លោក ពៅ ពិសិដ្ឋ អភិបាលរងខេត្តសៀមរាប បានក្រើនរំលឹកដល់អាជ្ញាធរស្រុក ឃុំ និងកម្លាំងសមត្ថកិច្ច ដោយបានសង្កត់ធ្ងន់ៗទៅលើបញ្ហាសន្តិសុខសង្គម និង សេវារដ្ឋបាលសាធារណៈ ដល់បងប្អូនប្រជាពលរដ្ឋឲ្យបានល្អប្រសើរ ដើម្បី ឆ្លើយតបទៅនឹងទំនុកចិត្តរបស់ គណៈអភិបាលខេត្ត ដែលបានផ្តល់នូវជំនឿទុកចិត្តចំពោះលោកអភិបាលរងស្រុកតែងតាំងថ្មីនេះ។
លោកអភិបាលរងខេត្តបានថ្លែងយ៉ាងនេះ ក្នុងពិធីប្រកាសតែងតាំងលោក សាង គឹមសេង ឋានន្តរស័ក្កិវរមន្ត្រីថ្នាក់លេខ៦ ជាអភិបាលរង នៃគណះអភិបាលរងស្រុកស្រីស្នំ ខេត្តសៀមរាប កាលពីរសៀលថ្ងៃទី១៨ ខែធ្នូ ឆ្នាំ២០១៨។
លោក ពៅ ពិសិដ្ឋ អភិបាលរងខេត្តសៀមរាប បន្តថា អភិបាលរងស្រុកថ្មី ត្រូវខិតខំបំពេញការងារទ្វេដង ដោយស្មារតីយកចិត្តទុកដាក់ នឹងមានការទទួលខុសត្រូវខ្ពស់ ព្រមទាំងប្រឹងប្រែងឲ្យអស់ពីកម្លាំងកាយចិត្ត និង ប្រាជ្ញាស្មារតី ដើម្បីបំពេញការងារជូនតម្រូវការរបស់ប្រជាជនឲ្យកាន់តែសកម្មខ្លាំងក្លាថែមទៀត ។ ហើយត្រូវគោរពច្បាប់រដ្ឋធម្មនុញ្ញ និង លិខិតបទដ្ឋានគតិយុត្តជាធរមាន របស់រាជរដ្ឋាភិបាល។
លោក ពៅ ពិសិដ្ឋ ក៏បានកោតសរសើរ និង វាយតម្លៃខ្ពស់ ចំពោះថ្នាក់ដឹកនាំ មន្ត្រីរាជការ កងកម្លាំងប្រដាប់អាវុធ និង ប្រជាពលរដ្ឋទូទាំងស្រុកស្រីស្នំ ដែលបានរួមសាមគ្គីគ្នា ក្នុងការកសាងអភិវឌ្ឍន៍ស្រុក ឲ្យមានការរីកចម្រើន លើគ្រប់វិស័យក្នុងរយៈពេលកន្លងមកនេះ ។
លោកអភិបាលរងខេត្ត បានបន្តទៀតថា ការប្រកាសតែងតាំងចូលកាន់មុខតំណែងនេះ វាជាបែបបទនីតិវិធីបានកំណត់ក្នុងច្បាប់ ហើយត្រូវបានយកមកអនុវត្តក្នុងប្រព័ន្ធរដ្ឋបាល សំដៅធ្វើយ៉ាងណាឲ្យការគ្រប់គ្រង ដឹកនាំរដ្ឋបាលឲ្យកាន់តែមានប្រសិទ្ធភាពក្នុងការឆ្លើយតប នឹងតម្រូវការរស់នៅរបស់បងប្អូនប្រជាពលរដ្ឋនៅតាមមូលដ្ឋាន។
ហើយនេះគឺជាប្រពៃណីរបស់ថ្នាក់ដឹកនាំ មន្ត្រីរាជការ របស់រាជរដ្ឋាភិបាល ពុំមានអ្វីដែលថ្មី និង ប្លែកនោះទេ តែសំខាន់នោះ គឺចរន្តនៃការងាររដ្ឋបាល ពុំមានការប្រែប្រួល ដោយរដ្ឋបាលស្រុកត្រូវតែបន្តនិរន្តរភាពការងារបន្តទៀត ដោយប្រមូលផ្តុំកម្លាំងសរុបសំដៅជម្រុញ បង្កើននូវប្រសិទ្ធភាពក្នុងការងារដឹកនាំ គ្រប់គ្រងរដ្ឋបាលស្រុក ក្នុងការបម្រើនូវសេវាសាធារណៈជូនដល់បងប្អូនប្រជាពលរដ្ឋឲ្យកាន់ប្រសើរថែមទៀត។
អត្តបទ៖ ស៊ាន សុផាត
