កាលពីថ្ងៃទី២៣ ខែតុលា ឆ្នាំ២០២៤នេះ លោក អុឹង គឹមលាង អភិបាលរងខេត្តសៀមរាប និង លោក ទា គឹមសុទ្ឋ ប្រធានមន្ទីរកសិកម្ម រុក្ខាប្រមាញ់ និងនេសាទខេត្ត រួមនឹងមន្ត្រីកសិកម្ម អាជ្ញាធរមូលដ្ឋាន បានអញ្ជើញផ្តល់ស្រូវពូជជូនដល់ប្រជាកសិករដែលរងការខូចខាតដំណាំស្រូវវស្សាចំនួន ៧៧គ្រួសារ មកពីឃុំចំនួន៣ ក្នុងស្រុកជីក្រែង ខេត្តសៀមរាប។
បើតាមលោក ទា គឹមសុទ្ធ បានឱ្យដឹងថា ចាប់តាំងពីដើមខែកញ្ញាមក នៅក្នុងភូមិសាស្ត្រខេត្តសៀមរាប ទឹកភ្លៀងបានចាប់ផ្តើមធ្លាក់ជាបន្តបន្ទាប់ គ្របដណ្តប់ក្នុងបរិមាណពីតិចទៅច្រើន ដែលបង្កឱ្យមានទឹកជំនន់កើតឡើង គិតត្រឹមថ្ងៃទី២១ ខែតុលា ឆ្នាំ២០២៤ ស្ថិតិផ្ទៃដីរងផលប៉ះពាល់ និងខូចខាតលើដំណាំស្រូវដោយសារទឹកជំនន់ទឹកភ្លៀងសរុបមានចំនួន ១.៤៥៩ហិកតា ក្នុងស្រុកជីក្រែង ស្មើនឹង៧ឃុំ និង៥៩ភូមិ ដោយមានកសិកររងគ្រោះសរុប ១.៣០២គ្រួសារ។ ក្នុងនោះដីរងការខូចខាតដោយជំនន់ទឹកភ្លៀងលើដំណាំស្រូវសរុប ៣៧ហិកតា។
លោកប្រធានមន្ទីរ បានឱ្យដឹងទៀតថា ដោយមន្ទីរកសិកម្មជាសេនាធិការឱ្យរដ្ឋបាលខេត្ត មន្ទីរតែងតែតាមដាន និងស្រង់ស្ថិតិជាប្រចាំអំពីហានិភ័យ និងការរងផលប៉ះពាល់ខូចខាតផ្សេងៗ ពាក់ព័ន្ធនឹងវិស័យកសិកម្ម ដើម្បីខេត្តធ្វើរបាយការណ៍ទៅគណៈកម្មាធិការជាតិគ្រប់គ្រងគ្រោះមហន្តរាយ ជួយអន្តរាគមន៍ និងសង្គ្រោះទាន់ពេលវេលា។ ជាក់ស្តែងក្នុងកិច្ចប្រតិបត្តិការបន្ទាន់នេះ មន្ត្រីបច្ចេកទេសនៃមន្ទីរកសិកម្មខេត្ត សហការយ៉ាងជិតស្និទ្ធជាមួយក្រុមការងារលេខាធិការដ្ឋាននៃគណ:កម្មាធិការគ្រោះមហន្តរាយស្រុកជីក្រែង និងអាជ្ញាធរមូលដ្ឋានចុះពិនិត្យ តាមដាន និងណែនាំដល់បងប្អូនប្រជាកសិករឱ្យមានការប្រុងប្រយ័ត្ននៅហានិភ័យផ្សេងៗ ដែលកើតឡើងដោយសារជំនន់ទឹកភ្លៀងនេះ និងផ្តល់យោបល់ដល់អាជ្ញាធរ ដើម្បីរៀបចំស្នើសុំពូជស្រូវ និងស្បៀងគោរពជូនទៅប្រព័ន្ធស្បៀងបំរុងកម្ពុជា ទៅតាមគោលការណ៍ដែលធ្លាប់បានអនុវត្តន៍កន្លងមក។
មានប្រសាសន៍ក្នុងឱកាសនោះ លោក អុឹង គឹមលាង អភិបាលរងខេត្ត បានជំរុញ និងណែនាំដល់ប្រជាកសិករត្រូវរៀបចំដីស្រែឱ្យបានត្រឹមត្រូវតាមបច្ចេកទេស ដើម្បីបង្កលក្ខណៈងាយស្រួលដល់ការដាំដុះ ទាំងការគ្រប់គ្រងទឹក គ្រប់គ្រងជី និងប្រើប្រាស់ដីឱ្យបានសមស្រប។ ជាពិសេសត្រូវប្រុងប្រយ័ត្នក្នុងការប្រើប្រាស់ជី នៅពេលបាចជីរលើដំណាំស្រូវត្រូវឃ្លុំមុខ ពាក់អាវឱ្យជិតៗ ពិនិត្យមើលទិសខ្យល់ និងបាចបណ្តោយខ្យល់ ដើម្បីកាត់បន្ថយផលប៉ះពាល់ផ្នែកសុខភាពទាំងអស់គ្នា។ សូមបងបងប្អូនកសិករយកពូជស្រូវដែលបានផ្តល់ជូននេះ ទៅធ្វើការដាំស្តារឡើងវិញឱ្យបានទាន់រដូវ និងសូមនាំគ្នាខិតខំបង្កបង្កើនផល និងដាំដំណាំរួមផ្សំបន្ថែមទៀត ដើម្បីឱ្យបរិមាណស្រូវ និងដំណាំទទួលបានទិន្នផលកើនឡើង។
សូមជម្រាបថា ស្រូវពូជដែលផ្តល់ជូននេះ គឺចំប៉ីស៧០ OM៥៤៥១ ជាប្រភេទស្រូវស្រាលមិនប្រកាន់រដូវ ហើយទាំង៧៧គ្រួសារក្នុងមួយគ្រួសារទទួលបានស្រូវពូជ ៥០គីឡូក្រាម និងជីកសិកម្ម ២៥គីឡូក្រាម៕
អត្ថបទ និងរូបថត៖ លោក យូ វង្ស
កែសម្រួល៖ លោក អ៊ុន ណារាជ្យ
