នាព្រឹកថ្ងៃទី២៤ ខែតុលា ឆ្នាំ២០២៤នេះ អគ្គនាយកដ្ឋានរដ្ឋបាល និងហិរញ្ញវត្ថុ នៃក្រសួងព័ត៌មាន បានសហការជាមួយក្រសួងសេដ្ឋកិច្ច និងហិរញ្ញវត្ថុ រៀបចំសិក្ខាសាលាស្តីពីនីតិវិធីនៃការរៀបចំបញ្ជីសារពើភណ្ឌទ្រព្យសម្បត្តិរដ្ឋតាមប្រព័ន្ធ SARMIS (Online) ដល់មន្ត្រីជំនាញមកពីបណ្ដាមន្ទីរព័ត៌មានរាជធានីខេត្ត ក្រោមអធិបតីភាព ឯកឧត្តម ប្រាក់ ថាវអមិដា អនុរដ្ឋលេខាធិការ និងជានាយកខុទ្ទកាល័យរដ្ឋមន្រ្តីក្រសួងព័ត៌មាន ដោយមានការចូលរួមពីប្រតិភូក្រសួងទាំង២ ថ្នាក់ដឹកនាំមន្ទីរព័ត៌មានរាជធានីខេត្ត និងមន្ត្រីពាក់ព័ន្ធ ដោយសិក្ខាសាលានេះមានរយៈពេល២ថ្ងៃ ចាប់ពីថ្ងៃទី២៤-២៥ ខែតុលា ឆ្នាំ២០២៤ នៅសណ្ឋាគារអង្គរប៉ារ៉ាឌី ខេត្តសៀមរាប។
លោកជំទាវ ទេស ផល្លីន អគ្គនាយិការដ្ឋបាល និងហិរញ្ញវត្ថុក្រសួងព័ត៌មាន បានឱ្យដឹងថា ការងារការគ្រប់គ្រងបញ្ជីសារពើភណ្ឌទ្រព្យសម្បត្តិរដ្ឋ គឺជាចលករដ៏មុខស្រួចរបស់រាជរដ្ឋាភិបាល ក្នុងការកែលម្អការគ្រប់គ្រងបញ្ជីសារពើភណ្ឌទ្រព្យសម្បត្តិរដ្ឋនៅកម្ពុជា ដោយមានប្រព័ន្ធ SAMIS (Online) គឺជាឧបករណ៍ស្នូលមិនអាចខ្វះបាន ក្នុងការគាំទ្រដល់ដំណើរការនៃការកែទម្រង់ហិរញ្ញវត្ថុសាធារណៈនៅក្នុងដំណាក់កាលនីមួយៗ។
លោកជំទាវ ទេស ផល្លីន បានឱ្យដឹងទៀតថា សិក្ខាសាលានាពេលនេះ មានគោលបំណងពង្រឹងសមត្ថភាពបន្ថែមដល់មន្ត្រីពាក់ព័ន្ធ ឱ្យយល់ដឹងកាន់តែច្បាស់លើការគ្រប់គ្រង ការប្រើប្រាស់ និងចាត់ចែងលើទ្រព្យសម្បត្តិរដ្ឋ ព្រមទាំងកំណត់អំពីក្របខណ្ឌច្បាប់ និងស្ថាប័នជាគោលសំដៅចូលរួមចំណែកបម្រើឧត្តមប្រយោជន៍នៃការអភិវឌ្ឍសេដ្ឋកិច្ច សង្គម បរិស្ថាន និងវប្បធម៌ និងគោលដៅពង្រឹង ពង្រីកសមត្ថភាព និងលើកកម្ពស់ការយល់ដឹងបន្ថែមជូនមន្រ្តីទទួលបន្ទុក ទាំងថ្នាក់កណ្តាល និងមន្ទីរទាំង ២៥រាជធានីខេត្ត ដើម្បីរៀបចំបញ្ជីសារពើភណ្ឌទ្រព្យសម្បត្តិរដ្ឋ តាមប្រព័ន្ធបច្ចេកវិទ្យាព័ត៌មានឱ្យបានត្រឹមត្រូវ និងចូលរួមអនុវត្ត នូវកម្មវិធីកែទម្រង់ការគ្រប់គ្រងហិរញ្ញវត្ថុសាធារណៈ និងរួមចំណែកការឆ្លើយតបទៅនឹងចរន្តសកលនៃសេដ្ឋកិច្ចឌីជីថល និងបដិវត្តន៍ឧស្សាហកម្ម ៤.០។
ក្នុងឱកាសនោះដែរ ឯកឧត្តម ប្រាក់ ថាវអមិដា មានប្រសាសន៍ថា រាជរដ្ឋាភិបាលកម្ពុជា បានជំរុញការធ្វើបដិវត្តកម្មឌីជីថលលើគ្រប់វិស័យ តាមរយៈការដាក់ចេញនូវក្របខណ្ឌគោលនយោបាយសេដ្ឋកិច្ច និងសង្គមឌីជីថលកម្ពុជា ២០២១-២០៣៥ ដែលជាមាគ៌ាតម្រង់ទិសមួយដ៏សំខាន់សម្រាប់គ្រប់តួអង្គពាក់ព័ន្ធ ឱ្យផ្តោតការយកចិត្តទុកដាក់និងជំរុញការចាប់យកប្រយោជន៍ជាអតិបរមានពីបច្ចេកវិទ្យាឌីជីថល ក្នុងការបង្កើនផលិតភាព និងប្រសិទ្ធភាពការងារ។
ឯកឧត្តម ប្រាក់ ថាវអមិដា មានប្រសាសន៍បន្តថា ប្រព័ន្ធបច្ចេកវិទ្យាព័ត៌មានគ្រប់គ្រងបញ្ជីសារពើភណ្ឌទ្រព្យសម្បត្តិរដ្ឋ គឺតម្រូវឱ្យក្រសួង និងមន្ទីរដែលជាអាជ្ញាធរទទួលបន្ទុក ត្រូវរៀបចំបញ្ជីសារពើភណ្ឌក្នុងដែនសមត្ថកិច្ចរបស់ខ្លួនតាមគំរូ និងប្លង់របស់ក្រសួងសេដ្ឋកិច្ច និងហិរញ្ញវត្ថុ ដើម្បីគ្រប់គ្រងទ្រព្យសម្បត្តិរដ្ឋប្រកបដោយគុណភាព គណនេយ្យភាព តម្លាភាព ប្រសិទ្ធភាព ស័ក្តិសិទ្ធភាព និងបូរណភាព ដើម្បីសម្រេចគោលនយោបាយអាទិភាពរបស់រាជរដ្ឋាភិបាល។ ក្នុងនោះក្រសួងព័ត៌មាន នៅតែបន្តការពង្រីកវិសាលភាពនៃការប្រើប្រាស់ប្រព័ន្ធ SARMIS បន្ថែមទៀត រហូតដល់មន្ទីររាជធានី-ខេត្ត ដែលនៅសេសសល់ ដើម្បីជំរុញឱ្យទាន់ដំណាក់កាលនៃការធ្វើបដិវត្តកម្មឌីជីថលទៅក្នុងប្រព័ន្ធការងារ ពោលគឺការលើកកម្ពស់ប្រសិទ្ធភាពនៃការអនុវត្តនីតិវិធីការងារបែបឌីជីថល។
ឯកឧត្តម អនុរដ្ឋលេខាធិការ ក៏បានរំលឹកពីប្រសាសន៍របស់សម្តេចតេជោ ហ៊ុន សែន អតីតនាយករដ្ឋមន្ត្រី ដែលតែងដាស់តឿនយើងទាំងអស់គ្នាថា “កែទម្រង់រស់ មិនកែទម្រង់ស្លាប់” រួមជាមួយនឹងអភិក្រមចំនួន៥ ក្នុងការអនុវត្តការកែទម្រង់ស៊ីជម្រៅ គឺ “ឆ្លុះកញ្ចក់, ងូតទឹក, ដុសក្អែល, ព្យាបាល និងវះកាត់”។ ហើយប្រសាសន៍ និងអភិក្រមទាំង៥នេះ នៅបន្តអនុវត្តយ៉ាងម៉ឺងម៉ាត់នៅក្នុងនីតិកាលទី៧ នៃរដ្ឋសភា ក្រោមការដឹកនាំរបស់សម្តេចធិបតី ហ៊ុន ម៉ាណែត នាយករដ្ឋមន្ត្រី។ ស្របពេលជាមួយគ្នានេះ ឯកឧត្តម បានផ្តាំផ្ញើដល់ថ្នាក់ដឹកនាំ និងមន្ត្រីគ្រប់ជាន់ថ្នាក់ ដែលមានតួនាទី និងភារកិច្ចក្នុងការបំពេញកិច្ចការងារនេះ ត្រូវត្រៀមខ្លួនជាស្រេចក្នុងការផ្លាស់ប្តូរជានិច្ច និងបំពេញភារកិច្ចរបស់ខ្លួនឱ្យបានត្រឹមត្រូវ ប្រកបដោយវិជ្ជាជីវៈផងដែរ៕
អត្ថបទ និងរូបថត៖ លោក ទ្រា ពន្លឺ
កែសម្រួល៖ លោក អ៊ុន ណារាជ្យ
