លោក ព្រៅ ខេមរិន្ទ ប្រធានសាខាកាំកុងត្រូលខេត្តសៀមរាប មានប្រសាសន៍ថា នៅក្នុងខណៈពេលដែលលោកដឹកនាំក្រុមការងារចុះត្រួតពិនិត្យសុវត្ថិភាពចំណីអាហារនៅក្នុងផ្សារពួក ទីប្រជុំជនស្រុកពួក ខេត្តសៀមរាប នាព្រឹកថ្ងៃទី១៩ ខែធ្នូ ឆ្នាំ២០១៨នេះ ក្នុងប្រតិបត្តិការនោះ ភ្នាក់ងារសាខាកាំកុងត្រូលខេត្ត ពុំបានរកឃើញសារធាតុគីមីហាមឃាត់ ដែលគេសង្ស័យថាមានហានីភ័យខ្ពស់ នៅក្នុងប្រភេទទំនិញម្ហូបអាហារស្រស់មួយចំនួន ដូចជា សណ្តែកបណ្តុះ ស្ពៃជ្រក់ សសៃគុយទាវ មីលឿង ស្កត្នោត នំបញ្ចុក និង អាហារស្រស់គ្រឿងសមុទ្រ ជាដើម ។
លោក ព្រៅ ខេមរិន្ទ មានប្រសាសន៍ទៀតថា អ្វីដែលទទួលបានលទ្ធផលជាវិជ្ជមានមកដល់ពេលនេះ សំខាន់ណាស់ គឺការអប់រំ និងលើកទឹកចិត្តដល់អ្នកលក់ដូរ ឲ្យយល់ព្រមចូលរួម ក្នុងស្មារតីទទួលខុសត្រូវចំពោះសុខភាពអតិថិជន ហើយអ្វីដែលជារនាំងហាមឃាត់មិនឲ្យលេចចេញបាតុភាពអវិជ្ជមានបាន គឺអនុវត្តន៍តាមលក្ខខណ្ឌតម្រូវជាធរមាន ដែលផ្សព្វផ្សាយដោយអគ្គនាយកដ្ឋានកម្ពុជា ត្រួតពិនិត្យទំនិញ នីហរ័ណ អាហរ័ណ និង បង្ក្រាបការក្លែងបន្លំ នៃក្រសួងពាណិជ្ជកម្ម ដែលហៅកាត់ថា កាំកុងត្រូលនោះ ជាពិសេសអាជីវករ មានស្មារតីភ្ញាក់រលឹកខ្ពស់ បើប្រៀបធៀបទៅនឹងរយៈពេលប៉ុន្មានឆ្នាំមុននេះ ដែលក្នុងប្រតិបត្តិការចុះត្រួតពិនិត្យសុវត្ថិភាពចំណីអាហារ តែងតែរកឃើញសារធាតុគីមីហាមឃាត់នៅក្នុងប្រភេទចំណីអាហារមួយចំនួននេះ ៕
អត្ថបទ និង រូបថត ៖ លោក ងិន គឹមឡេង
កែសម្រួលអត្ថបទ ៖ លោក លីវ សាន្ត
