ចាប់ផ្ដើមដំណើរការពីឆ្នាំ១៩៩៩ រហូតមកដល់ពេលបច្ចុប្បន្ន មន្ទីរពេទ្យកុមារអង្គរខេត្តសៀមរាប ពឹងផ្អែកទាំងស្រុងលើជំនួយសប្បុរសជន ជាពិសេសជំនួយពីក្រៅប្រទេស ដែលមន្ទីរពេទ្យកុមារមួយនេះត្រូវ ចំណាយថវិកាប្រមាណ៦លាន៥សែនដុល្លារសហរដ្ឋអាមេរិចក្នុងមួយឆ្នាំ ដើម្បីព្យាបាលកុមារកម្ពុជាទូទាំងប្រទេសកម្ពុជា។
ចំពោះថវិកានេះ នៅមិនទាន់ឆ្លើយតបទៅនឹងប្រតិបត្តិការ ដ៏ធំធេងក្នុងការជួយសង្គ្រោះកុមារកម្ពុជា ដែលកំពុងប្រឈមនឹងជំងឹកាចសាហាវយ៉ាងច្រើននោះឡើយ។ ទន្ទឹមនឹងនោះ វិស័យឯកជន បានចូលរួមជាមួយរាជរដ្ឋាភិបាលកម្ពុជា តាមរយៈការគៀងគរថវិកាសប្បុរសជនក្នុងស្រុកតាមរូបភាពផ្សេង សម្រាប់ជួយគាំទ្រដល់សកម្មភាពថែរក្សាសុខុមាលភាពកុមារកម្ពុជា។
កាលពីរសៀលថ្ងៃទី២១ ខែធ្នូ ឆ្នាំ២០១៨ ក្រុមហ៊ុនខេមផេន ថ្នាំពណ៌ជាតិ រួមជាមួយអតិថិជនរបស់ខ្លួន ព្រមទាំងសប្បុរសជនមួយចំនួនទៀត បាននាំយកថវិកាសរុបចំនួន ២២,០១៨ដុល្លារសហរដ្ឋអាមេរិច នេះជាថវិកាលើកទី២ហើយ ដែលក្រុមហ៊ុនបានឧបត្ថម្ភដល់មន្ទីរពេទ្យកុមារអង្គរ ខេត្តសៀមរាប។
លោក សោម សម្បត្ដិ អគ្គនាយកក្រុមហ៊ុនខេមផេន ថ្នាំពណ៌ជាតិ និងជាក្រុមប្រឹក្សាផ្ដល់យោបល់ នៃមន្ទីរពេទ្យកុមារអង្គរខេត្ដសៀមរាប បានមានប្រសាសន៍ថា ដោយមើលឃើញពីការទទួលព្យាបាលជំងឺកុមាររាប់រយនាក់ ក្នុងមួយថ្ងៃៗនិងមិនគិតថ្លៃ ក្រុមហ៊ុនខេមផេន និងអតិថិជនបានសម្រេចបង្កើតមូលនិធិមួយ ដើម្បីចូលរួមគាំទ្រដល់ប្រតិបត្តិការព្យាបាលជំងឺ និងថែទាំសុខភាពរបស់កុមារកម្ពុជា។
លោកបានអះអាងថា ក្រុមហ៊ុនខេមផេន និងអតិថិជនរបស់ខ្លួន នឹងនៅតែបន្តគៀងគរថវិកា ដើម្បីចូលរួមក្នុងការថែរក្សា ប្រតិបត្តិការមនុស្សធម៌របស់មន្ទីរពេទ្យកុមារអង្គរបានយូរអង្វែងនាពេលអនាគត។
លោក ទេព ណាវី នាយករងមន្ទីរពេទ្យកុមារអង្គរបានថ្លែងអំណរគុណ ចំពោះក្រុមហ៊ុនខេមផេន និងអតិថិជន ព្រមទាំងសប្បុរសជនកម្ពុជា ដែលបានបង្ហាញពីគំរូដ៍ល្អ ក្នុងការចូលរួមអំពើមនុស្សធម៌នាពេលនេះ ដើម្បីលើកកម្ពស់សុខភាពកុមារកម្ពុជា ដែលជាទំពាំងស្នងឬស្សី និងជាសរសរទ្រូងនៃប្រទេសជាតិនាពេលអនាគត។
លោកបញ្ជាក់ថាក្រោមកិច្ចសហការណ៍ជាមួយក្រសួងសុខាភិបាលនិងមន្ទីរសុខាភិបាល ខេត្តសៀមរាប មន្ទីរពេទ្យកុមារអង្គរ នឹងបន្តផ្តល់ការពិនិត្យព្យាបាល និងថែទាំសុខភាពដល់កុមារកម្ពុជាប្រកបដោយគុណភាពខ្ពស់ និងមិនគិតកម្រៃ ព្រមទាំងចូលរួមពង្រឹងប្រព័ន្ធសុខាភិបាលកម្ពុជា តាមរយៈការបណ្តុះបណ្តាលវេជ្ជបណ្ឌិត គិលានុបដ្ឋាក និងបុគ្គលិកសុខាភិបាលកម្ពុជាផងដែរ។
អត្ថបទ និង រូបថត : លោក ទ្រា ពន្លឺ
កែសម្រួលអត្ថបទ : លោក សេង ផល្លី
