រដ្ឋមន្ត្រីក្រសួងសុខាភិបាល ជម្រុញឲ្យសាកលវិទ្យាល័យវិទ្យាសាស្ត្រសុខាភិបាល បន្តការបណ្តុះបណ្តាលធនធានមនុស្ស ដើម្បីពង្រឹងគុណភាព បំរើសេវាសុខភាពសាធារណៈ ស្របតាមទិសដៅយុទ្ធសាស្ត្ររបស់រាជរដ្ឋាភិបាល !
មានប្រសាសន៍ ក្នុងឱកាសបើកសិក្ខាសាលាស្តីពីសមិទ្ឋផល៥ឆ្នាំ ( ២០១៤-២០១៨ ) របស់ សាកលវិទ្យាល័យវិទ្យាសាស្ត្រសុខាភិបាល ដែលបានឡើងនៅខេត្តសៀមរាប នាថ្ងៃទី២៤ ខែធ្នូ ឆ្នាំ២០១៨ ឯកឧត្តម សាស្ត្រាចារ្យ ម៉ម ប៊ុនហេង រដ្ឋមន្ត្រីក្រសួងសុខាភិបាល និង ជាប្រធាន ក្រុមប្រឹក្សាភិបាល នៃ សាកលវិទ្យាល័យវិទ្យាសាស្ត្រសុខាភិបាល មានប្រសាសន៍ថា ៖ សាកលវិទ្យាល័យវិទ្យាសាស្ត្រសុខាភិបាល បានអនុវត្តប្រកបដោយយកចិត្តទុកដាក់ លើកកម្ពស់ គុណភាពបណ្តុះបណ្តាល ពង្រឹងការងារស្រាវជ្រាវនិងផ្តល់សេវា ធ្វើទំនើបកម្មផ្សេងៗ សម្រាប់ជំនួយលើការងារគ្រប់គ្រង បង្រឹងបាននូវអភិបាលកិច្ចល្អ អភិវឌ្ឍបន្ថែម ហេដ្ឋារចនាសម្ព័ន្ធ ប្រើប្រាស់បានធនធានមនុស្ស សម្ភារៈ ថវិកា ប្រកបដោយប្រសិទ្ធភាព ជាពិសេស ការខិតខំពង្រឹង និង ពង្រីកកិច្ចសហប្រតិបត្តិការជាតិ-អន្តរជាតិ ឲ្យមានការរីកចម្រើន ។
ឯកឧត្តមរដ្ឋមន្ត្រី លើកឡើងថា ៖ មានសាស្ត្រាចារ្យជាច្រើននាក់ធ្វើការនៅមន្ទីរពេទ្យជាតិ និង មន្ទីរពេទ្យខេត្ត ។ ជាមួយគ្នានេះ ក៏មានការបញ្ជូននិស្សិតជាច្រើននាក់ផងដែរ ធ្វើកម្មសិក្សា នៅមន្ទីរពេទ្យខេត្តទាំងនោះ ដែលវាជាការរួមចំណែកយ៉ាងសំខាន់ ដល់ការបំរើសេវាសុខាភិបាលសាធារណៈ ។
ឯកឧត្តម ផ្តាំផ្ញើនិងសំណូមពរ សូមឲ្យសាស្ត្រាចារ្យ ដែលកំពុងធ្វើការនៅមន្ទីរពេទ្យទាំងនោះ ជួយផ្តល់ការលើកទឹកចិត្ត បង្ករលក្ខណៈងាយស្រួល ឲ្យដល់និស្សិត បានចូលរួមធ្វើសកម្មភាពការងារឲ្យបានច្រើន ដកស្រង់បទពិសោធន៍ ដើម្បីបង្កើតធនធានមនុស្ស ស្របតាមយុទ្ឋសាស្ត្រចតុកោណដំណាក់កាលទី៤ របស់រាជរដ្ឋាភិបាលអាណត្តិទី៦ ក្រោមការដឹកនាំដ៍ឈ្លាសវៃ ប្រកបដោយគតិបណ្ឌិត របស់សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា និង ជាអនាគតរបស់វិស័យសុខាភិបាល ដែលបានយកចិត្តទុកដាក់ពង្រឹង លើកកម្ពស់សេវាសុខភាពសាធារណៈ និងអាហារូបត្ថម្ភ កាត់បន្ថយបាននូវភាពក្រីក្រ របស់ប្រជាពលរដ្ឋ ។
គោលបំណងនៃអង្គសិក្ខាសាលានេះ ដែលមានរយៈពេល២ថ្ងៃ គឺដើម្បីពិនិត្យពង្រាងរបាយការណ៍ បូកសារុបសមិទ្ធផល៥ឆ្នាំ នៃការអនុវត្តផែនការយុទ្ធសាស្ត្រ ( ២០១៤ – ២០១៨ ) របស់សាកលវិទ្យាល័យវិទ្យាសាស្ត្រសុខាភិបាល ។ ផែនការយុទ្ធសាស្ត្រ៥ឆ្នាំនេះ បានដាក់ឲ្យដំណើរការដោយក្រសួងសុខាភិបាល ។
នៅក្នុងផែនការយុទ្ធសាស្ត្រនេះផងដែរ ត្រូវបានកំណត់សូចនាករគោលចំនួន៩សំខាន់ៗ ហើយអង្គសិក្ខាសាលានេះ ស្ថិតក្នុងគោលបំណងសំខាន់ ពិនិត្យឡើងវិញ ថាតើអ្វីខ្លះដែលសម្រេចបាន អ្វីខ្លះដែលសម្រេចមិនទាន់បាន ដោយមូលហេតុអ្វី ។ ការធ្វើបែបនេះគឺដើម្បីជួយតម្រង់ទិស ក្នុងការត្រៀមលក្ខណៈ រៀបចំផែនការយុទ្ធសាស្ត្រថ្មី រយៈពេល៥ឆ្នាំបន្តទៀត ៕
អត្ថបទ: លោក ងិន គឹមឡេង
រូបថត : លោក យូ វង្ស
