូនៗនិស្សិត ក្មួយៗយុវជន ត្រូវចាកឆ្ងាយពីគ្រឿងញៀន ភាពភ្លើតភ្លើនផ្លូវភេទ ដែលជាហានិភ័យខ្ពស់នៃការឆ្លងមេរោគអេដស៍ ជំងឺកាមរោគ និងត្រូវស្វែងយល់បន្ថែមនូវចំណេះដឹងថ្មីៗ ស្តីពីការចម្លងមេរោគអេដស៍ ជំងឺអេដស៍ គឺដើម្បីបង្ការខ្លួនយើង គ្រួសារយើង សហគមន៍យើង និងសង្គមជាតិយើង។
ក្នុងឱកាសនោះ ឯកឧត្ដមសាស្រ្តាចារ្យ មហាបរិញ្ញា ហោ ប៊ុនឡេង បានធ្វើបទបង្ហាញ និងបាឋកថា អំពីមេរោគអេដស៍ ជំងឺអេដស៍ និងឥរិយាបទប្រកបដោយភាពវិជ្ជមានរបស់យុវជន ដោយបង្ហាញអំពីគោលបំណង និងកម្មវត្ថុ បច្ចុប្បន្នភាពស្ថានភាពរាលដាល និងចំណេះដឹងមេរោគអេដស៍ និងជំងឺអេដស៍ បច្ចុប្បន្នភាពយុទ្ធសាស្ត្រឆ្លើយតបមេរោគអេដស៍ និងជំងឺអេដស៍ និស្សិត/យុវជនប្តេជ្ញាចូលរួមបញ្ចប់ជំងឺអេដស៍ឆ្នាំ២០២៥ និងឥរិយាបទប្រកបដោយភាពវិជ្ជមានរបស់និស្សិត/យុវជន។ ឯកឧត្ដម ក៏បានផ្តល់នូវបច្ចុប្បន្នភាព ចំណេះដឹង ជំនាញ និងបទពិសោធស្តីពីដូចជា និយមន័យ និងការវិវត្ត នៃមេរោគអេដស៍ និងជំងឺអេដស៍ ,យុទ្ធសាស្ត្របង្ការ ថែទាំ ព្យាបាល និងគាំទ្រ អ្នកផ្ទុកមេរោគអេដស៍ និងអ្នកជំងឺអេដស៍ និងតួនាទី ភារកិច្ច និងការទទួលខុសត្រូវរបស់សិស្ស/យុវជន ចូលរួមបញ្ចប់ជំងឺអេដស៍ និងឥរិយាបទវិជ្ជមានឆ្លើយតបមេរោគអេដស៍ និងជំងឺអេដស៍។
ឯកឧត្តម តែង គន្ធី អនុប្រធានគណៈកម្មាធិការក្រុមការងារឥស្សរជនឆ្នើមថ្នាក់ជាតិ មានប្រសាសន៍ថា យុវជនដែលបានចូលរួមក្នុងពិធីផ្សព្វផ្សាយលើកកម្ពស់ការយល់ដឹងស្តីពីយុវជនប្តេជ្ញាប្រកាន់យកឥរិយាបទវិជ្ជមានដើម្បីបញ្ចប់ជំងឺអេដស៍ នាពេលនេះ នឹងមានវត្តមានចូលរួមកិច្ចពិភាក្សាបញ្ហាអេដស៍ និងឥរិយាបថរបស់យុវវ័យ ឆ្ពោះទៅទិវាពិភពលោកប្រយុទ្ធនឹងជំងឺអេដស៍ ១ធ្នូ ឆ្នាំ២០២៤ ដែលនឹងរៀបចំនៅចុងខែវិច្ឆិកាខាងមុខ ជាមួយនិស្សិតនៃបណ្តាសាកលវិទ្យាល័យខេត្តព្រះសីហនុ ដែលនឹងត្រូវបង្ហាញពីកិត្យានុភាពរបស់យុវជនកម្ពុជាទូទាំងប្រទេសផងដែរ៕
អត្ថបទ និង រូបភាព៖ លោក ទ្រា ពន្លឺ
កែសម្រួល៖ លោក អ៊ុន ណារាជ្យ
