ដើម្បីជំរុញ និងអភិវឌ្ឍតំបន់ជនបទ ឱ្យប្រែក្លាយជាគោលដៅទេសចរណ៍ថ្មីៗ ក្រសួងទេសចរណ៍កម្ពុជា និងគ្រប់ភាគីពាក់ព័ន្ធ បានរួមគ្នាធ្វើការពិភាក្សាលើសេចក្តីព្រាងស្តីពីស្តង់ដារ “ភូមិទេសចរណ៍គំរូ” ដែលនេះជាការធ្វើពិពិធកម្ម ផលិតផលទេសចរណ៍ ជំរុញការផ្សព្វផ្សាយ និងការទាក់ទាញភ្ញៀវទេសចរដ៏មានប្រសិទ្ធភាព។
ថ្លែងក្នុងសិក្ខាសាលាពិគ្រោះយោបល់គោលការណ៍ណែនាំស្តីពីសេចក្តីព្រាងស្តង់ដា “ភូមិទេសចរណ៍គំរូ” នាព្រឹកថ្ងៃទី២៤ ខែតុលា ឆ្នាំ២០២៤ នៅខេត្តសៀមរាប អគ្គនាយកដ្ឋានអភិវឌ្ឍន៍ទេសចរណ៍ និងសហប្រតិបត្តិការអន្តរជាតិ ឯកឧត្តម ជុក ជំនោរ មានប្រសាសន៍ថា ការរៀបចំឱ្យមានស្តង់ដារ “ភូមិទេសចរណ៍គំរូ” គឺជាកត្តាដ៏សំខាន់ក្នុងការរួមចំណែកធ្វើពិពិធកម្ម ផលិតផលទេសចរណ៍ ជំរុញការផ្សព្វផ្សាយ និងការទាក់ទាញភ្ញៀវទេសចរដ៏មានប្រសិទ្ធភាព ពិសេសរួមចំណែកដល់ការជំរុញ និងអភិវឌ្ឍតំបន់ជនបទ ឱ្យប្រែក្លាយជាគោលដៅទេសចរណ៍ដ៏មានភាពទាក់ទាញ ស្របតាមយុទ្ធសាស្ត្រពិពិធកម្ម ផលិតផលទេសចរណ៍របស់រាជរដ្ឋាភិបាលកម្ពុជា និងជំរុញការតភ្ជាប់ ទៅកាន់តំបន់ជនបទផងដែរ។
ឯកឧត្តម ជុក ជំនោរ មានប្រសាសន៍ទៀតថា ការរៀបចំនូវសេចក្តីព្រាងស្តង់ដា “ភូមិទេសចរណ៍គំរូ” នេះ ធ្វើឡើងក្រោមគំនិតផ្តួចផ្តើមចំនួន២ គឺទី១.យោងតាមអង្គការទេសចរណ៍សហប្រជាជាតិ (UN Tourism) និងទី២.យោងទៅតាមគោលនយោបាយទេសចរណ៍ជាតិក្នុងការអភិវឌ្ឍនូវកសិទេសចរណ៍ នៅតាមតំបន់ជនបទចូលរួមក្នុងការធ្វើឱ្យប្រសើរឡើងនូវជីវភាពរបស់ប្រជាពលរដ្ឋនៅតាមមូលដ្ឋាន ដែលជាគោលដៅយុទ្ធសាស្រ្តនៅក្នុង “ផែនទីចង្អុលផ្លូវ” របស់រាជរដ្ឋាភិបាលស្តីពីផែនការស្តារ និងលើកស្ទួយវិស័យទេសចរណ៍កម្ពុជាក្នុង និងក្រោយវិបត្តិជំងឺកូវីដ-១៩។ ដោយមានការយកចិត្តទុកដាក់ខ្ពស់ពីរាជរដ្ឋាបាលកម្ពុជា វិស័យទេសចរណ៍មានការរីកចម្រើនគួរជាទីមោទនៈ ដោយទទួលបានកំណើនវិជ្ជមានជារៀងរាល់ឆ្នាំនៅមុនការរីករាលដាលនៃជំងឺកូវីដ-១៩ និងបានរួមចំណែកប្រមាណជិត ១៣ភាគរយ នៃផលិតផលក្នុងស្រុកសរុប (GDP) និងផ្តល់ការងារយ៉ាងច្រើនដោយផ្ទាល់ និងដោយប្រយោលដល់ប្រជាជនកម្ពុជា។
ឯកឧត្តមថា “ភូមិទេសចរណ៍គំរូ” បានគំនិតផ្តួចផ្តើមដោយអង្គការទេសចរណ៍សហប្រជាជាតិ មានគោលបំណងធ្វើឱ្យវិស័យទេសចរណ៍ក្លាយជាកម្លាំងវិជ្ជមានសម្រាប់ការផ្លាស់ប្តូរការអភិវឌ្ឍនៅតំបន់ជនបទ និងសុខុមាលភាពសហគមន៍។ ជាពិសេស គឺរួមចំណែកដល់ការគាំទ្រដល់ការសម្រេចបាននូវគោលដៅអភិវឌ្ឍប្រកបដោយចីរភាពនៅឆ្នាំ២០៣០ របស់អង្គការសហប្រជាជាតិ។ សម្រាប់កម្ពុជារាជរដ្ឋាភិបាល ជាពិសេសក្រសួងទេសចរណ៍ បានមើលឃើញយ៉ាងច្បាស់អំពីអត្ថបទប្រយោជន៍ដ៏ធំធេងរបស់ភូមិទេសចរណ៍គំរូ ក្នុងការបង្កើនចំណូលជាតិ។ ដោយឡែក នៅក្នុងខេត្តសៀមរាប ភូមិព្រះដាក់ ក្នុងស្រុកបន្ទាយស្រី ក៏កំពុងប្រែក្លាយជាភូមិទេសចរណ៍គំរូ របស់អង្គការទេសចរណ៍សហប្រជាជាតិផងដែរ។
លោក យុន លីនណេ អភិបាលរងខេត្តសៀមរាប បានឱ្យដឹងថា ភូមិព្រះដាក់ ជាភូមិបុរាណមួយក្នុងស្រុកបន្ទាយស្រី ដែលទទួលបានការចាប់អារម្មណ៍ខ្លាំងពីសំណាក់ភ្ញៀវទេសចរជាតិ-អន្តរជាតិ ដែលមកកម្សាន្តក្នុងខេត្តសៀមរាប ដោយសារភូមិនេះមានសភាពស្អាត និងមានការរៀបចំបានល្អជាពិសេសនៅតាមដងផ្លូវ ក្រៅតែអំពីភាពស្អាតភូមិព្រះដាក់ក៏បានបន្សល់នូវទំនៀមទំលាប់ប្រពៃណីជាច្រើនសម្រាប់បង្ហាញដល់ភ្ញៀវទេសចរ។
លោកបានឱ្យដឹងទៀតថា ក្នុងស្មារតីទទួលខុសត្រូវ និងគោលដៅតែមួយ ការខិតខំពង្រីកគុណភាព សេវាកម្មទេសចរណ៍ ការអភិវឌ្ឍផលិតផលទេសចរណ៍ថ្មីក្នុងខេត្ត និងការរៀបចំតំបន់អង្គរឱ្យ ក្លាយជាគោលដៅទស្សនាប្រកបដោយគុណភាព ដែលបច្ចុប្បន្នអាជ្ញាធរជាតិអប្សរាបានរៀបចំ នូវផ្លូវថ្មើរជើងសម្រាប់ដើរកម្សាន្តក្នុងព្រៃអង្គរ និងបានរៀបចំផ្លូវជិះកង់ សម្រាប់ទេសចរដែលចូល ចិត្តការដើរក្នុងព្រៃ និងទស្សនាធម្មជាតិនៅក្នុងតំបន់អង្គរ។ នៅថ្ងៃខាងមុខរដ្ឋបាលខេត្តគ្រោង នឹងរៀបចំតំបន់ស្ទឹងសៀមរាបនិងតំបន់វត្តរាជបូណ៌ ជាតំបន់កម្សាន្តទីបីបន្ទាប់ពីតំបន់អង្គរ និងតំបន់ផាប់ស្ទី្រត ផងដែរ៕
អត្ថបទ និង រូបភាព៖ លោក ជា ស្រស់, លោក យូ វង្ស
កែសម្រួល៖ លោក អ៊ុន ណារាជ្យ
