សន្និសីទអន្តរជាតិលើកទី១៤ ស្តីពីតម្លៃវប្បធម៌អាស៊ីប៉ាស៊ីហ្វិក ៖ វប្បធម៌ ប្រវត្តិ និង មោទកភាព បានផ្តល់វិភាគទានដ៏មានតម្លៃចំពោះវិស័យវប្បធម៌ក្នុងតំបន់និងពិភពលោក ក្នុងតំណាក់កាលសមាហរណកម្មតំបន់អាស៊ាននិងអាស៊ីប៉ាស៊ីហ្វិក ឆ្នាំ២០១៨ !
មជ្ឈមណ្ឌលស្រាវជ្រាវអាស៊ីនៃរាជបណ្ឌិត្យសភាកម្ពុជា បានរៀបចំដំណើរការ សន្និសីទអន្តរជាតិលើកទី១៤ ស្តីពីតម្លៃវប្បធម៌អាស៊ីប៉ាស៊ីហ្វិក ៖ វប្បធម៌ ប្រវត្តិ និង មោទកភាព នាព្រឹកថ្ងៃទី២០ ខែធ្នូ ឆ្នាំ២០១៨នៅខេត្តសៀមរាប ក្រោមការឧបត្ថម្ភដោយ មូលនិធិកូរ៉េ សម្រាប់ការសិក្សាជាន់ខ្ពស់ ។
ថ្លែងសន្ទរកថាបើកដំណើរការអង្គសន្និសីទនោះ ឯកឧត្តមបណ្ឌិតសភាចារ្យ ស៊ុ ឈុំប៊ុន សមាជិកពេញសិទ្ធិ នាយកមជ្ឈមណ្ឌលស្រាវជ្រាវអាស៊ីនៃរាជបណ្ឌិត្យសភាកម្ពុជា បង្ហាញថា ៖ ១៣លើកកន្លងមកនេះ សន្និសីទអន្តរជាតិស្តីពីតម្លៃវប្បធម៌អាស៊ីអាគ្នេយ៍ បានផ្តល់នូវសារប្រយោជន៍ជាច្រើនចំពោះការសិក្សាស្វែងយល់និងផ្សព្វផ្សាយវប្បធម៌-អារ្យធម៌របស់ប្រជាជាតិនីមួយៗនៅក្នុងតំបន់ ។
ប្រធានបទនៃកិច្ចពិភាក្សារាល់ឆ្នាំ បានផ្តោតជាពិសេសទៅលើកិច្ចសហប្រតិបត្តិការវប្បធម៌ វិទ្យាសាស្ត្រ ក្នុងគោលបំណងរួមចំណែកលើកស្ទួយអរិយធម៌នៃបណ្តាប្រជាជាតិអាស៊ីអាគ្នេយ៍ អាស៊ីប៉ាស៊ីហ្វិក ក៏ដូចជាលើសាកលលោក ដើម្បីបង្កើតនូវភាពសុខដុមរមនា និង វិបុលភាព សម្រាប់គ្រប់ៗគ្នា ។
សន្និសីទអន្តរជាតិលើកទី១៤នេះ បានផ្តល់វិភាគទានដ៏មានតម្លៃចំពោះវិស័យវប្បធម៌ក្នុងតំបន់និងពិភពលោក ក្នុងតំណាក់កាលសមាហរណកម្មតំបន់អាស៊ាននិងអាស៊ីប៉ាស៊ីហ្វិកនាឆ្នាំ២០១៨ ដោយផ្តោតការពិភាក្សាលើប្រធានបទចម្បង ស្តីពី វប្បធម៌ ប្រវត្តិ និងមោទកភាព និងប្រធានបទរងចំនួន៣ផ្សេងទៀត ( ទំនើបកម្មអភិបាលកិច្ចនៃវប្បធម៌ បញ្ហាប្រឈមនៃសាកលភាវូបនីយកម្មវប្បធម៌ និង ការលើកកម្ពស់បេតិកភណ្ឌពិភពលោក ) ។
ក្នុងសន្និសីទអន្តរជាតិលើកទី១៤ ស្តីពីតម្លៃវប្បធម៌អាស៊ីប៉ាស៊ីហ្វិក ៖ វប្បធម៌ ប្រវត្តិ និង មោទកភាព មានវត្តមានវាគ្មិនមកពី១៥ប្រទេស កម្ពុជា ថៃ វៀតណាម ឡាវ ឥណ្ឌូណេស៊ី ម៉ាឡេស៊ី មីយ៉ាន់ម៉ា ហ្វីលីពីន សឹង្ហបូរី កូរ៉េ ចិន ជប៉ុន អង់គ្លេស សហរដ្ឋអាមេរិក បារាំង និង ស្វីស ប្រមាណជា ១១០រូប ។
វាគ្មិនជាតិនិងអន្តរជាតិ ដែលពេញដោយបទពិសោធន៍ បានផ្តោតការពិភាក្សា បង្ហាញ អំពីវប្បធម៌ ប្រវត្តិ និង មោទកភាព លើបញ្ហាអាស៊ាននិងអាស៊ីប៉ាស៊ីហ្វិក ដោយការស្វែងយល់អំពីវប្បធម៌អាស៊ាន វប្បធម៌តំបន់អាស៊ីប៉ាស៊ីហ្វិក និង សកលភាវូបនីយកម្ម ព្រមទាំងអត្ថប្រយោជន៍វប្បធម៌នៃការយោគយល់គ្នា ឬការប្រើប្រាស់កម្លាំងវប្បធម៌ ដើម្បីការរួបរួមសង្គម និងផ្តល់ឲ្យគ្នាទៅវិញទៅមក នូវភាពសុខដុមរមនា សន្តិភាពក្នុងតំបន់ ការអភិវឌ្ឍសេដ្ឋកិច្ចនិងសង្គមឲ្យលូតលាស់ព្រមៗគ្នា ជាពិសេសនោះ គឺកិច្ចសហប្រតិបត្តិការ កសាងសហគមន៍អាស៊ាននិងអាស៊ីប៉ាសីហ្វិក ដើម្បីប្រែក្លាយទៅជាសហគមន៍ដែលមានសក្តានុពលខ្ពស់ខាងវិស័យវប្បធម៌ អប់រំ សេដ្ឋកិច្ចជាដើម ដែលទាំងអស់នេះគឺជាសសរទ្រូងសម្រាប់ទ្វីបអាស៊ី និង ពិភពលោក ៕
អត្ថបទ និង រូបថត ៖ លោក ងិន គឹមឡេង
